Arquivo da categoría: Premios e concursos (outros)

OQO recibe o premio ao Libro Infantil Mellor Editado no Liber de Barcelona

Publicado o por

«A editora pontevedresa OQO recibirá hoxe de mans do ministro de Cultura, César Antonio Molina, o primeiro premio ao Libro Mellor Editado, na categoría de Literatura Infantil por O gran libro dos retratos de animais.
A entrega do premio, fallado o pasado mes de abril en Madrid, desenvolverase no marco da Feira Profesional do Libro Liber de Barcelona e recoñecerá a calidade da edición da obra.
Escrito e ilustrado por Svejetlan Junakovic, o libro inaugurou a colección OQART de arte para nenos. O volume, que conta xa con edicións en galego, castelán e portugués, coñecerá a súa versión ao inglés e ao francés nas vindeiras semanas […].
Outras dúas editoriais galegas foron distinguidas nos últimos Premios Nacionais de Edición que outorga cada ano o Ministerio. Galicia acaparou dous dos tres premios nacionais de edición de libros infantís e xuvenís e obtivo por primeira vez a máxima distinción na cateogría de Libros de arte.
Así, Pucho, o habitador dos tellados, de Manuel Janeiro e editado por Kalandraka, obtivo o terceiro posto dentro da categoría de libro infantil. Pola súa banda, Faktoría K acadou o primeiro premio de Libros de Arte por Animalario: Arte de la India, de Kanchana Arni e Gita Wolf. […]» (Xeración Web)

Manuel Lourenzo recibirá o Premio Celanova, Casa dos Poetas

Publicado o por

«O escritor Henrique Rabuñal fará a laudatio de Manuel Lourenzo durante os actos de entrega a este do Premio Celanova, Casa dos Poetas que terán lugar en Celanova o 2 de setembro organizados pola Fundación Curros Enríquez que preside Antonio Mouriño Villar. Ese día farase unha homenaxe a Celso Emilio Ferreiro e a Curros Enríquez en cuxa Casa, en concreto na Horta da Palabra, terá lugar un xantar co premiado.»

Caixa Galicia abandona o patrocinio dos premios Esquío

Publicado o por

A Fundación Caixa Galicia retira o seu apoio á Sociedad Valle Inclán para a organización dos premios Esquío de poesía. «Caixa Galicia financiou os premios Esquío desde a súa primera edición, no ano 1981. O certame consta de dúas categorías, en lingua castelá e galega, cada unha das cais está dotada con 9.000 euros. Instituíronse ademais, poucos anos despois da primeira convocatoria, un accésit de 1.500 euros en cada un dos apartados.» (Diario de Ferrol)

Isaac Díaz Pardo e Dionisio Pereira, premiados

Publicado o por

«O intelectual Isaac Díaz Pardo declarou que a Medalla de Galiza que lle concedeu a Xunta supón un “fideicomiso” dos “ilustres galeguistas” que “loitaron” por Galiza “sobre todo no exilio” e, por iso, considerou a máxima distinción que outorga a Xunta, a “homenaxe nun vello” ás figuras que durante o século XX defenderon Galiza.» (GZnacion.com)

«A Fundación Alexandre Bóveda, vén de anunciar a entrega do seu premio “Día da Galiza Mártir” á recuperación da memoria, ao historiador Dionisio Pereira. A fundación destaca o “labor investigador e divulgador da represión franquista” de Pereira, “dando a coñecer acontecementos, lugares e nomes que outros quixeron borrar de xeito violento da nosa lembranza, e promovendo a organización de actos de rehabilitación e reparación das vítimas da barbarie fascista”.» (GZnacion.com)

A AELG entrega a súa “Letra E” ao dramaturgo Manuel Lourenzo

Publicado o por

“Os actos de homenaxe, que nos levarán a este val da Mariña de Lugo, terán lugar o domingo 8 de xullo, a partir das 11:30 da mañá e conforme o programa de actos que se pode ver aquí. […] A filosofía da homenaxe é a de honrar escritores e escritoras cunha dilatada carreira literaria que suscite o consenso de todos en canto á súa valía. Quere ser unha homenaxe que goce da presenza do homenaxeado/a contando coa súa implicación persoal durante a organización. Busca tamén a complicidade dos veciños e autoridades locais da que o escritor/a considera a súa terra, neste caso o Val do Valadouro, que abarca os concellos de Alfoz e O Valadouro.” (AELG)