(Bos Aires, 1 de maio) – Coa intención de abrir un espazo para a voz das mulleres, un sitio no que elas sexan escoitadas e teñan a liberdade de falar de todo canto viven, pensan e sinten, o colectivo de galegas na emigración Herbas de Prata organiza este sábado a segunda xuntanza dos seus obradoiros “Cousas de Mulleres”. A segunda cita será na Asociación Residentes de Vigo o vindeiro sábado 3 de maio ás 15 horas na rúa Quintino Bocayuva 522, da cidade de Bos Aires.
Os obradoiros vivenciais están a percorrer as institucións da colectividade galega en Bos Aires, alí onde cada centro ou asociación abra as súas portas. “Unha vez ao mes abrimos estes faladoiros onde o que buscamos é escoitarnos, é falar do que nos pasa como mulleres, como emigrantes, como nais ou fillas ou avóas ou netas, como traballadoras ou como personas no paro. Falar, ou sexa, do noso vivir como mulleres”, detallaron dende Herbas de Prata.
Ademáis destes obradoiros, Herbas de Prata organiza xunto coa Secretaria Xeral de Igualdade da Xunta o programa de capacitación, de formación, e encontro e reflexión para as mulleres da diáspora galega Tempos de Mulleres, que foi presentado na Delegación Exterior da Xunta de Galicia o pasado luns 28 de abril. Máis información: herbasdeprata@gmail.com (Herbas de prata)
Arquivo da categoría: Internacional
Nancy Morejón recollererá o Premio “Escritora Galega Universal”
Como viñemos informando, a Aelg conta xa estes días coa presenza da escritora cubana Nancy Morejón no noso país, que vén recoller o Premio “Escritora Galega Universal” no marco da Cea das Letras deste sábado 26 de abril.
A Aelg organizou unha conferencia e unha lectura de poemas comentados segundo o seguinte programa:
• Xoves 24 de abril, ás 20,00 horas, conferencia de Nancy Morejón na Fundación Rosalía de Castro, en Padrón, baixo título “Nancy Morejón: a muller na súa obra e na literatura cubana e caribeña”. Estarán presentes a Secretaria Xeral de Igualdade, Carme Adán; a presidenta da Fundación Rosalía de Castro, Helena Villar Janeiro, e a secretaria xeral da AELG, Mercedes Queixas.
• Venres 25 de abril, ás 19,00 horas, Lectura de poemas comentados, baixo título “A beleza de todos os días”, a cargo de Nancy Morejón, no salón de actos do Consello da Cultura Galega. Acompañarán á escritora cubana o presidente da AELG, Cesáreo Sánchez, e Elvira Cienfuegos en representación da Concellaría de Cultura do Concello de Santiago de Compostela .
• Sábado 26 de abril, ás 20,30 horas, entrega dos Premios AELG na Cea das Letras, no Hotel Porta do Camiño de Santiago de Compostela.
Nancy Morejón nace en Cuba en 1944. Aos 18 anos foi incluída na antoloxía Novísima Poesía Cubana, e publica o seu primeiro libro de poemas, Mutismos. La duodécima noche de William Shakespeare. En 1989 asiste como invitada de honra ao 54 Congreso Mundial do Pen Club Internacional en Toronto e Montreal. En 1992 é invitada polo Congreso Nacional de Escritores Sudafricanos (COSAW) e percorre a República Sudafricana, onde ofrece recitais e obradoiros literarios. Asistiu como invitada de honra á III Conferencia de Escritores del Caribe, celebrada en Curazao, así como á V Edición de Carifesta, en Trinidad-Tobago. Entre 1986 e 1993 exerceu como directora do Centro de Estudios del Caribe da Casa de las Américas, función que volve asumir no 2000. Dirixiu a Editorial PM da Fundación Pablo Milanés desde 1993 a 1995, e foi asesora da Dirección do Teatro Nacional de Cuba desde 1995 a 2000. En 1991 foi elixida membro da Academia de Ciencias de Cuba. Conferenciante en institucións de Europa e América.
Entre as súas obras, caben salientar: Richard trajo su flauta y otros argumentos, Nación y mestizaje en Nicolás Guillén, Piedra pulida, Paisaje célebre, Elogio y Paisaje e Poemas 1987-1992. Obtivo numerosos premios, como: Premio de Poesía Rubén Martínez Villena da Universidade da Habana; Mención da Unión Nacional de Escritores y Artistas Cubanos; Premio Nacional de Ensayo Enrique José Varona; Mención no Premio Internacional de Poesía “Pérez Bonalde”; Premio da Crítica Literaria por Piedra Pulida, 1986 e Elogio y Paisaje, 1996, e en 2001 foi Premio Nacional de Literatura. (AELG)
II Curso de verán de lingua e cultura galegas para estranxeiros
Xa está disponíbel a información sobre o II Curso de verán de lingua e cultura galegas para estranxeiros na páxina web do Centro de Linguas da UDC.
II Curso de Verán de Lingua e Cultura Galegas para Estranxeiros da UDC
O Centro de Linguas da Universidade da Coruña, en colaboración co Servizo de Normalización Lingüística da UDC e a Secretaría Xeral de Política Lingüística da Xunta de Galicia, organiza estes cursos de verán de Lingua e Cultura Galegas diríixidos a aquelas persoas que procedan de fóra da Comunidade Autónoma de Galicia e que estean interesadas en se introduciren no estudo da lingua galega, así como en ampliaren os seus coñecementos sobre a cultura galega.
O curso impartirase entre o 1 e o 24 de xullo de 2008. Máis información en breve na web do Centro de Linguas da UDC.
Rectificación: “Estíbaliz Espinosa, novo talento europeo”
Pedimos desculpas pola rectificación que vimos de facer a respecto da noticia de referencia.
Galicia acollerá un centro internacional de Literatura Infantil e Xuvenil
«A Biblioteca Nacional que comezará a funcionar en 2009 na Cidade da Cultura albergará un Centro IBBY de Literatura Infantil e Xuvenil para a Diversidade Cultural. Será o segundo centro que a International Board on Book for Young Peple (IBBY) difunda e promova, despois da creación do primeiro en Oslo (Noruega) en 1985. […]
O centro converterase na primeira biblioteca internacional especializada nas linguas minorizadas ao atesourar todos os fondos da IBBY destas culturas. O principal obxectivo desta instalación será o estudo, a difusión e a promoción dos libros para nenos e mozos das culturas minorizadas para “facelas visibles no mundo”. Para iso, contará cunha ferramenta virtual que permitirá o acceso aos seus contidos dende calquera lugar do mundo. […] »
Rubén Ruibal recibiu en Ferrol o “Premio nacional de literatura dramática”
«Os Premios Nacionais de Literatura do Ministerio de Cultura correspondentes a 2007 distinguiron a Vicente Molina Foix, en Narrativa; Olvido García Valdés, en Poesía; José María González García, en Ensaio; e en Literatura Dramática en Rubén Ruibal. Na categoría de Literatura Infantil e Xuvenil, a distinción recaeu en Jordi Sierra i Fabra; e en Historia de España en Luís Gil Fernández. […]» (Galiciae)
Presentación en Boloña da revista Bloc
O martes 1 de abril de 2008, ás 10:00 horas no Translators Centre (Hall 30, Stand A41) terá lugar a presentación do número 1 de Bloc, revista internacional de arte e literatura infantil, na Feira do Libro Infantil de Bolonia. Participarán: Xabier P. DoCampo (director), Gerardo Domínguez (diseñador) e Teresa Duran (especialista en literatura infantil).
Barcelona: coloquio internacional As relaciónS entre As literaturAs ibÉriCAs
RELIBE
Coloquio internacional sobre as relacións entre as literaturas ibéricas (Barcelona, 18-20 de xuño 2009)
O Grupo de investigación, tradución, recepción e literatura (Universitat Pompeu Fabra) e o Grupo de investigación consolidado TRELIT~Tradución e recepción das literaturas (Universitat de Barcelona) organizan o Coloquio internacional sobre “As relacións entre as literaturas ibéricas, que se celebrará os días 18, 19 e 20 de xuño de 2009 na Facultade de Tradución e Interpretación da Universidade Pompeu Fabra.
O coloquio pretende analisar estas relacións desde unha perspectiva comparada e arredor dos seguintes eixos ou liñas:
· Tradución entre as literaturas ibéricas
· Autotradución (entre linguas ibéricas)
· Presenzas e interaccións entre as literaturas ibéricas
· Recepción comparada da literatura extranxeira nas literaturas ibéricas
· Recepción comparada de literaturas ibéricas nun ámbito literario extranxeiro
Aparte das liñas e eixos enunciados, o Comité científico poderá tomar en consideración outras propostas.
As persoas interesadas en participar no coloquio poden enviar un correo electrónico antes do 31 de maio de 2008 á direción: relibe@upf.edu.
O Comité organizador do coloquio remitirá aos interesados información complementaria a partir do 1 de xuño de 2008.
Outras datas de interese:
30 de setembro de 2008: data límite para o envío de propostas de comunicación segundo as especificacións que se farán públicas coa debida antelación.
2 de novembro de 2008: notificación aos interesados da aceptación da propuesta.
Comité organizador
Enric Gallén: enric.gallen@upf.edu
Francisco Lafarga: lafarga@ub.edu
Luis Pegenaute: luis.pegenaute@upf.edu
Secretaría: relibe@upf.edu
“Lectores galegos en Bos Aires”: ciclo de literatura galega no Café Tortoni
«”Lectores en Bos Aires” comprácese en convidala-o á súa primeira tertulia deste segundo ano de traballo, o vindeiro sábado día 15 de marzo no café Tortoni. Comezaremos a percorrer o universo da literatura policial coa presentación do Ciclo “Dez misterios en clave galega”. A xuntanza celebrarase o sábado 15 de marzo ás 15 na sala Alfonsina Storni do Café Tortoni, na Avenida de Mayo 825 da cidade de Bos Aires.
Confirmar presenza no enderezo lectoresenbosaires@gmail.com
Marzo 2008, Bos Aires, Arxentina»
