O martes 26 de febreiro en Portas Ártabras (A Coruña) terá lugar a presentación do libro No pazo de Laiovento. Conversas con Francisco Pillado Maior, de Xosé Luna Sanamartín. Tamén participarán no acto Henrique Rabuñal, Miguel Anxo Fernán-Vello e o propio Francisco Pillado. O libro recolle máis de trinta horas de conversa nas que Pillado fai un balance da súa traxectoria intelectual nos ámbitos da creación, a investigación, a tradución, o teatro, a edición e a vida pública galega.
Arquivo da categoría: Edición
Catalogaranse os fondos sobre Carballo Calero e os irmáns Villar Ponte
Éxito de vendas na Feira do Libro da Habana
A AELG promove un libro sobre a cidade da Coruña
Con motivo da celebración do 800 aniversario da cidade da Coruña, e en colaboración coa Concellaría de Cultura do Concello da Coruña, a Asociación de Escritores en Lingua Galega encargarase da elaboración dun libro que será publicado ao longo deste ano.
É por iso que a AELG lanza a proposta de participación aos seus asociados/as, solicitando un texto de creación literaria de non máis dun folio, inédito ou xa publicado, dedicado á cidade da Coruña ou que con ela teña relación.
Os textos poden ser enviados por fax, correo postal ou electrónico aos seguintes enderezos:
AELG
Asociación de Escritores en Lingua Galega
Avda. de Alfonso Molina, s/n.
Edificio de Sindicatos, 8ª planta.
15.008 – A CORUÑA
Tlf/Fax : 981 133 233
oficina@aelg.org
O prazo de recepción dos textos rematará o 30 de marzo de 2008. (AELG)
Henrique Rabuñal publica unha biografía de Xosé María Álvarez Blázquez
A editorial Laiovento, sumándose á celebración do ano Álvarez Blázquez, publica unha biografía do protagonista das Letras Galegas 2008 da autoría do tamén escritor e profesor Henrique Rabuñal.
O libro, escrito cunha evidente vocación de síntese, repasa todas as etapas vitais, os grandes proxectos intelectuais e o conxunto da obra literaria de Xosé Mª Álvarez Blázquez, da que o libro de Rabuñal achega unha antoloxía con diversos textos, poemas e mesmo un relato íntegro. Por estas razóns ademais de servir para un lector habitual, o libro é unha excelente ferramenta para o mundo do ensino e unha boa introdución para quen queira profundizar nun dos múltiples aspectos que se abordan no libro.
O libro fai fincapé no labor de Álvarez Blázquez como editor e contén unha descrición sumaria pero exhaustiva de todos e cada un dos libros e textos do autor tudense.
Henrique Rabuñal, doutor en Filoloxía Galega e directivo da AELG, xa publicou outras biografías de éxito de importantes figuras da nosa cultura como Manuel Murguía, Xenaro Mariñas, o Padre Sarmiento ou Lugrís Freire.
Chega ás librarías Para dicir abril, Premio Risco de Creación Literaria 2007
«Sotelo Blanco Edicións edita a nova obra narrativa do prolífico escritor de Melide Xosé Vázquez Pintor, “Para dicir abril”, incluída na súa colección Medusa Narrativa. Esta obra, que xa se pode atopar nas librarías, resultou gañadora do Premio Risco de Creación Literaria 2007, certame organizado anualmente pola Fundación Vicente Risco en colaboración co concello de Ourense.» (AGE)
Liquids. Revista de estudos literarios ibéricos
Liquids. Revista de estudos literarios ibéricos trátase dunha revista electrónica semestral que comezou a súa andaina en maio de 2007. Inclúe artigos e recensións, e ocasionalmente tamén un espazo de creación. Está aberta a todas as linguas peninsulares.
A coordinadora da sección galega convida a participar na revista con aportacións preferentes sobre a literatura galega. No seguinte número precisan de unha ou dúas recensións sobre libros de crítica ou investigación, escritos en galego ou sobre a literatura galega. (Liquids)
Número 24 da revista Foeminas
Xa está disponíbel o número 23 da revista foeminas. Para consultala, só é preciso entrar na web da revista.
Presentación de Esteiro de noites falecidas, de Isidro Novo
A Asociación Cultural Círculos Líticos, por medio da súa sección “Lendo libros/Lendo libres”, convida á presentación do libro de poemas de Isidro Novo Esteiro de noites falecidas, que se celebrará o martes 12 de febreiro ás 20 horas no salón de actos da Deputación Provincial. Como vén sendo habitual nas presentacións deste grupo poético, a palabra estará acompañada de son e de imaxe. Nesta ocasión a música virá servida da man de Zbigniew Preisner e Pascal Gaigne, mentres que a imaxe en forma de cómic ad hoc será contribución de Bruno Elerre.
AELG Editora publica a Revista das Letras do xornal Galicia-Hoxe
A Asociación de Escritores en Lingua Galega (Aelg) vai publicar na súa editora virtual o suplemento literario “Revista das Letras” do xornal Galicia Hoxe. Os números atrasados do suplemento irán aparecendo ao longo deste ano.
A Aelg, alén de animar incesantemente a escribir, asume o compromiso real de se converter a través da súa editora virtual que as novas tecnoloxías nos ofrece, na difusora da literatura dos nosos creadores/as, en especial daqueles que inician o seu mergullo na arte da palabra, como experiencia lúdica ou con vontade vocacional.
Incrementar a presenza do idioma galego na web, brindarlle aos novos da nosa literatura un medio sinxelo, doado e de grande difusión para se dar a coñecer, ofrecer ao público lector un contorno en que achar literatura de calidade no noso idioma e onde poida coñecer en primicia a obra de novos valores creativos son algúns dos obxectivos primordiais que moveu a asociación a crear a súa editora virtual. (AELG)
