Desde Galaxia:
“Reunido en Pontevedra o 6 de xuño, o xurado da VII edición do Premio «O Garaxe Hermético» de Banda Deseñada, integrado por Kiko da Silva, debuxante e responsable do Garaxe Hermético; Teresa Valero, debuxante; e Marcos Calveiro, director de Edicións Galaxia, acordou por unanimidade conceder o galardón á obra Merlín e familia, adaptación da obra homónima de Álvaro Cunqueiro presentada baixo o pseudónimo de Pardal. Unha vez aberta a plica, resultou ser autora da proposta Kim Puime.
O xurado destacou que se trata dunha adaptación á banda deseñada moi fiel ao espírito da obra orixinal, mais ao tempo profundamente persoal e innovadora. Valorou especialmente o equilibrio entre texto e imaxe, a forza expresiva do relato, o seu grafismo contemporáneo con ecos da estética románica e a reinterpretación da mitoloxía desde unha perspectiva propia, capaz de actualizar o clásico e facelo dialogar co lectorado actual.
Debido á alta calidade das obras presentadas, o xurado decidiu tamén distinguir como finalista o proxecto Alfa, presentado baixo o pseudónimo de Xinchi e que, tras a apertura da plica, resultou ser obra de Xian Caamaño Caramés.
Sobre Alfa, o xurado salientou o seu debuxo de filiación cartoon, expresivo e cheo de matices, o uso coidado da cor ao servizo da narración, as composicións de páxina dinámicas e imaxinativas e a reflexión crítica sobre as novas masculinidades que desenvolve a través dunha historia con estrutura de fábula.
A entrega dos premios celebrarase o 27 de xuño, dentro das actividades da IV edición do Festival BDra Gráfica, en Pontevedra. Ambas as obras serán publicadas por Galaxia ao longo do ano 2027, dentro das coleccións Novela Gráfica e BD, respectivamente.
Kim Puime, residente en Pontevedra, é alumna do Garaxe Hermético, finalista do premio de fin de curso de 2019 da escola profesional e creadora do fanzine a catro mans Corpos.
Xian Caamaño Caramés, tamén residente en Pontevedra, é graduado en Belas Artes e alumno do Garaxe Hermético. Ademais, un cartel da súa autoría resultou gañador do concurso do Entroido de Pontevedra.”
Arquivo da categoría: Premios B-D: ditames
‘Maré’ e ‘Narices!’ gañan o XX Premio Castelao de Banda Deseñada da Deputación
Desde a Deputación da Coruña (fotografía da propia Deputación):
“A área de cultura da Deputación da Coruña vén de facer pública a decisión do xurado do XX Premio Castelao de Banda Deseñada, un certame que cada ano reafirma o compromiso da institución co apoio á creación artística e á posta en valor do talento literario e gráfico, tanto no ámbito xeral como na literatura infantil e xuvenil (LIX). Ambas categorías están dotadas cun premio de 6.500 euros para a obra gañadora.
Na modalidade xeral, a obra galardoada foi Maré, un proxecto de Manuel Barreiro Rozados e Elías Oliver Taño. O xurado destacou a potencia e o impacto da súa proposta gráfica, que, cun estilo singular, evoca o imaxinario da clase obreira e do mundo mariñeiro, ofrecendo unha narrativa visual profundamente coherente co relato que sustenta o proxecto.
Pola súa parte, na modalidade LIX, a obra premiada foi Narices!, da autora Giovanna Lopalco. A decisión foi unánime, e o xurado quixo salientar a orixinalidade do proxecto, o seu estilo fresco e persoal, así como o seu carácter dinámico e lúdico. Narices! propón unha experiencia de xogo que, ademais de entreter, amosa un gran potencial de futuro no ámbito da literatura xuvenil.
A decisión foi tomada polo xurado reunido no Pazo Provincial o 7 de xullo, baixo a presidencia de Natividade González, deputada de cultura, e coa participación das gañadoras da anterior edición, Sandra Lodi e Laura Suárez Fernández, e de especialistas do ámbito cultural: Tomás Guerreiro García, Sara Prieto Puy e Pablo Prado Fernández. A presidenta agradeceu “a implicación das persoas integrantes do xurado” e sinalou que, por criterio de obxectividade, decidiu non participar no debate nin facer uso do seu dereito ao voto. (…)”
Laura Suárez e Sandra Lodi gañan o XIX Premio Castelao de banda deseñada
Desde a Deputación da Coruña:
“Laura Suárez (Dumbría, 1994), co álbum A raíña cádaver, na categoría para público infantil e xuvenil, e Sandra Lodi (Lugo, 1994), coa obra Adelina, en categoría xeral, son as gañadoras do XIX Premio Castelao de banda deseñada, convocado pola Deputación da Coruña e ao que se presentaron 18 orixinais nesta edición.
A deputada de Cultura, Natividade González, presidiu o xurado formado polas e os debuxantes e ilustradores Paula Mayor e Cristian F. Caruncho, gañadores do certame en 2023, Quico Pèrez, Paula Cheshire e Xulia Vicente.
D’A raíña cadáver o xurado puxo en valor “o acabado completamente profesional cun estilo propio moi persoal, e o dominio das formas e da cor”. Tamén salientou “a gráfica moi adecuada para a historia que propón, de influencia medieval”.
Establecida en Cee, Laura Suárez estudou Belas Artes na Universidad Politécnica de Valencia e expuxo as súas ilustracións en Barcelona e México. Xunto á editorial londinense Flying Eye Books creou e ilustrou a súa primeira serie de cómic infantil, titulada Monster Support Group.
De Adelina o comité avaliador valorou “o acabado solvente da obra cunha gráfica moi expresiva e recursos desenfadados que aborda o tema da vellez con frescura, humor, critica social, moita acción e diversión”.
Sandra Lodi, establecida en Santiago de Compostela, é licenciada en Belas Artes pola Universidade de Salamanca na especialidade de pintura, época na que tamén tivo a oportunidade de coñecer o método de produción creativa da Accademia di Bele Arti di Brera (Milán). Traballou como directora de arte e deseñadora gráfica durante anos, realizando traballos para todo tipo de marcas nacionais e internacionais. Actualmente publica as súas ilustracións na revista satírica Mongolia e en El Estafador, ademais de colaborar con distintas publicacións como ilustradora de prensa.
No ano 2019 recibiu o 20 Premio Curuxa de Humor gráfico, no 2021 foi seleccionada na XIII Bienal de Pintura Eixo Atlántico, no 2022 levou o 10 Premio no Combate Mural do Culturbán, en Lugo, e no 2023 acadou o 10 Premio de Pintura Rápida do Festival de Cans.
As gañadoras verán publicada en 2025 as obras que presentaron ao certame e recibirán cada unha premio en metálico de 6500 euros.”
Acta do fallo do I Premio Autobán ao mellor fanzine galego 2024
Idol, de Alba Chane e Ene, gaña o V Premio de Banda Deseñada O Garaxe Hermético
Paula Mayor Agrelo e Cristian F. Caruncho gañan o XVIII Premio Castelao de Banda Deseñada convocado pola Deputación da Coruña
Desde a Deputación da Coruña:
“O XVIII Premio Castelao de Banda Deseñada da Deputación da Coruña xa ten gañadora e gañador. Na reunión do xurado, resultou seleccionada na modalidade xeral a obra Rosalía Oculta, da autoría de Paula Mayor Agrelo, mentres que na modalidade LIX foi elixida a obra O día de San Martiño, de Cristian F. Caruncho.
Nesta edición o xurado estivo composto por ilustradoras e ilustradores cunha recoñecida traxectoria na creación de banda deseñada como David Rubín, Emma Ríos, Anabel Colazo e os gañadores do ano pasado Siqi Luis Yang e Uxía Larrosa.
Da obra Rosalía Oculta, o xurado salientou a súa orixinalidade á hora de abordar un xénero como o biográfico escapando do relato histórico para poñer o foco na parte humana da icona literaria. Os membros do xurado tamén valoraron positivamente a estética “moi delicada que casa perfectamente co espirito romántico e decimonónico da obra de Rosalía de Castro”.
Mentres, da obra O día de San Martiño, o xurado subliña que o rural galego é o latemotiv da obra escollendo o western e o manga como soportes para achegalo a unha ampla audiencia, abordando a mestura de xéneros dun xeito honesto e maduro. Tamén puxeron en valor “o debuxo e a narrativa moi ben executados e o descaro divertido que enlaza moi ben todos os xéneros dentro da cultura pop”.
Cada un dos premios está dotado con 6.500 euros, ademais da publicación das obras.”
Ánxel Carramal Fernández gaña o IV Premio de Banda Deseñada O Garaxe Hermético coa obra O caderno de rama
O premio de Banda Deseñada O Garaxe Hermético 2021 recae en Fonso Barreiro
Desde Nós Diario:
“O xurado da terceira edición do Premio de Banda Deseñada O Garaxe Hermético comunicou na tarde desta terza feira, 4 de xaneiro, que Fonso Barreiro resultou gañador coa súa obra Cósmico, o bombeiro galáctico.
A obra foi elixida polo xurado -formado por Miguel Porto, Fernando Iglesias (Kohell), Fernando Llor, Kiko da Silva, Anaír Rodríguez e Fran Alonso– por ser “unha aventura que fala, de forma máis divertida que didáctica, do coidado e a natureza”.
Neste sentido, ademais de considerar que a Galiza “por desgraza precisa desta clase de heroes”, falan do “peculiar bombeiro extraterrícola” ao que se lle poden atopas ligazóns con “algúns personaxes míticos do anime e o manga”.
O libro, que será publicado pola editorial Xerais a próxima primavera, presentarase ao público cun estilo cartoon infantil recoñecíbel noutras obras do creador, coñecido no mundiño como Fon. O xurado alude, no sei fallo, ás influencias “que van desde Jan até Toriyama”.
O gañador deste ano pertence á primeira promoción de alumnos que se formaron nun curso da escola de O Garaxe Hermético e na actualidade é director das Xornadas de Banda Deseñada do Liceo de Noia. (…)”
Nerea. O príncipe da sorte, de Pablo Prado e Miguel Rojo, gaña o II Premio de Banda Deseñada O Garaxe Hermético
Desde Nós Diario:
“Nerea. O príncipe da sorte, con guión de Miguel Rojo e debuxos de Pablo Prado, resultou gañadora do II Premio de Banda Deseñada O Garaxe Hermético, que publicará Xerais na próxima primavera. O xurado, composto por Miguel Porto, Fernando Iglesias (Kohell) e Kiko da Silva, por parte do Garaxe Hermético, e Anaír Rodríguez e Fran Alonso, en representación de Xerais, salientou a atractiva proposta gráfica da obra a cabalo entre a liña clara franco belga mesturada coa estética cartoon dos actuais debuxos animados.
Así mesmo, destaca o ritmo narrativo da historia e unha composición de páxina dinámica e atractiva.
Nerea, o príncipe da sorte é unha historia de aventuras con doses de humor que conta a historia dunha nena que cae nunha poza e a partir de aí desenvolvese unha historia divertida centrada na prevención da saúde.
Pablo Prado, o debuxante, recibiu o Premio de Fin de Curso do Garaxe Hermético por O derradeiro libro de Emma Olsen, que adapta a BD a novela homónima de Berta Dávila e debuxou Os berros da motocicleta, con guión de Kiko da Silva, que conta a vida da represaliada Josefina Arruti Viaño e foi publicada polo Concello de Pontevedra.
Miguel Rojo, o guionista, exalumno da segunda promoción do Curso Profesional de sábados é colaborador da revista A viñeta de Schrödinger e acaba de rematar a súa primeira novela gráfica que sairá publicada por Retranca a finais de ano.
Esta obra foi creada durante o Confinamento pola pandemia do Covid-19.”
A proba de auga, de Anémona de Río, gaña o I Premio de Banda Deseñada O Garaxe Hermético
