A coruñesa Chelo Suárez gañou o certame coa súa novela Os Milagres de Cristamar, unha historia “irreverente”, cunha linguaxe elaborada e trasfondo lírico.

Ditame do XXXIII Premio nacional de narracións curtas Modesto R. Figueiredo, da Fundación do Pedrón de Ouro (en colaboración coa Concellería de Cultura do Concello de Ourense):
Primeiro premio:
A caixa da costureira, de Rubén Ceide Martínez, de Lugo.
Segundos premios para:
Esperado regreso, de Alberto E. Aneiros, de Compostela.
Desartellados, de Manuel Quintáns López, de Compostela.
O xurado recomendou a publicación de:
Breve historia do pensamento contaxioso, de Xosé Luís Martínez Pereiro.
O ascensor, de Chelo Suárez Muíños.
Bonaval, de Adolfo Caamaño Vázquez.

O Acto de entrega será o 29 de decembro no Concello de Ourense.

«A obra A choiva do mundo do avogado e profesor de Dereito Xosé Manuel Pacho Blanco, obtivo o XIX Premio de Narrativa Torrente Ballester, convocado pola Deputación da Coruña. O galardón está dotado con 25.000 euros e a publicación da obra premiada.» (Xeración Web)

«O título marca o regreso do autor á literatura de adultos, logo de dedicar ao público máis xuvenil os seus últimos traballos. Trátase dunha novela histórica ambientada no século XVI que percorre diversos espazos da xeografía española.» (La Voz de Galicia)

«Documentalista, tradutora e colaboradora en diversos medios de comunicación, Sumai opina que o momento de confusión arredor da Literatura galega se debe, en grande parte, á rapidez con que a sociedade de consumo galdufra os produtos culturais, non só no panorama editorial senón tamén na televisión ou na plástica. “Vivimos como se o publicado hai dous anos non existise, como se estivese nacendo -en palabras de Borrazás- un Ulises cada ano. Publícase moito e iso é bo para os lectores, porque temos máis onde escoller, pero a oferta é imposible de apreixar. Non hai ningún asesoramento fiable para movernos nesa xungla. Os críticos veñen dicir que todas as obras son estupendas, as editoriais non esixen niveis de calidade e aos autores fáltanos autocrítica”.» (Galicia-Hoxe.com)

«O xurado presidido por Eulogio Fernández Sampayo reunido o 23 de agosto decide “conceder o premio deste II Certame de Novela Curta do Concello do Valadouro a Don Adolfo Caamaño Vázquez, de Pontevedra, baixo o pseudónimo “HANKO”, coa súa obra Un Vulto Suspeitoso, pola introducción efectuada, pola maneira de construir unha historia sobre a base dun tema cotiá como o alcoholismo, polas referencias literarias e históricas así como pola mezcla dun vocabulario, duro propio do tema a tratar, cun léxico culto e logrado así como as estructuras sintácticas logradas”». (Revista Búsola)

“Unha coruñesa de 24 anos, Patricia Casas Vázquez, é a gañadora do 3º Premio Biblos-Pazos de Galicia para menores de 25 anos que se fallou no transcurso dunha cea literaria que se desenvolveu na Casa Grande do Bachao, preto de Santiago, con asistencia dun cento de persoas representativas do mundo literario e cultural galego entre as que se atopaba o director xeral de Creación e Difusión Cultural, Luís Bará.

Licenciada en Dereito e estudante de Filoloxía Hispánica na Universidade da Coruña, a autora ofrécenos en «Vidas entrelazadas» (título provisional da obra galardoada) unha visión do transcorrer da existencia urbana, complexa, dinámica, ás veces caótica e sempre chea de xogos do azar, reflexo de indiferencias e do efémero da maioría das cousas. Son varias historias independentes que teñen en común o marco no que se desenvolven —a cidade da Coruña— e tamén a relación casual que constitúe a alma da propia cidade.

O xurado estivo integrado polo gañador do ano pasado, Alberto Ramos; o xornalista e escritor Camilo Franco; o director literario de Biblos, Tucho Calvo, e a escritora e profesora Helena Villar Janeiro, que ademais de actuar como secretaria será a titora de Patricia Casas no que queda para rematar a súa novela. Segundo pon de manifesto a acta de concesión do premio, o xurado considerou a importancia da «adecuación da novela aos ritmos urbanos e a vontade de atopar formas alternativas de narración que singularizan esta proposta».

O premio apórtalle á gañadora unha escultura de Luís Loureira titulada A peneira dos soños, un ordenador portátil, a estancia ao longo do mes de outubro na Casa Grande do Bachao para ultimar «Vidas entrelazadas» baixo a tutela de Helena Villar e a edición da obra en galego e castelán antes de rematar o ano.

[…] Con Patricia Casas foron finalistas Cristina Ferreiro Real, de Lugo, tamén presente na cea, e Raquel Campos Pico, que aínda que é natural de Santiago reside actualmente en Madrid.” (Premio Biblos-Pazos de Galicia)