Arquivo da categoría: Lingua
O galego é a primeira lingua do estado cun corrector gramatical libre
“O Golfiño, aínda en versión beta, completa as aplicacións lingüísticas do paquete ofimático OpenOffice.org e permítelle ao seu procesador de textos detectar erros de sintaxe, estilo e concordancia, entre outras funcionalidades. Máis de 45.000 galegos contan xa co OpenOffice.org, posto á súa disposición a través da iniciativa de promoción do software libre da Consellería de Innovación e Industria, Mancomun.org.
O Golfiño é un prototipo, que se poñerá a disposición da comunidade para a súa continua mellora no espazo de desenvolvemento colaborativo de software libre do proxecto Mancomun.org, denominado A Forxa. Podedes descargalo para Windows, Mac OS ou GNU/Linux. Tamén está dispoñible un breve FAQ coas principais características do corrector.” (Mancomun.org)
Habanera conmemorativa do centenario do Himno galego n’ A Estrada
O sábado 30 de xuño, ás 21 horas no Teatro Principal da Estrada, terá lugar a estrea da habanera galega Cen anos hai, conmemorativa do Centenario do Himno galego. A interpretación estará o cargo ao cargo da Coral Polifónica Estradense, que actuará acompañada da Agrupación Coral Pazo de Oca e da Coral do Centro Social da Estrada. O texto do libreto repartirase no acto xunto coa partitura. A organización quere lembrar o feito de que “a idea de compoñer unha habanera en galego xurdiu na mesma cidade da Habana, e precisamente no mesmo lugar onde tivera lugar a solemne estrea do Himno Galego.”
30 Millóns para o fomento da lectura
“Máster en lingua e usos profesionais”, na Universidade da Coruña
“O Máster en lingua e usos profesionais forma parte do programa oficial de posgrao Lingua e usos profesionais da Facultade de Filoloxía da Universidade da Coruña. Cursar o máster completo conduce á obtención do título oficial de “Máster en lingua e usos profesionais” na especialidade escollida (español, galego ou inglés). Este título, novo e único en todo o sistema universitario galego, ten validez en toda a Unión Europea. […] Porque o mercado laboral demanda persoas cunha alta cualificación lingüística que saiban actuar en entornos multidisciplinares, posúan habilidades comunicativas, coñezan e manexen linguaxes específicas, dominen o entorno virtual e as novas tecnoloxías, saiban xestionar e organizar a información e poidan crear contidos para calquera medio ou soporte.” (Facultade de Filoloxía – Universidade da Coruña)
200.000 Euros para traducir obras desde e para o galego
“A Consellaría de Cultura destinará este ano 95.700 euros e outros 104.300 o ano que vén para contribuír á tradución de obras literarias galegas a outras linguas e viceversa. […] “As axudas están dirixidas ás editoriais e valoraranse, entre outros criterios, a calidade da obra e o seu interese.” (Consellaría de Cultura e Deporte)
10 premios para proxectos que fomenten o uso do galego no ensino
Asinado convenio entre a AELG e o Consello da Cultura Galega
O Consello da Cultura Galega (CCG) e a Asociación de Escritores en Lingua Galega (AELG) asinaron onte un protocolo de colaboración institucional no que se comprometen a fomentar a creación de literatura na lingua do país e a difundir o seu coñecemento dentro e fóra das fronteiras autonómicas.
Os presidentes de ambas as dúas institucións, Cesáreo Sánchez Iglesias, da AELG, e Ramón Villares, do Consello da Cultura, asinaron onte en Santiago este documento, no que plasman os mecanismos polos que colaborarán nun futuro para “fomentar o intercambio de experiencias no ámbito da escrita, a docencia da escrita literaria ou científica, histórica, etc., a investigación e a promoción cultural”.
Entre outras cousas, o CCG e a AELG colaborarán na organización dunha serie de xornadas de debate sobre os textos de creación literaria, crítica e científica en galego, no deseño de obradoiros literarios destinados á sociedade galega, así como en actividades para vencellar as letras galegas e outras literaturas do mundo. Ao mesmo tempo, as entidades colaborarán na consolidación das súas respectivas webs, co establecemento de relacións de comunicación e de servizos destinados ó público. (AELG)
Iº Curso de verán de Lingua e Cultura Galegas paraestranxeiros da Universidade da Coruña
“O curso terá unha duración de 80 horas lectivas e desenvolverase ao longo do mes de xullo (do 2 ao 27), na Facultade de Filoloxía da Coruña. Este ano ofertaremos só o nivel elemental, isto é, o de iniciación á lingua galega, se ben nos próximos anos ampliaremos a oferta aos niveis superiores.” Máis información no seguinte enderezo:
carme@udc.es
A próxima semana na Galería Sargadelos de Ferrol
O luns día 14 de maio, ás 20:00 horas, terá lugar a conferencia “O galego na Universidade”, a cargo de Xosé Ramón Freixeiro Mato.
O martes día 15 de maio, ás 20:00 horas, terá lugar unha mesa redonda sobre “O libro no mundo editorial galego”, na que intervirán Antón Cortizas, (Tambre-Edelvives) e Miguel Toval (Editorial Embora).
O mércores día 16 de maio, ás 20:00 horas, terá lugar a mesa redonda “O galego nos medios de comunicación”, na que intervirán: Germán Castro (Diario de Ferrol), Xan Morales (Club de Prensa), Uxío Fernández Fernández (Ferrol Hoy), Antía Díaz (Voces de Ferrol de Radio Voz) e Raúl Salgado (Localia TV).
O venres día 18 de maio, ás 20:00 horas, terá lugar un Recital de versos de María Mariño, a cargo de diversos poetas de Ferrolterra.
