Desde a Biblioteca do Porriño:
“Actividade: Obradoiro de escritura creativa
Contido: escritura
¿Para quen?: poboación adulta
¿Cando?: 7, 8, 14 e 15 de xuño, de 18:00 a 20:00 horas.
Inscricións abertas para o “Obradoiro de escritura creativa”. Trátase dun obradoiro intensivo de iniciación á escritura centrada no desenvolvemento da creatividade, a experimentación literaria e o pracer de escribir, co que intentamos darlle un impulso a esas escritoras e escritores que levades dentro. As prazas son limitadas e reducidas (máximo 15 persoas), e destinadas á poboación adulta.
Como o resto dos obradoiros que realizamos, é necesaria a inscrición previa na biblioteca ou chamando ao teléfono 986337624, así como ter a condición de persoa socia da mesma. Trátase dunha actividade gratuita e as prazas cóbrense por orde de inscrición, tendo preferencia as persoas empadroadas no Porriño. As persoas que non sexan do Porriño entrarán nunha lista de agarda.
As datas de realización serán os mércores e xoves do 7, 8, 14 e 15 de xuño, entre as 18:00 e as 20:00 horas. O obradoiro será impartido pola recoñecida escritora Clara do Roxo, escritora e profesora de obradoiros de escritura creativa.
Este obradoiro está enmarcado no ciclo de actividades formativas da Biblioteca do Porriño durante o 2017, con un programa que realza a biblioteca como espazo de aprendizaxe e de inserción social. Coa evolución das TIC, e moi especialmente de internet, as necesidades da cidadanía e da forma na que accedemos á información cambiaron. A web está transformando o papel das bibliotecas tradicionais. Deste xeito, faise necesario reorientar os servizos das bibliotecas públicas, pasando de entedelas só como centros culturais a tratalas tamén como centros sociais.
Neste contexto organízase esta programación en tres vertentes (biblioteca animadora e conservadora dos saberes tradicionais; biblioteca promotora e formadora de novos saberes; biblioteca integradora e difusora de ideas), co fin de que a Biblioteca do Porriño se converta nun espazo de aprendizaxe, encontro e inserción social, e co obxectivo de acreditarse como un servizo de relevancia na sociedade actual.”