Mañá sábado 27 de febreiro ás 12 horas na Galería Sargadelos de Ferrol terá lugar a presentación do libro PUNVER DE VOLTA, coa participación da autora Yolanda Castaño e o ilustrador Eduardo Hermida.
Arquivos mensuais: Febreiro 2010
A Coruña: presentación do poemario Deconstruçom
A Asociación Cultural Alexandre Bóveda informa que hoxe venres 26 de febreiro terá lugar a presentación do poemario Deconstruçom de Susana Sánchez Aríns. Nesta presentación participará ademais da propria autora, o editor Miguel Anxo Fernán-Vello e Roberto Catoira. Será ás 20:00 h. no salón de actos da asociación, con entrada libre. Deconstruçom, editado por Espiral Maior, foi premiado co XXI premio nacional de poesia Xosé María Pérez Paralle.
Mañá darase a coñecer o fallo do Premio Vicente Risco
Os concellos de Allariz e Castro Caldelas e as Fundacións Vicente Risco e Sotelo Blanco comunican que o sábado, día 27 de febreiro, ás 12:30 horas, farase unha rolda de prensa, na sede da Fundación Sotelo Blanco, en San Marcos, Santiago de Compostela, onde o xurado da XV edición do PREMIO “VICENTE RISCO” DE CIENCIAS SOCIAIS dará a coñecer a súa decisión. Este xurado estará composto por: Teresa Devesa Graña, concelleira de Cultura do Concello de Allariz; Fernando Acuña Castroviejo, profesor da Universidade de Santiago; Xosé María Eguileta Franco, Arqueólogo Municipal do Concello de Ourense; Luís Martínez-Risco Daviña, en representación da Fundación Vicente Risco; e Francisco Fernández Rei, profesor da facultade de Filoloxía de Santiago de Compostela e académico, que actuará como Secretario. O premio “Vicente Risco” está dotado con 6.000,00 euros para a obra gañadora, que publicará Sotelo Blanco Edicións segundo acordo cos organizadores do premio.
Xurado do X Premio de Poesía Fiz Vergara Vilariño
Xa rematou o prazo de recepción de orixinais para a décima edición do Premio de Poesía Fiz Vergara Vilariño, organizado pola Agrupación Cultural Ergueitos e a Concellaría de Cultura de Sárria. Nesta décima edición recibíronse 86 poemarios. O xurado estará composto pola gañadora da oitava edición, Olalla Cociña; polo Presidente da Asociación de Escritores en Língua Galega, Cesáreo Sánchez Iglesias e polo editor e poeta Miguel Anxo Fernán-Vello, aos que acompañarán con voz e sen voto o Concelleiro de Cultura de Sárria, Xermán Arias e a Presidenta da A.C. Ergueitos, María Casar. O fallo do xurado será dado a coñecer o 27 de marzo nun acto público a celebrar na Casa do Concello de Sárria e a entrega do premio (6.000 euros e unha obra dun artista plástico galego) celebrarase a primeiros de maio no transcurso dun acto poético-musical.
Maside: Cesáreo Sánchez presenta o seu último libro
Mañá venres día 26 de febreiro, ás 15,30 horas, o poeta Cesáreo Sánchez Iglesias, presidente da Asociación de Escritores en Lingua Galega, vai presentar no C.P.I. de Maside (Ourense) o seu último libro O paraíso das sombras, nun encontro cos alumnos e alumnas do centro de ensinanza de secundaria. O autor aproveitará o acto para facer unha doazón de parte da súa biblioteca persoal á biblioteca do centro.
A Pobra de Caramiñal: presentación da novela gaañdora do Premio García Barros
A Asociación Cultural Barbantia, a libraría Ler d´A Pobra do Caramiñal e a Editorial Galaxia presentación este venres o libro Un tipo listo, Premio García Barros de novela, de Xosé Monteagudo. O acto celebrarase na libraría Ler d´A Pobra do Caramiñal a partir das 20:30 e nel estarán presentes o autor, así como Víctor Freixanes, director de Galaxia; Antón Riveiro Coello, presidente de Barbantia; Xosé Ricardo Losada, secretario de Barbantia; e os socios da entidade, María Xesús Blanco e Xerardo AgraFoxo.
Pontevedra: presentación da carpeta Homenaxe a Uxío Novoneyra
Este venres 26 de febreiro preséntase no Café Moderno de Pontevedra a carpeta Homenaxe a Uxío Novoneyra: Letras Galegas 2010. O acto comezará ás 20:00 e ten entrada libre. A carpeta será presentada máis adiante en Santiago de Compostela (o 5 de marzo, na Asociación O Galo) e Ferrol (12 de marzo, no Ateneo Ferrolán).
A AELG promove a lectura dun manifesto no Día de Rosalía
A Asociación de Escritores en Lingua Galega promove para hoxe mércores día 24 de febreiro a lectura dun manifesto conmemorativo do nacemento da escritora galega Rosalía de Castro, a celebrar en varias cidades do país. As cidades e horarios onde se lerá o manifesto son:
A Coruña, 18,00 horas. Monumento a Curros Enríquez. Coa colaboración da Concellaría de Cultura do Concello da Coruña. Lerán o manifesto: Cesáreo Sánchez Iglesias, presidente da AELG; Mercedes Queixas, secretaria xeral da AELG, Manuel Rivas, Xavier Seoane e Luz Pozo
Compostela, 17,30 horas. Onde a estatua de Rosalía, no Paseo da Ferradura. Lerán o manifesto: Antía Otero e Marilar Aleixandre
Ferrol, 18,00 horas. Praza do Himno Galego. Lerá o manifesto: Rosa Méndez
Lugo, 18,00 horas. Rúa Nóreas, a carón da casa que fai esquina con Rúa San Pedro, onde viviu Rosalía de Castro entre 1864 e 1868. Lerán o manifesto: Isidro Novo e Antonio Reigosa
Pontevedra, 18,00 horas. Na estatua de Castelao, onda o Museo de Pontevedra. Lerá o manifesto: Luis Rei Núñez
Vigo, 19,00 horas. Rúa Real 12, onde a tipografía de Juan Compañel. Coa colaboración da Concellaría de Cultura do Concello de Vigo. Lerán o manifesto: Agustín Fernández Paz, Marta Dacosta, Álvarez Cáccamo e Mª do Carme Krukenberg
Culleredo: obradoiro de poesía con Miguel Anxo Fernán-Vello
A Concellería de Cultura do Concello de Culleredo, como complemento á Programación de Primavera da “AULA DA POESÍA” da Biblioteca de Poesía “Uxío Novoneyra” de Vilamelania-Vilaboa, organiza o II Obradoiro de Poesía, dende o 5 de abril ao 10 de maio, impartido polo poeta e editor Miguel Anxo Fernán Vello e dirixido a persoas maiores de 16 anos, cun máximo de trinta prazas e con carácter gratuíto. Os interesados en asistir deben dirixirse á Concellería de Cultura do Concello de Culleredo, Edificio de Servicios Múltiples do Burgo, teléfono 981665597, ou ben enviar un correo electrónico.
Na presente edición do Obradoiro de Poesía levarase a cabo, procurando a novidade e a orixinalidade, a implantación dun “taller temático”, no cal a creación poética ocupará un lugar central no traballo dos participantes. Sen deixar de lado aspectos teóricos e discursivos, sempre necesarios e interesantes, o Obradoiro establecerase como “lugar de escrita”, como ámbito de exploración e fixación práctica e material do poema. A partir de liñas e propostas de acción concretas, os participantes elaborarán diferentes textos poéticos, primando en todo momento a aprendizaxe e a máxima esixencia formal no que se prefigura como un laboratorio vivo de poesía.
O taller terá unha duración total de 12 horas. As clases impartiranse todos os luns, en horario de 20:00 a 22:00 h. A inauguración terá lugar o luns 5 de abril, e continuará, nese mesmo mes, os días 12, 19 e 26, pasando logo aos días 3 e 10 de maio, data final esta última do Obradoiro. Unha vez rematado o Obradoiro procederase á edición dun caderno/libro que conterá unha selección dos mellores poemas escritos polos alumnos e alumnas participantes.
Xosé Neira Vilas, Premio Laxeiro 2010
O conselleiro de Cultura e Turismo, Roberto Varela participou onte na reunión do padroado da Fundación Laxeiro en Vigo e logo entregoulle a Xosé Neira Vilas (Gres, 1928) o Premio Laxeiro 2010. Varela gabou a carreira do galardoado, afirmando que “é un dos grandes nomes da nosa cultura, un referente literario, intelectual e, sobre todo, humano”, e resaltou as afinidades entre o premiado e José Otero Abeledo, máis coñecido como Laxeiro, “por compartir o don extraordinario de repropoñer en formas aparentemente simples, inmediatamente comunicativas, toda unha tradición cultural” así como posuír “a cualidade rara e preciosa, de creadores verdadeira e sentidamente populares”. [Ler noticia completa en Xornal de Galicia]
