Desde Galicia Confidencial:
“O escritor e xornalista Alberto Ramos Ríos gañou o 21º Premio Abrente de Textos Teatrais coa obra Por unanimidade. O autor xa recibira este galardón, convocado polo Concello de Ribadavia a través da Mostra Internacional de Teatro (MIT), hai dous anos, na súa 19ª edición, con Os servizos prestados.
Un xurado integrado por Lucía Aldao, Carlos Álvarez-Ossorio e María Ángeles Iglesias Lopardo decidiu outorgarlle por maioría o premio a Alberto Ramos. O galardón inclúe 4.000 euros e a edición da obra gañadora.
A decisión do xurado está motivada “por ser un texto humorístico, con personaxes moi ben construídos e un ton irónico intelixente, cun ritmo áxil no que destaca a capacidade de construír a seis voces. O texto introduce cuestións de actualidade e, cunha base de crítica política ao contexto cultural, axuda, a través do humor, a reflexionar sobre a propia natureza dos premios e as súas problemáticas, ademais de construír unha situación extrapolable a outras reunións ou encontros entre grupos de persoas que precisan chegar a acordos desde posicións diversas”. (…)”