Desde o EEI Monte da Guía de Vigo e o CEP Sequelo-Marín:
“”Botando o carro antes que os bois”…poderíamos dicir que así comezou o noso proxecto, Xabarín 18, coa certeza e a ilusión de que non nos ían deixar sen elas a morea de ilustradores que queríamos convidar a participar nel…e así foi!
A ilusión e a confianza segue a latexar no noso equipo, máis aínda logo de vivir a implicación no proxecto non só das nosas pequenas comunidades educativas, senon de outras moitas, da TVG, do MARCO e outros Museos, de Bibliotecas, da Casa da Xuventude, da prensa, das redes sociáis…de todo tedes cumprida información no enlace que vos puxemos ao inicio desta mensaxe.
Neste intre, sentímonos por unha banda na “necesidade” de recoller nun libro o proxecto e as ilustracións (Ramón Trigo, Pepe Carreiro, Kiko da Silva, Carrabouxo, Abraham Carreiro, Carlos Taboada, Buceta…e un longo etc. ata as 21!) que o conforman, tanto por “obriga intelectual” como por gratitude, coa intención de que sexa un agasallo para todos aqueles que o fixeron e fan posible.
E por outra, non queremos que falte outra forma de expresión coa que nós, mestres, e vós, convivimos a cotío, a escrita…así pois, facemos un chamamento á vosa xenerosidade, pedíndovos unha pequena colaboración : un textiño, do xeito, amplitude e contido que vos pareza ben e que fale sobre o que vos poda inspirar o noso benquerido Xabarín. Neste intre, temos xa algunhas colaboracións que nos achegaron “voluntariamente” (Afonso Eiré, Xosé Carlos Caneiro e Miguel Ángel Alonso Diz). Pódense enviar ao correo xabarin18@gmail.com.
Moitísimas grazas xa por adiantado.”