Arquivo da categoría: Actividades AELG

Letras novas promociona as novas creacións

Publicado o por

«O volume presentarase o vindero venres día 4 ás 12 horas na sede de Vicepresidencia da Xunta, coa presenza do director xeral de Xuventude, Rubén Cela; do presidente da Asociación de Escritores en Lingua Galega (AELG), Cesáreo Sánchez, e da vicepresidenta da asociación, Antía Otero.

O xornal, editado pola Dirección Xeral de Xuventude e que xa vai polos 20 números, deixa un espazo para a nova creación literaria na sección Letras Novas, froito da colaboración coa Asociación de Escritores en Lingua Galega. Nela conviven os escritores máis noveis e outros máis representativos das últimas décadas na literatura galega. […]» (Galicia-Hoxe)

Homenaxe “Os Bos e Xenerosos” á AS-PG

Publicado o por

Debido a obrigas profesionais inaprazábeis por parte da organización, participantes e asistentes, a Aelg vese na inevitábel obriga de adiar para o SÁBADO DÍA 12 DE ABRIL a Homenaxe “Os Bos e Xenerosos” que se lle ía ofrecer á Asociación Socio-Pedagóxica Galega o 29 de marzo próximo.
Por tanto, o acto de recoñecemento público desenvolverase co mesmo programa o SÁBADO 12 de ABRIL, a partir das 11:45 da mañá, no Auditorio do Centro Galego de Arte Contemporánea de Santiago de Compostela (Rúa Valle Inclán, s/n).
Desta maneira, alárgase tamén o prazo para se apuntar para o xantar de confraternidade que que compartiremos no restaurante do Hotel Porta do Camiño (Rúa Miguel Ferro Caaveiro, s/n), a partir das 14:30. Podedes confirmar a vosa asistencia ata o 8 de abril en oficina@aelg.org ou no
teléfono 981 133 233, de 09:00 a 14:30 ou de 17:00 a 20:00. O prezo do menú, que se pagará no propio restaurante, será de 28€.

Nancy Morejón, “Escritora Galega Universal”

Publicado o por

[kml_flashembed movie="http://www.youtube.com/v/Tr6B6vwMwjc" width="425" height="350" wmode="transparent" /]

«O presidente da Asociación de Escritores en Lingua Galega, Cesáreo Sánchez Iglesias, entregoulle este luns na Habana o premio á poeta cubana Nancy Morejón. […]
Mutismos (1962), Amor, ciudad atribuída (1964), Richard trajo su flauta (1967), Parajes de una época (1979), Octubre imprescindible (1983), ou Cuaderno de Granada (1984), son algunhas das súas obras. Morejón participará na Cea das Letras que a AELG organiza anualmente, e onde se lles entregarán tamén os premios que a Asociación outorgou a Xosé Vázquez Pintor, á Asociación Socio-Pedagóxica Galega (AS-PG) e mais á Mostra de Teatro de Ribadavia.» (A Nosa Terra)

A AELG promove un libro sobre a cidade da Coruña

Publicado o por

Con motivo da celebración do 800 aniversario da cidade da Coruña, e en colaboración coa Concellaría de Cultura do Concello da Coruña, a Asociación de Escritores en Lingua Galega encargarase da elaboración dun libro que será publicado ao longo deste ano.
É por iso que a AELG lanza a proposta de participación aos seus asociados/as, solicitando un texto de creación literaria de non máis dun folio, inédito ou xa publicado, dedicado á cidade da Coruña ou que con ela teña relación.
Os textos poden ser enviados por fax, correo postal ou electrónico aos seguintes enderezos:
AELG
Asociación de Escritores en Lingua Galega
Avda. de Alfonso Molina, s/n.
Edificio de Sindicatos, 8ª planta.
15.008 – A CORUÑA
Tlf/Fax : 981 133 233
oficina@aelg.org

O prazo de recepción dos textos rematará o 30 de marzo de 2008. (AELG)

“Palabras con memoria”, proxecto da AELG para a recuperación de palabras en desuso

Publicado o por

Segue en andamento o proxecto “Palabras con memoria”, que pretende xuntar un banco de palabras en desuso (e polo tanto en perigo de extinción) co afán de recuperalas e poñelas de novo en vixencia e nos dicionarios. En breve habilitaremos un espazo na web da Aelg que facilite a recolla de palabras.
Animámosvos a seguir facendo os vosos envíos ao seguinte enderezo electrónico a cargo do noso vogal por Lugo, Isidro Novo: palabra.con.memoria@aelg.org
Ao enviar a palabra, cómpre facer constancia do seu significado ou significados, así como a zona (ou zonas) onde aínda pode ser escoitada, tamén doutras características que se consideren oportunas para a súa rehabilitación. (AELG)

AELG Editora publica a Revista das Letras do xornal Galicia-Hoxe

Publicado o por

A Asociación de Escritores en Lingua Galega (Aelg) vai publicar na súa editora virtual o suplemento literario “Revista das Letras” do xornal Galicia Hoxe. Os números atrasados do suplemento irán aparecendo ao longo deste ano.
A Aelg, alén de animar incesantemente a escribir, asume o compromiso real de se converter a través da súa editora virtual que as novas tecnoloxías nos ofrece, na difusora da literatura dos nosos creadores/as, en especial daqueles que inician o seu mergullo na arte da palabra, como experiencia lúdica ou con vontade vocacional.
Incrementar a presenza do idioma galego na web, brindarlle aos novos da nosa literatura un medio sinxelo, doado e de grande difusión para se dar a coñecer, ofrecer ao público lector un contorno en que achar literatura de calidade no noso idioma e onde poida coñecer en primicia a obra de novos valores creativos son algúns dos obxectivos primordiais que moveu a asociación a crear a súa editora virtual. (AELG)

Vázquez Pintor recibirá a ‘Letra E’ da Asociación de Escritores en Lingua Galega

Publicado o por

«A Asociación de Escritores en Lingua Galega (AELG) outorgará este ano a sua Letra E a Xosé Vázquez Pintor. Así se aprobou na Asemblea Xeral de Socios que se celebrou en Santiago e na que se presentou unha proposta de actividades para este ano, informou o presidente Cesáreo Sánchez. […]

A Letra E entregarase nun acto de homenaxe que se celebrará en Melide, terra natal do autor, o vindeiro 7 de xuño. Dentro deste acto, o escritor é honrado coa Letra E, coa plantación dunha árbore simbólica elixida polo autor e coa inauguración dun monolito conmemorativo ou dun espazo público co seu nome.» (A Nosa Terra)