Arquivo da categoría: Cinema

O CGAI estrea as producións galegas Entre linguas e Theremin azulexo

Publicado o por

Tráiler de Entre linguas

O Centro Galego de Artes da Imaxe (Rúa Durán Loriga. 10 baixo, A Coruña) estrea hoxe luns día 22 de marzo (20.30 horas) os traballos galegos ENTRE LINGUAS (2010) de Vanessa Vila Verde Lamas, Eduardo Sanches Maragoto e João José Varela Aveledo e THEREMIN AZULEXO (2010) de David Castro Sopeña. Ambos traballos recibiron subvención na última convocatoria de Talento do AGADIC. Vanessa Vila Verde Lamas e David Castro Sopeña estarán presentes para falar delas e ter un encontro co público. A entrada é gratuíta.

A Coruña: o CGAI lembra a figura de Ramón Barreiro

Publicado o por

O libro Ramón Barreiro: humor, parodia e modernidade, coordinado por José Luís Castro de Paz e Xaime Fandiño, será presentado hoxe ás 20:30 no Centro Galego de Artes da Imaxe. A sesión complétase coa proxección do filme El sobrino de don Buffalo Bill, escrito e dirixido por Ramon Barreiro (1906-1981), nacido en Valladolid mais fillo de galego e criado en Pontevedra.

A entrada é gratuíta.

Por fin en galego o libro de memorias de María Casares: Residente privilexiada

Publicado o por

A editorial Trifolium pon estes días nas librerías de todo o país a versión galega de Residente privilexiada, o libro de memorias da actriz María Casares (1922-1996). Nacida na Coruña, María Casares tivo que exiliarse en Francia co seu pai, Santiago Casares Quiroga, tralo levantamento militar fascista de 1936. Ao longo de cinco décadas desenvolveu unha fecunda carreira no teatro; no cinema a súa presenza foi moito menos continuada, mais tivo ocasión de traballar con algúns dos máis grandes directores franceses coma Robert Bresson, Alain Resnais ou Jean Cocteau. O Centro Galego de Artes da Imaxe celebra a publicación da súa memorábel autobiografía e réndelle homenaxe mañá xoves coa proxección do filme Les dames du Bois de Boulogne.

O filme de Margarita Ledo Liste, pronunciado Líster poderá verse por primeira vez na Arxentina

Publicado o por

O filme de Margarita Ledo Liste, pronunciado Líster poderá verse por primeira vez na Arxentina co gallo do X Festival Internacional de Cine de Derechos Humanos (DerHumALC) que terá sitio entre o 8 e o 14 de maio en diversas salas da cidade de Bos Aires. A propia directora do documental, catedrática de Comunicación Audiovisual da Universidade de Santiago e que ven de ser incorporada á Real Academia Galega, estará na capital arxentina ata o sábado 10 de maio para presentar esta, a súa última producción. O filme, de 111 minutos de duración, poderá verse o próximo venres 9 de maio ás 21 no Cine Gaumont da avenida Rivadavia 1635, fronte á praza dos Dous Congresos.

III Simposio Internacional Letras na Raia

Publicado o por

Os días 23 e 24 de novembro celebrarase o III Simposio Internacional Letras na Raia, que co lema “Cinema e Literatura”. Terá lugar no Pazo da Cultura do Concello de Pontevedra.
«Estes encontros naceron para establecer relacións entre os novos/as creadores/as literarios/as das dúas culturas, para (re)coñecérense, compartiren puntos de vista e opinións, creando un diálogo positivo fronte os problemas e situacións comúns. Para iso contamos co patrocinio fundamental da D.X. de Xuventude e Solidariedade.
O simposio deste ano tratará as relacións entre cinema e literatura, cunha conferencia do escritor Xavier Queipo e unha serie de mesas redondas». Ver programa. (AELG)