Arquivo da categoría: Edición

A triloxía Evanxélica memoria, de Xavier Alcalá, na Feira do libro da Coruña

Publicado o por

[kml_flashembed movie="http://www.youtube.com/v/lASPAlBSzAk" width="320" height="240" wmode="transparent" /]

A triloxía Evanxélica memoria (Galaxia), composta polas novelas de Xavier Alcalá Entre fronteiras (2004), Nas catacumbas (2005) e Unha falsa luz (2007), foi celebrada polo editor Víctor Freixanes e o crítico literario Alfredo Ferreiro con motivo da Feira do libro da Coruña de 2008. O autor, que había de participar propiciando un coloquio sobre a súa obra, non puido estar presente por motivos persoais; porén, si se puido contar coa testemuña principal do literaturizado na obra, Manuel Molares, quen confirmou a fidelidade do autor co acontecido e relatado por el. (Blogue de Xavier Alcalá)

Henrique Rabuñal publica Poemas coruñeses

Publicado o por

O libro de Henrique Rabuñal que, con portada de Urbano Lugrís, se subtitula “Antoloxía de textos poéticos dos séculos XIX e XX sobre A Coruña”, leva un prólogo do alcalde da Coruña Javier Losada e contén poemas de temática coruñesa de 24 autores contemporáneos; entre eles Rosalía, Curros, Pondal, González Garcés, Luz Pozo, Uxío Novoneyra, César Antonio Molina, Xavier Seoane e Manuel Rivas. Henrique Rabuñal ademais de seleccionar os poemas presenta a biografía dos autores incluídos e mantén na súa obra que nela é cantada “A Coruña burguesa e a obreira, a Coruña das liberdades, a Coruña democrática, todas esas Coruñas que son unha illa núa, unha lingua azul, unha baía e unha patria”. A publicación encádrase dentro das actividades do programa “A Coruña 1208-2008”.

“Entre dous séculos”: III Encontro de Escritores/as Novos/as

Publicado o por

Pazo de MariñánA Asociación de Escritores en Lingua Galega, co apoio da D. X. de Xuventude e Solidariedade, da Deputación da Coruña e da S. X. de Política Lingüística, está organizando para os días 26 e 27 de setembro o III Encontro de Escritores/as Novos/as, no Pazo de Mariñán.

Dáse así continuidade a esta actividade cuxa segunda edición tivo lugar en 2002. Á volta de seis anos é tempo de que, co lema “Entre dous séculos”, teñamos ocasión de revisar a creación máis nova do noso sistema literario, concretamente a daqueles/as autores/as que comezaron a publicar desde os noventa até o día de hoxe. Para isto, prográmanse catro mesas redondas cos seguintes títulos e relatores/as:

-Cartografías literarias no novo século: Oriana Méndez, Mario Regueira, Rubén Ruibal.

-Presenza e invisibilidade das/os escritoras/es na sociedade actual: Iolanda Aldrei, Ana Acuña.

-A literatura. Internet e novas tecnoloxías: Lara Bacelo, Leo Campos, Eduardo Estévez.

-Literatura, sociedade, nación: María Reimóndez, Rafa Villar, Carlos Negro.

Museo de Belas Artes da CoruñaHaberá tamén un recital no Museo de Belas Artes da cidade da Coruña co título xenérico de “Antes mort@s que solemnes”.

A actividade está aberta a todos os asociados/as, aínda que vai enfocada especialmente aos/ás que veñen publicando desde os 90 até a actualidade, e que terán prioridade dado o límite de prazas do Pazo de Mariñán. É por iso que desde xa se abre o prazo para solicitalas, que se estende até o 12 de setembro. De resto, a asignación farase, alén de polo criterio xa citado, por estrita orde de chegada da solicitude a este mesmo mail. A Asociación faise cargo de todos os gastos de estancia.

A Aelg editará un número da súa revista Escrita Contemporánea coas Actas deste encontro. Nelas, ademais das intervencións nas mesas redondas, e co ánimo de ter unha visión máis completa do tema proposto, quérese dar oportunidade a todos os socios/as da Aelg que empezaran a publicar desde os 90 até hoxe, de que nos envíen en forma de texto (4 páxinas de 1800 caracteres como máximo), a súa reflexión persoal de como ven situada a súa persoal traxectoria creadora dentro do sistema literario; a reflexión estenderase tamén a analizar se o concepto de xeración é válido para entender a nova produción literaria, ou se deixou de ter utilidade tendo en conta que as recentes tecnoloxías permiten desenvolver formas de creación, de difusión e colaboración inéditas; así mesmo, as achegas poderán concluír se hai ou non os suficientes elementos novidosos na escrita dos novos/as que permitan caracterizala no seu conxunto. Estas achegas entregaranse neste mesmo mail até o 15 de outubro.

(O Consello Directivo da Aelg)

Novo número da revista dixital Búsola

Publicado o por

O novo número da revista dixital Búsola está dispoñible. Esta publicación, revista de artes, pensamento, ciencia que edita a Casa da Cultura do Concello do Valadouro presenta o nº 3 (4º en total) no que colaboran Olga Castro, Aurora Santos, Manuel Gago, Beatriz Hervella, Olga Osorio, Clara Martín, Noemí López e Xaquín Marín que prologa este novo número.

A memoria que reconstrúe un mundo, de Yanelis Velazco Fajardo, sobre a obra de Xosé Vázquez Pintor

Publicado o por

A memoria que reconstrúe un mundo é o título do libro da profesora de Crítica Literaria na Facultade de Artes e Letras na Universidade da Habana, Yanelis Velazco Fajardo, que fora presentado na Feira Internacional do Libro da capital de Cuba no pasado mes de febreiro. Publicábase así a súa tese sobre unha parte da obra poética do escritor galego Xosé Vázquez Pintor. Este xoves, aproveitando a súa segunda visita a Galicia, a autora compartirá o convívio, coa palabra e obra que nos representa, con Felipe Senén e Xosé Vázquez Pintor. Será unha viaxe pola Literatura de noso, de Cuba a Galicia e viceversa. E tamén unha achega de actualidade á obra do escritor de Melide, que fora honrado no pasado mes de xuño coa Letra E da Asociación de Escritores en Lingua Galega.

Yanelis Velazco Fajardo (Matanzas-1976) colabora en revistas especializadas de Ensaio e Literatura, como “La jiribilla”, “ La letra del escriba” e “ La siempreviva”, onde no seu último número aparece un estudo sobre a novela “Para dicir abril”, editada por Sotelo Blanco e co patrocinio da Fundación Vicente Risco.

Será o día 17 de xullo nas Portas Ártabras-espazo de Cultura de Amigos dos Museos de Galicia (Rúa Sinagoga, 22 – detrás da Colexiata na Cidade Vella da Coruña), ás 20:00.