(A Coruña, 5 novembro 2008).- Mañá xoves día 6 de novembro, no vóo que sae de Lavacolla ás 21,20 horas, sairá en dirección a Valencia a delegación galega que participará na XXV edición de Galeusca.
Organizada pola asociación de escritores en lingua catalana, os encontros Galeusca chegan á súa XXV edición, a celebrar no País Valenciano, nas localidades de Valencia e Sueca. Celebraranse en Valencia e Sueca do 7 ao 9 de novembro de 2008.
Arquivo da categoría: Actividades AELG
A Coruña: Yolanda Castaño conferenciará na Universidade
Encadrada no III Ciclo de conferencias Escritores/as na Universidade, mañá mércores día 5 de novembro ás 12:30 terá lugar na Facultade de Filoloxía da Universidade da Coruña (Campus da Zapateira)a intervención da escritora Yolanda Castaño.
XXV edición dos encontros GALEUSCA
(A Coruña, 31 outubro 2008).- Organizada pola asociación de escritores en lingua catalana, os encontros Galeusca chegan á súa XXV edición (ver programa), a celebrar no País Valenciano do 7 ao 9 de novembro nas localidades de Valencia e Sueca.
Trátase do primeiro encontro tras a constitución o pasado 15 de xuño da Federación Galeusca, que agrupa ás asociacións de escritores en lingua catalana, éuskaro e galega.
O tema central desta XXV edición xira arredor da “literatura e a paisaxe do eu”, co obxectivo de despregar e afondar na literatura como un espazo de construción do propio suxeito e as súas múltiples concrecións. Até que punto cando escribimos sobre os diferentes aspectos que nos rodean non falamos de nós mesmos? Até que punto non nos construímos a partir da reflexión feita na propia obra? Ou á inversa, cando algúns escritores, reflexionando sobre a propia experiencia, foron capaces de implicar toda unha xeración ou visión do país.
Doutro lado, o suxeito do século XXI é un suxeito cambiante que deu lugar a pseudobiografías ben persoais, xa sexa pola historia vivida e interpretada, xa sexa pola vontade de facerse unha subxectividade en liberdade que se afaste dos estereotipos herdados, un aspecto que tamén inclúe os modelos sexuais prefixados.
Para falar destes aspectos e doutros puntos de vista que o tema suxira, distribúese o tema en tres sesións de traballo:
1. “Sobre paisaxes propias”, onde os relatorios centraranse sobre a propia ficción, sobre a propia obra literaria, convertindoos nun espazo de reflexión autobiográfica persoal e colectiva;
2. “O dietarismo, unha forma de reflexión”, centrada no xénero literario do dietario, baixo as distintas formas, persoal, cultural, literaria, de reflexión persoal e colectiva;
3. “Este experimento que se chama eu”, abordando temas de constitución do individuo e da creación da propia subxectividade, tamén sexual, sen esquecer as referencias ás novas linguaxes experimentais que levan a cabo as voces máis novas de cada literatura.
Como actividade paralela celebrarase un recital literario coa participación de tres escritores/as de cada unha das tres asociacións.
Os/as membros da delegación galega son:
Marica Campo
Francisco Castro
Manuel Forcadela
Agustín Fernández Paz
Anxos Sumai
Marilar Aleixandre
Isidro Novo
Xerardo Méndez
Carlos Negro
Antía Otero
Mercedes Queixas
Elvira Riveiro Tobío
Xan Arias
Xavier Queipo
Cesáreo Sánchez Iglesias
(Gabinete de Comunicación da AELG; tel: 660 530 525; correo-e: prensa@aelg.org)
A AELG solicita que Pontedeume homenaxee publicamente o escritor Ramiro Fonte
Ante a triste noticia do pasamento do escritor Ramiro Fonte Crespo, a Asociación de Escritores en Lingua Galega ven de solicitar do Concello de Pontedeume que se lle poña o nome do insigne Poeta a algún dos seus edificios públicos relacionados co mundo da Cultura, de modo que sirva como tributo á súa memoria por parte da vila que o viu nacer.
Vigo: mesa redonda sobro a narrativa actual
No contexto do III Ciclo de conferencias Escritores/as na Universidade, e xa celebradas en días anteriores as mesas redondas sobre os xéneros poético e teatral, mañá xoves día 30 de outubro, ás 12:00 no salón de actos da Facultade de Filoloxía e Tradución da Universidade de Vigo, celebrarase unha nova mesa redonda nesta ocasión sobre “O xénero narrativo na actualidade”. Con presentación de Gonzalo Navaza, intervirán na mesa Francisco Castro, Xosé Miranda e Rexina Vega.
A Coruña: Teresa Moure conferenciará na Universidade
Encadrada no III Ciclo de conferencias Escritores/as na Universidade, mañá mércores día 29 de outubro ás 12:30 terá lugar na Facultade de Filoloxía da Universidade da Coruña (Campus da Zapateira)a intervención da escritora Teresa Moure.
III Ciclo de Conferencias “Escritores/as na Universidade”
A Asociación de Escritores en Lingua Galega e a S. X. de Política Lingüística, en colaboración coas Facultade de Filoloxía das Universidades da Coruña e Vigo, achegarán á comunidade universitaria e á sociedade en xeral desde o 15 de outubro a oportunidade de escoitar unha extraordinaria pléiade de escritores e escritoras das nosas letras (ver programa).
Farase un acto de inauguración do ciclo o día 16 de outubro, na Facultade de Filoloxía e Tradución da Universidade de Vigo, coa presenza do Vicerreitor de Relacións Institucionais, Sr. D. Iván Area, do Decano da Facultade de Filoloxía e Tradución, Sr. D. Joaquín Sueiro Justel, do Departamento de Filoloxías Galega e Latina, Sr. D. Anxo Lorenzo Suárez e polo Consello Directivo da Aelg a escritora Marta Dacosta.
Seminario internacional “Creación, edición e crítica: poetas galegas e irlandesas”
(A Coruña, 14 outubro 2008).- Organizado conxuntamente polo Grupo de Investigación Poesía e Xénero e a Asociación de Escritores en Lingua Galega, os vindeiros 16 e 17 de outubro vaise celebrar no Salón de Graos da Facultade de Filoloxía da Universidade de Santiago de Compostela un seminario internacional baixo título Creación, Edición e Crítica: poetas galegas e irlandesas (ver programa).
Este seminario internacional reúne representantes do mundo editorial, da crítica e da creación poética tanto de Galicia como de Irlanda con obxecto de que poidan poñer en común as súas experiencias en relación ao fenómeno da recente emerxencia de mulleres poetas en ambas comunidades. Até a actualidade, foi frecuente realizar seminarios cunha presenza dominante de investigadoras e algún escritor convidado, pero coa ausencia do mundo editorial. No seminario que aquí presentamos, tratase de inverter esta práctica e darlles a palabra prioritariamente ás escritoras, que dialogarán con críticos e editores sobre as relacións entre a creación, a edición e a crítica.
Galicia e Irlanda comparten fortes lazos culturais e semellanzas sociais que foron obxecto de numerosas investigacións. Ademais de promover as relacións internacionais entre os ámbitos literarios galego e irlandés, este seminario profunda na transformación da tradición literaria provocada pola incorporación de numerosas escritoras aos seus sistemas literarios respectivos nos últimos trinta anos, co conseguinte impacto no mercado editorial e no sector da crítica. Convidouse a dúas poetas irlandesas e a catro poetas galegas, sendo un dos temas de interese o da elección lingüística en comunidades oficialmente bilingües.
Á perspectiva comparatista, internacional e de xénero, engadese o interese por representar espazos diferentes da crítica, reunindo tanto a académica como a xornalística, con obxecto de analizar a súa repercusión na recepción da poesía de mulleres. De igual xeito, participan neste seminario representantes do mundo editorial irlandés (Salmon Publishing) e galego (Xerais) que contan con importantes coleccións de poesía e que se amosaron receptivos á emerxencia de mulleres escritoras. O carácter de “seminario” desta actividade ten como obxecto favorecer os debates entre as persoas que interveñen, así coma co público asistente. Ademais dos relatorios e os debates, terán lugar dous recitais de poesía co obxecto de favorecer o encontro e coñecemento mutuo das poetas galegas e irlandesas.
Participarán Celia de Fréine, Kerry Hardie, Jessie Lendennie, Irene Gilsenan-Nordin, Marilar Aleixandre, María Lado, Xiana Arias Rego, Fran Alonso, Ramón Nicolás, María do Cebreiro Rábade e Luz Pichel.
(Gabinete de Comunicación da AELG)
I Xornada de literatura oral: “A figura do demo na literatura de tradición oral”
O 17 de outubro de 2008 terá lugar no salón de actos da Deputación de Lugo (Rúa San Marcos, 8) a I Xornada de Literatura Oral (ver programa), organizada pola AELG coa colaboración coa Deputación Provincial de Lugo. Baixo o epígrafe “A figura do demo na literatura de tradición oral”, a coordinación estará a cargo de Isidro Novo (vogal da AELG por Lugo) e Antonio Reigosa (vogal de Literatura de tradición oral).
A Asociación de Escritores en Lingua Galega comeza así unha iniciativa que pretende darlle a importancia que merece a esta parte fundamental da nosa literatura. Como actividade complementaria á celebración da xornada, na sala de exposicións da Deputación poderá visitarse a mostra “Libros do demo: grimorios e ciprianillos”.
Comunicado da AELG no pasamento de Ramiro Fonte
A Asociación de Escritores en Lingua Galega lamenta profundamente a grande perda do escritor e amigo Ramiro Fonte Crespo, vulto indiscutíbel da literatura galega actual cuxa obra pasará sen dúbida a ser considerada un fito histórico da cultura contemporánea.
A AELG desexa tamén manifestar a súa vontade de promover unha homenaxe nacional ao escritor de Pontedeume, coa intención de recoñecer publicamente os seus incalculábeis valores humano e literario. En breve informaremos de lugar e data.
(Consello directivo da AELG)
