Santiago: presentación dun poemario de Ramón Caride
Arquivos mensuais: Febreiro 2010
Ferrol: presentación dun libro de Neira Cruz
Mañá mércores 24 ás 20.00 horas na Galería Sargadelos de Ferrol preséntase o libro Jan estivo alí de Xosé A. Neira Cruz. O acto contará coa participación do autor acompañado por Víctor F. Freixanes, director xeral de Galaxia e membro da Real Academia Galega, e David Soler, ilustrador.
A AELG lembra a Rosalía cunha lectura pública da súa obra
Co gallo do Día de Rosalía, o vindeiro mércores, 24 de febreiro, a AELG organiza unha lectura pública simultánea nas seguintes cidades do país:
A Coruña, ás 18.00, Xardíns de Méndez Núñez, Monumento a Curros Enríquez
Ferrol, ás 18.00, na Praza do Himno Galego
Lugo, ás 18.00, Rúa Nóreas, a carón da casa que fai esquina con Rúa San Pedro, onde viviu ROSALÍA DE CASTRO entre 1864 e 1868 (hai unha placa indicativa).
Pontevedra, ás 18.00, onde a estatua de Castelao
Santiago, ás 17.30, onde a estatua de Rosalía, no Paseo da Ferradura
Vigo, ás 19.00, no nº 12 da Rúa Real, onde a tipografía de Juan Compañel
Podedes consultar neste mapa a ubicación exacta dos diferentes lugares.
Orgullos@s do noso, orgullos@s do galego
Martiño Rivas, Belén Regueira, Antón Reixa, Susana Seivane, Luís Tosar e María Castro participan na nova campaña da Coordinadora Galega de Equipos de Normalización e Dinamización Lingüística (CGENDL): Orgullos@s do noso, orgullos@s do galego.
A Coruña: José Luís Peixoto e Miguel Anxo Fernán-Vello no ciclo Poetas di(n)versos
Continúa o ciclo de recitais poéticos dirixido pola poeta Yolanda Castaño e organizado pola Concellaría de Cultura do Concello da Coruña coa participación mañá martes 23 de febreiro dos escritores José Luís Peixoto e Miguel Anxo Fernán Vello. O acto comezará ás 20:30 na Casa da Cultura Salvador de Madariaga (rúa Durán Loriga, 10).
José Luís Peixoto é unha das principais revelacións literarias da última década en Portugal, cunha proxección extraordinaria que o levou a ser traducido xa a vinte idiomas e a acadar un gran recoñecemento tanto no seu propio país coma no estranxeiro. Literariamente polifacético e ambicioso, Peixoto é todo un ídolo das letras portuguesas actuais que chegou a vender quince mil exemplares dun dos seus poemarios.
Miguel Anxo Fernán Vello non precisa presentación no noso país. Dende os oitenta até a actualidade a obra poética de quen tamén é o meirande editor de poesía en galego foise convertendo nunha das máis sólidas e prolíficas do noso panorama. Finalista do Nacional e gañador do Premio da Crítica Española en varias ocasións, Miguel Anxo é un dos autores galegos máis respectados fóra de Galicia.
Descargar dossier en PDF (311 KB)
Apúntate ao recital no evento en Facebook.
Finalistas dos Premios AELG 2010
Ábrese agora o prazo para a elección dos gañadores/as por parte dos Socios e Socias da Aelg, que se estende até o 12 de abril. Os gañadores/as daranse a coñecer o día 17 de abril no transcurso da Cea das Letras.
Blog Literario
A canción do náufrago, de Francisco Castro
As uvas na solaina, de Marcos Valcárcel
Axenda Cultural da AELG, de Algueirada (Acción cultural na rede)
Brétemas, de Manuel Bragado
Cabaret Voltaire, de Santiago Jaureguízar
O levantador de minas, de Alfredo Ferreiro
Ensaio
A mecánica da maxia. Ficción e ideoloxía en Álvaro Cunqueiro, de Manuel Forcadela
As razóns do galego. Apelo á cidadanía, de Henrique Monteagudo
Cartas de republicanos galegos condenados a morte (1936-1948), de Xesús Alonso Montero
Soñadores e Familia. Os personaxes na narrativa de Álvaro Cunqueiro, de María Xesús Nogueira Pereira
Literatura Infanto-xuvenil (AELG-Gálix)
Ás de bolboreta, de Rosa Aneiros
Lúa do Senegal, de Agustín Fernández Paz
O Brindo de Ouro II. A táboa da Hospitalidade, de Xesús Manuel Marcos
Valados, de Agustín Fernández Paz
Mellor traxectoria xornalística (AELG-Colexio de Xornalistas)
Belén Regueira
Ana Romaní
Xosé Manuel Pereiro
Bieito Iglesias
Manuel Rivas
Fran P. Lorenzo
Lino Braxe
Anxo Tarrío
Narrativa
Monte Louro, de Luís Rei Núñez
O cabo do mundo,de Xabier Quiroga
Unha historia que non vou contar, de Cid Cabido
Poesía
Deter o día cunha flor, de Luz Pozo Garza
O pouso do fume, de Dores Tembrás
[O paraíso das sombras, de Cesáreo Sánchez Iglesias, que resultou tamén finalista, foi retirado a petición do autor]
Teatro
Delimvois, de Rubén Ruibal
Medea dos fuxidos e outras pezas, de Manuel Lourenzo
Sempre quixen bailar un tango, de Teresa González Costa
Tradución
Flanagan. Flash-Back, de Jaume Ribera e Andreu Martín, en tradución de Isabel Soto
O museo da inocencia, de Orhan Pamuk, en tradución de Bartug Aykam e María Alonso Seisdedos
Obra dramática completa, de Sarah Kane, en tradución de Manuel F. Vieites
Residente privilexiada, de María Casares, en tradución de Ana Belén Martínez Delgado
Presentación en Oxford de Books burn badly de Manuel Rivas
O Centre for Galician Studies e The Queen’s College organizan a presentación de Books Burn Badly, tradución ao inglés de Os libros arden mal de Manuel Rivas.
O acto terá lugar en Oxford no Ashmolean Museum o venres 26 de febreiro ás 5 da tarde. A presentación irá seguida dunha mesa redonda con Manuel Rivas, Jonathan Dunne, tradutor incansábel de literatura galega ao inglés, e John Rutherford, responsábel do Centre for Galician Studies e tradutor. No acto servirase un viño galego.
A Coruña: concerto didáctico para presentar Os instrumentos musicais na tradición galega
IX Certame literario de relato de aventuras “Antón Avilés de Taramancos”
Bases do IX Certame literario de relato de aventuras “Antón Avilés de Taramancos”.
1.- Poderán concorrer ao Certame de Relato de Aventuras todas as persoas, maiores de idade, de calquera nacionalidade, cun único traballo en galego de temática libre que sexa inédito, encadrado no relato de aventuras
2.- A obra, cunha extensión entre 70.000 e 100.000 caracteres, presentarase por cuadriplicado en mecanografados por unha soa cara, debidamente grampados, cosidos ou encadernados sen sinatura e
cun lema, utilizando o sistema de plica.
3.- O prazo de admisión dos orixinais rematará o día 30 de abril de 2010
4.- Os traballos serán remitidos a:
Concello de Noia
Rosalía de Castro, 2
15200 Noia (A Coruña)
5.- Estabelécese un único premio de 3000 €, ademáis dunha escultura conmemorativa do artista noiés Alfonso Costa, e a publicación da obra gañadora por parte do Excmo.Concello de Noia. O importe do premio estará suxeito á lexislación fiscal vixente.
6.- O xurado terá todas as facultades para a decisión do premio, que poderá quedar deserto, e para interpretar as bases. Estará composto por persoas de recoñecido prestixio no eido das letras galegas e emitirá públicamente o seu veredicto o día 28 de maio de 2010.
7.- Os traballos non premiados serán devoltos, previa solicitude, e os restantes destruídos transcorridos vinte días desde a data do veredicto do Certame. Non poderán participar neste certame os autores premiados en edicións anteriores.
8.- O feito de concorrer ao Certame implica a aceptación das devanditas bases.
A Coruña: conferencia de Carlos Quiroga
O vindeiro martes 23 de febreiro o doutor e profesor da USC Carlos Quiroga Díaz falará dentro do Ciclo, Literatura e Naçom organizado pola Agrupaçom O Facho. A sua charla versará sobre Encontros e desencontros da Literatura Galega com as Lusófonas. Será a partir das oito do serán no local da Fundación Caixa Galicia (Cantón Grande, 21-24).
