Hoxe, día 7, ás 17:00 horas comezarán as I Xornadas Virtuais de Literatura organizadas pola AELG. Durante os últimos catro mércores do mes de novembro as persoas inscritas poderán seguir desde os seus computadores persoais as conferencias que ao vivo emitirá a Asociación desde a súa nova plataforma educativa. Deste modo, participantes de todo o mundo poderán ter acceso aos contidos que algúns dos máximos especialistas galegos na obra de Xosé María Álvarez Blázquez (próximo homenaxeado no Día das Letras) e Agustín Fernández Paz disponibilizarán por videoconferencia e através de documentación permanente. Entre as actividades figuran videoconferencias ao vivo e residentes, chats cos especialistas, foros de educadores e diversos materiais complementarios para o desenvolvemento teórico-práctico nas aulas dos temas tratados.
Esta iniciativa pioneira na divulgación universal de contidos culturais contará cos traballos de Xavier P. Docampo, Ramón Nicolás, Xosé María Álvarez Cáccamo, Agustín Fernández Paz (que desvelará algunhas das principais chaves creativas da súa obra), Víctor Freixanes, Mercedes Queixas, Óscar Sánchez e Pedro Silva.
Arquivo da categoría: Actividades AELG
Galeusca 2007: o actual Estado “non é garantía para desenvolver as identidades”
«Na útima xornada de Galeusca, o encontro das literaturas de Galicia, Euscadi e Cataluña que se pechou onte en Lugo, denunciouse que “a actual estrutura estatal non é garantía do desenvolvemento das nosas identidades lingüísticas e culturais”. Por iso, consideraron que a nova presidencia europea poderá ofrecer un “novo marco que teña en conta o recoñecemento das nacións e nacións e linguas do Estado”. […]
A un ano do seu 25 aniversario, os escritores reunidos no encontro decidiron “traballar cara á construción dunha entidade xurídica común” para actuar en conxunto. Reafirmaron ademais a necesidade de creación dun “campo de comunicación entre as nosas linguas e literaturas” para as traducións directas que contarán cun espazo en común.
Ademais, denunciaron que logo de vinte anos de existencia dunha Lei de Propiedade Intelectual, “non teñen producido os avances mínimos desexables no referente á protección dos Dereito de Autor, polo que instamos aos diversos niveis administrativos o seu apoio para estas reivindicacións permanentes do sector”.» (Galicia-Hoxe)
Escritores-as na Universidade: II ciclo de conferencias
O día 31 de outubro ás 12:30 falará Lois Diéguez na Facultade de Filoloxía da Coruña.
Mañá terá lugar en Santiago a I Xornada da Crítica Galega
Mañá, 21 de setembro, nas instalacións do Consello da Cultura Galega, terá lugar a I Xornada da Crítica Galega.
«A I Xornada da Crítica Galega, unha iniciativa que a Aelg, a través da súa Sección de Crítica, bota a andar este ano coa colaboración do Consello da Cultura Galega co obxectivo de crear un foro de reflexión sobre a crítica literaria, tan importante para a normalización do noso sistema literario.
Foi concibida como un primeiro encontro entre profesionais diversos do mundo da crítica para iniciar unha reflexión acerca da situación da crítica literaria en Galicia nas súas diferentes manifestacións.
Esta primeira Xornada, dirixida a todas aquelas persoas relacionadas co mundo da crítica literaria e cos escritores en xeral, quere ter en conta a actividade crítica que se está a desenvolver hoxe no marco peninsular, e para iso contará con representantes da crítica galega, catalá, vasca, española e portuguesa.
O encontro ten ademais como obxectivo crear un foro de debate sobre a crítica literaria galega que reúna todas aquelas persoas que a estean a exercer nos diferentes ámbitos, para debateren os seus principais problemas e acadar un maior grao de recoñecemento e profesionalización das súas actividades.
Desenvolverase nas instalacións do Consello, no 2º andar do Pazo de Raxoi (Praza do Obradoiro s/n, Santiago de Compostela)». (Asociación de Escritores en Lingua Galega)
A AELG entrega documentación sobre os escritores á Real Academia Galega
«A Real Academia Galega (RAG) recibe hoxe unha serie de documentos proporcionados pola Asociación de Escritores en Lingua Galega (AELG). Estes documentos consisten en fotos, biografías, mostras de obras, traducións, entrevistas e artigos publicados por ou sobre os escritores, entre outros; e pasarán a formar parte do Centro de Documentación de Escritores Galegos.» (Galicia-Hoxe.com)
I Xornada da Crítica Galega, da AELG
A I Xornada da Crítica, que a Aelg organiza en colaboración co Consello da Cultura Galega, desenvolverase nas instalacións do Consello o día 21 de setembro de 2007. O programa pode consultarse na web da Asociación de Escritores en Lingua Galega.
Cada escritor galego terá a súa propia web
«É un proxecto para o próximo ano, pero os responsables da Asociación de Escritores en Lingua Galega, AELG, teñen nítido o obxectivo: cada escritor galego que forme parte da entidade contará coa súa propia páxina web. Explicábao onte o presidente deste colectivo, Cesáreo Sánchez Iglesias , que valoraba moi positivamente o posible acordo entre Google e a editorial Galaxia para aumentar a presenza da literatura galega na Rede.
En sentido similar pronunciábase Luis González Tosar, presidente do PEN Club de Galicia: “Iso é magnífico porque cantas máis canles de expresión existan mellor será; está moi ben que florezan colectivos dá cultura que amosen vos seus traballos como vos escritores, vos ilustradores, vos libreiros ou vos críticos, porque iso favorece ou pluralismo e xa sábese que todo ou que sexa uniformar é negativo, ou dous uniformes é para ou exército”. O PEN Club dispón dunha web que está a ser reformada, “bo, practicamente está facéndoa de novo Gonzalo Navaza e ou secretario técnico e, lóxicamente, estará conectada ao PEN Internacional porque a nosa misión é a proxección exterior dá literatura galega”.
A Biblioteca Virtual, pioneira
Sánchez Iglesias recordou que a AELG dispón desde fai algo máis de dous anos dunha páxina web na que se inclúen textos orixinais dos escritores, nun apartado denominado Centro de Documentación, ademais dun espazo didáctico e unha editorial virtual para novos autores, AELG Edicións. O obxectivo para o próximo ano é que, ademais de seguir filmando imaxes dos autores e colgándoas na Rede, cada un dos máis de douscentos escritores que forman parte da asociación conten coa súa propia páxina web.
Outro aspecto que recordou é a colaboración que desde a web actual manteñen coa Biblioteca Virtual da Universidade da Coruña que foi pioneira hai unha década á hora de levar á Rede a literatura galega. Os responsables desta biblioteca traballan desde hai algún tempo para dar un novo impulso á mesma, que segue sendo un referente na divulgación da literatura galega na Rede.
Camilo Franco, primeiro escritor galego que escribiu en liña os textos de Por conto alleo destaca que a presenza das obras na Rede fan un bo labor divulgadora “pero á xente aínda lle custa ler na pantalla, fáltalle ou hábito”.» (La Voz de Galicia.es)
A AELG entrega a súa “Letra E” ao dramaturgo Manuel Lourenzo
“Os actos de homenaxe, que nos levarán a este val da Mariña de Lugo, terán lugar o domingo 8 de xullo, a partir das 11:30 da mañá e conforme o programa de actos que se pode ver aquí. […] A filosofía da homenaxe é a de honrar escritores e escritoras cunha dilatada carreira literaria que suscite o consenso de todos en canto á súa valía. Quere ser unha homenaxe que goce da presenza do homenaxeado/a contando coa súa implicación persoal durante a organización. Busca tamén a complicidade dos veciños e autoridades locais da que o escritor/a considera a súa terra, neste caso o Val do Valadouro, que abarca os concellos de Alfoz e O Valadouro.” (AELG)
Posta en valor das casas de autores e autoras
Asinado convenio entre a AELG e o Consello da Cultura Galega
O Consello da Cultura Galega (CCG) e a Asociación de Escritores en Lingua Galega (AELG) asinaron onte un protocolo de colaboración institucional no que se comprometen a fomentar a creación de literatura na lingua do país e a difundir o seu coñecemento dentro e fóra das fronteiras autonómicas.
Os presidentes de ambas as dúas institucións, Cesáreo Sánchez Iglesias, da AELG, e Ramón Villares, do Consello da Cultura, asinaron onte en Santiago este documento, no que plasman os mecanismos polos que colaborarán nun futuro para “fomentar o intercambio de experiencias no ámbito da escrita, a docencia da escrita literaria ou científica, histórica, etc., a investigación e a promoción cultural”.
Entre outras cousas, o CCG e a AELG colaborarán na organización dunha serie de xornadas de debate sobre os textos de creación literaria, crítica e científica en galego, no deseño de obradoiros literarios destinados á sociedade galega, así como en actividades para vencellar as letras galegas e outras literaturas do mundo. Ao mesmo tempo, as entidades colaborarán na consolidación das súas respectivas webs, co establecemento de relacións de comunicación e de servizos destinados ó público. (AELG)
