Betanzos: Obradoiro de creación literaria Atopar (e escribir) as historias (agochadas), con Xesús Fraga

Destacado

Publicado o 2 Outubro 2026 por asociacionescritoras-es

O Obradoiro de creación literaria Atopar (e escribir) as historias (agochadas) é unha iniciativa da Escola de Escritoras-es da AELG, actividade subvencionada pola Deputación da Coruña, coa colaboración da Libraría Biblos de Betanzos. Será impartido por Xesús Fraga, cunha sesión especial con Ángel de la Cruz.

Horarios e calendario:
De 17:00 a 20:00 h. os sábados:
– 24 e 31 de outubro
– 7, 14, 21 e 28 de novembro

De 17:00 a 19:00 h. o sábado:
– 12 de decembro

Todas as sesións terán lugar na Libraría Biblos (Rúa Santiago, 4), en Betanzos.

Hai 15 prazas para persoas maiores de 18 anos. A inscrición, gratuíta, realizarase, indicando nome e apelidos, xunto ao nome do obradoiro, enviado un correo electrónico a oficina@aelg.org. As solicitudes atenderanse por orde cronolóxica de chegada. A inscrición de cada persoa participante entenderase feita para o conxunto da actividade.

“Seica Michelangelo dicía que o seu traballo como artista era atopar a escultura oculta que xa había dentro dun bloque de mármore: limitábase a retirar o que sobraba. Ese materia prima súa era o resultado dun proceso metamórfico de varios millóns de anos que transforma o que noutrora eran cunchas mariñas en rocha caliza, que os procesos internos da terra acaban por converter en mármore. De igual xeito, tamén as historias nacen dun longo desenvolvemento no que se van sedimentando materiais diversos: o visto e o lido, o recordado e o esquecido, os mortos e os vivos. Igual que a actividade tectónica empurra do mármore ata sacalo á superficie, tamén eses compoñentes do relato acaban por agromar. E, sen ousar compararnos co mestre italiano, temos que ir buscando os personaxes e as historias para que vexan a luz. Facémolo coas ferramentas do oficio, pero tamén coa guía da intuición, que non é máis que aquilo que non sabiamos que sabiamos.”

Información sobre protección de datos
A responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.

Ourense: Ciclo de Literatura Infantil e Xuvenil 2026: Medo me dá! Ler para esconxurar as sombras. Paula Carballeira: “Contar os medos”, o 8 de outubro

Destacado

Publicado o 1 Outubro 2026 por asociacionescritoras-es

A edición de 2026 do Ciclo de Literatura Infantil e Xuvenil vai ter lugar baixo o título xeral de Medo me dá! Ler para esconxurar as sombras. A AELG colabora con esta actividade ao abeiro do convenio coa Secretaría Xeral da Lingua.

O Ciclo está coordinado por Isabel Mociño González, Carla Míguez, María González Cerdeira e María Vázquez Fernández (Facultade de Educación e Traballo Social, Campus de Ourense – Universidade de Vigo).

Desenvolverase os días 8, 15, 22 e 29 de outubro de 2026, ás 18:00 horas, na sala Emilia Pardo Bazán da Facultade de Educación e Traballo Social, no Campus de Ourense.

A inscrición é de balde e pode facerse aquí.

Está en proceso o recoñecemento de 15 horas de créditos de libre elección.

O programa é o seguinte:

8 de outubro
Inauguración
Paula Carballeira
Contar os medos

15 de outubro
Xosé Miranda
O fantástico e o arrepiante

22 de outubro
Ramón D. Veiga
O sorriso detrás do medo: monstros que fan cóxegas

29 de outubro
Fina Casalderrey
A xoaniña que bebeu na folla

Paseos Literarios por Compostela 2026

Destacado

Publicado o 1 Outubro 2026 por asociacionescritoras-es

Os Paseos Literarios por Compostela 2026 son unha iniciativa da AELG desenvolvida coa colaboración e patrocinio do Concello de Santiago de Compostela. No marco da Semana do Libro de Compostela (SELIC) 2026, terá lugar unha nova edición deste Ciclo de percorridos literarios por Compostela, procurando outra ollada á historia e xeografía da cidade.

A inscrición, gratuíta, realizarase, indicando nome e apelidos, enviando un correo electrónico a oficina@aelg.org. O punto de saída en todos eles será a propia SELIC, na Praza da Quintana.

O programa de Paseos Literarios é o seguinte:
– A Conferencia Ambulante de Serafín Andante.
Carlos Labraña
Data: sábado 3 de outubro, ás 12:00 h.

– A cidade e os milagres
Daniel Asorey
Data: quinta feira/xoves 8 de outubro, ás 17:00 h.

– A Conferencia Ambulante de Serafín Andante.
Carlos Labraña
Data: sábado 10 de outubro, ás 12:00 h.

Obradoiro de creación literaria Non sei o que vou escribir, con Carlos Callón, en Compostela

Destacado

Publicado o 28 Setembro 2026 por asociacionescritoras-es

O Obradoiro de creación literaria Non sei o que vou escribir é unha iniciativa da Escola de Escritoras-es da AELG, actividade subvencionada pola Deputación da Coruña, coa colaboración da Libraría Couceiro, de Santiago de Compostela.

Será impartido por Carlos Callón, contando cunha sesión especial a cargo de Antón Lopo.

“Este é un obradoiro que parte dunha idea de Marguerite Duras que acompañou e continúa a acompañar o relator na súa traxectoria como poeta e ensaísta: «Escribir é tentar saber o que escribiriamos se escribísemos». Ao longo das sesións abordaremos a escrita non só como expresión dunha idea previa, senón tamén como ferramenta de descubrimento e, mesmo, como forma de nos achegarmos a algo que poidamos chamar verdade, con aspas ou sen elas.
A través dun percurso pola obra do relator, desde os primeiros proxectos até os máis recentes, exploraranse cuestións como o nacemento dun libro, a procura dunha voz propia, as relacións entre documentación e creación, a escolla da forma, a reescrita e os procesos polos que textos dispersos acaban conformando unha unidade, ou talvez un enxame. As sesións combinarán exposición, lectura comentada, conversa e prácticas breves.”

Hai 20 prazas para persoas maiores de 18 anos. A inscrición, gratuíta, realizarase, indicando nome e apelidos, xunto ao nome do obradoiro, enviado un correo electrónico a oficina@aelg.org. As solicitudes atenderanse por orde cronolóxica de chegada. A inscrición de cada persoa participante entenderase feita para o conxunto da actividade.

Horarios e calendario:
De 17:00 a 19:00 h. nas seguintes cuartas feiras/mércores:
– 14, 21 e 28 de outubro
– 4, 11, 18 e 25 de novembro
– 2, 9 e 16 de decembro

Todas as sesións terán lugar na Libraría Couceiro (Praza de Cervantes, 6), en Santiago de Compostela.

Obradoiro de creación literaria Sen marxes. Poesía expandida, con Silvia Penas, en Vigo

Destacado

Publicado o 11 Setembro 2026 por asociacionescritoras-es

O Obradoiro de creación literaria Sen marxes. Poesía expandida, é unha iniciativa da Escola de Escritoras-es da AELG, con patrocinio da Xunta de Galicia e a colaboración da Biblioteca Municipal Neira Vilas de Vigo e a Asociación Cultural Évame Oroza.

Será impartido por Silvia Penas, cunha sesión especial a cargo de María Lado.

Ten 15 prazas para persoas maiores de 18 anos. A inscrición, gratuíta, farase enviando un correo electrónico a oficina@aelg.org indicando nome, apelidos e o nome deste obradoiro. ACTUALMENTE ESTÁN XA TODAS AS PRAZAS CUBERTAS, POLO QUE AS SOLICITUDES QUE SE ENVÍEN A PARTIR DE AGORA ENTRARÍAN NUNHA LISTAXE DE RESERVA.

Calendario, horarios e emprazamentos
– Biblioteca Municipal Neira Vilas de Vigo (Avenida Emilio Martínez Garrido, 21):
Sábados 10, 17, 24 e 31 de outubro de 2026, de 10:00 a 14:00 h.
– Asociación Cultural Évame Oroza (Subida Costa, 5):
Sábado 7 de novembro de 2026, de 10:00 a 14:00 h.

“A poesía non entra nun DIN A4. Sen marxes é un convite a desbordar o papel para levar a escrita directamente ao corpo, á sonoridade e ao espazo.
Neste obradoiro sentaremos á mesa da creación poética sobre catro patas fundamentais: voz, corpo, música e obxectos. Con estes elementos hibridaremos o poema para darlle sabor e colocalo no centro do taboleiro, alimentando a nosa fame simbólica e artística, e a necesidade de resignificar o mundo desde o código poético.
Ao romper os límites do folio, a escrita feita corpo habitará o espazo, gañará sonoridade e cambiará de cor.”

Obradoiro de creación literaria Diálogos entre literatura e música, impartido por Isabel Rei Samartim, en Pontevedra

Destacado

Publicado o 28 Agosto 2026 por asociacionescritoras-es

O Obradoiro de creación literaria Diálogos entre literatura e música é unha iniciativa da Escola de Escritoræs da AELG, co patrocinio e colaboración do Concello de Pontevedra. Será impartido por Isabel Rei Samartim.

“Se a palavra escrita é capaz de evocar silêncios e melodias, a música transporta em si o poder de narrar histórias. Neste obradoiro exploraremos o território partilhado onde as duas artes se cruzam, fundem e desafiam, investigando as infinitas correspondências entre a expressão verbal e a linguagem musical.
Ao longo de sete sessões práticas e teóricas, o foco estará na porosidade das fronteiras artísticas. Analisaremos como o ritmo, a harmonia e a textura moldam tanto a construção de um texto como a composição de uma peça sonora. Vamos investigar de que forma a literatura se apropria da matéria musical, e como a música reinterpreta e amplifica as narrativas literárias.
Este espaço será um laboratório dinâmico e flexível, um convite aberto a tornar o pensamento em música e a música em literatura, num diálogo livre e em constante transformação.”

– 15 prazas dispoñíbeis para persoas maiores de 18 anos. A inscrición, gratuíta, pode facerse enviando un correo electrónico indicando o nome e apelidos ao correo electrónico oficina@aelg.org.

– O obradoiro desenvolverase na Aula da Escola de Escritoras-es da AELG (Seminario 7), no Pazo da Cultura de Pontevedra (Rúa Alexandre Bóveda, s/n).

Calendario
– Días: Sábados 19 de setembro; 3, 24 e 31 de outubro; e 7, 14 e 21 de novembro de 2026.
– Horarios: de 10:00 a 13:00 h.

Información sobre protección de datos
A/O responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.

Vigo: presentación de Paxaro, de Tracey Lindberg, obra traducida por María Reimóndez

Publicado o 5 Outubro 2026 por asociacionescritoras-es

A Coruña: inauguración do Espazo Cultural Manuel María

Publicado o 5 Outubro 2026 por asociacionescritoras-es

A Coruña: inauguración da exposición A luz resucitada. Un achegamento imaxinario ao poeta Manuel María

Publicado o 5 Outubro 2026 por asociacionescritoras-es

Marilar Aleixandre, escritora: “Ao Vákner pídolle que nos defenda”

Publicado o 5 Outubro 2026 por asociacionescritoras-es

Entrevista de P. Blanco e F. Rodríguez a Marilar Aleixandre en La Voz de Galicia:
“(…) – La Voz de Galicia (LVG): Tamén levou ao Vákner á súa obra A Vaca de Fisterra e a trabe de Alcatrán. Que ve nesta figura?
– Marilar Aleixandre (MA): Folclore e lendas son interesantes. O bispo Mártiros peregrinaba e el tiña que contar algo para dicir que era moi valente, un milhomes, e así relata que se atopou en Dumbría cunha especie de lobishome xigante. Loiadas [ri], iso non é cousa de agora das redes. Teño feito o Camiño, chegando a Fisterra, percorrín a pé moita da Costa da Morte, teño formación de zoóloga, e nunca vin lobishomes. Aínda así teño bastante simpatía por eles. Son moi seguidora de Antonio Reigosa, Xoán Ramiro Cuba e Xosé Miranda: no seu Dicionario dos seres míticos galegos aluden a el, e a que Mártiros o que atopou aquí eran comedores de peixe. Faime graza. No meu poema Comedores de cabezas toco iso, que algo que identifica ás xentes de Galicia é comer as cabezas dos peixes. Iso vino eu na casa do meu compañeiro, en Toba, Cee. Cheguei a Galicia con 25 anos e foime máis difícil aprender a comer cabezas de peixe que aprender o galego!
– LVG: En As malas mulleres ou en As bocas cosidas vostede conta a historia dos que non tiveron voz. E a versión do Vákner?
– MA: Pois igual hai que intentar falar con el, un destes días toca lúa chea. O lobishome non o é por vontade propia. Iso está na mitoloxía popular de moitos países e en novelas tan famosas como as de Harry Potter. Eu traducín o primeiro libro, que por certo por fin se vai reeditar agora. Hai aí un personaxe encantador, Remus Lupin, un dos bos, e é lobishome. Que lle pediría eu ao Vákner? Que nos defenda á xente da Costa da Morte. (…)”

Francisco Castro: “Faltaba unha editorial que apostase polo valor literario e non estivese pendente das esixencias do mercado”

Publicado o 5 Outubro 2026 por asociacionescritoras-es

Entrevista de Alba Prada Estévez a Francisco Castro en El Correo Gallego:
“(…) – El Correo Gallego (ECG): Despois de tantos anos ligado ao mundo editorial, que lle faltaba atopar no panorama galego para decidir poñer en marcha unha editorial propia como Moléculas?
– Francisco Castro (FC): Faltaba, creo eu, unha editorial como Moléculas. Dirixín a editorial Galaxia, que publicaba cento e pico de novidades ao ano, o que quere dicir que cada dous días e pouco estabamos sacando unha novidade. E faltaba unha editorial que non estivese pendente das esixencias do mercado, do que «se vende», e que apostase polo valor literario e polo coidado. Por iso lle chamamos «o refuxio dos libros bos». Temos un xeito de traballar bastante artesanal, de moita comunicación cos autores. Case analizamos cada palabra, cada coma, cada punto e coidamos a maquetación, coidamos todo.
– ECG: Vén de dirixir unha editorial histórica como Galaxia. Que aprendizaxes desa etapa están presentes agora en Moléculas e que cousas quería facer dun xeito diferente?
– FC: Aprendizaxes, todas. Eu tiven a gran honra de dirixir unha editorial inmensa na historia deste país como é Galaxia. Formeime aí como editor e aprendín moito, sobre todo de Víctor Freixanes, que foi o meu antecesor no cargo. Cada día con el era unha aprendizaxe. Pero tamén aprendín que a novela dun editor é o seu catálogo. Entón, ao non ter a presión comercial que ten unha editorial grande, un incorpora outro xeito de traballar, máis tranquilo. Non temos que ter vinte novidades para a campaña de Nadal, non temos que sacar este libro xa. Imos facelo amodo. Ese vai ser o gran cambio. (…)
– ECG: Di que queren publicar «libros que nós mesmos queiramos ler». Cal é o primeiro filtro que debe superar un manuscrito para entrar no catálogo de Moléculas?
– FC: Pode soar moi pomposo ou moi obvio, as dúas cousas, pero o criterio é a calidade. O grupo de persoas que lemos os exemplares, non só Inma López Silva máis eu, senón máis xente, buscamos iso. Ao non ter esa presión de «dar un pelotazo», podemos seleccionar un texto estupendo. Así que ese é o filtro: a calidade. Despois haberá libros que responderán no mercado e outros que non. Haberá outros dos que quizais teñamos un almacén cheo de exemplares que ninguén vai mercar, pero estaremos prestixiando o noso catálogo e estaremos dando voz e oportunidade a quen realmente nos ofrece un texto valioso. O filtro é que as persoas que lemos, liberadas desa tiranía de que hai que pagar nóminas e competir con outras editoriais, lemos doutra maneira. (…)”