O próximo venres día 28 de abril, ás 20:30 hh., Estaleiro Editora e Proxecto Derriba presentarán, no Centro Social Gomes Gaioso da Coruña (Rúa Marconi, 9) as dúas primeiras monografías da súa colección de pensamento contemporáneo. Para falar deste proxecto de coedición e presentar os seus primeiros resultados participarán no acto Abraham Rubín e Brais Arribas, autores das monografías e membros de Proxecto Derriba, e Iria Sobrino, integrante de Estaleiro editora.
Arquivos da etiqueta: Estaleiro Editora
Estaleiro Editora e Corsárias organizan as I Xornadas Galegas da Edición Independente
Estaleiro Editora e Corsárias organizan as I Xornadas Galegas da Edición Independente. As presentacións, palestras e debates realizaranse na Biblioteca Ánxel Casal de Santiago de Compostela entre o 2 e o 5 de Marzo. Cada jornada constará de dúas sesións diarias, a primeira ás 17h00 e a segunda ás 19h00 da tarde. As I Xornadas Galegas da Edición Independente finalizarán cunha festa chea de música, teatro e sorteos que se celebrará o venres día 5 de Marzo, ás 22h30, no Bar As Dúas.
Descargar programa completo das xornadas: PDF, 77 KB
Santiago: presentación do libro Máquina de Guerra
Mañá día 23 de Xullo de 2009 ás 20:00 presentarase no Centro Social A Gentalha do Pichel (R. Santa Clara 21, Santiago de Compostela) o poemario de Raida Rodríguez Máquina de Guerra que saiu á luz baixo o carimbo de Estaleiro Editora.
Xa presentado anteriormente en Barcelona, cidade en que Raida Rodríguez traballa e estuda, Máquina de Guerra vén traer agora á Galiza un diálogo iniciado na Universidade Autónoma de Barcelona, que continuou no Centre Social Magdalenes da mesma cidade e que tivo un punto e seguido no seu camiñar no Centro Galego de Barcelona.
Como todos os materiais de Estaleiro Editora, este poemario pode descargarse libremente na web e véndese ao económico prezo de seis euros, que se reinvestirán, como é habitual, na edición de outros materiais.
Lugo: actos culturais no Madia Leva!
No Centro Social Madia Leva! de Lugo continúan os actos do Mes da Lingua. Este venres 29 ás 20:30 Bernardo Penabade e Matias Nicieza virán para falaren do modelo de normalización lingüística de Burela. A situación desta vila mariñá é privilexiada. Teñen un plano lingüístico pioneiro no país e o 80% dos seus habitantes falan, de xeito espontáneo, galego. Tamén os inmigrantes, que proceden de catro continentes distintos. Así o quixeron amosar o profesor Bernardo Penabade -membro do equipo redactor do Modelo Aditivo de Política Lingüística Municipal aprobado e aplicado por unanimidade de todas as forzas políticas no Concello de Burela- e o realizador burelao Matías Nicieza, que elaboraron un documentario de 66 minutos de duración, que lle pon imaxes ás voces da realidade burelá. Antes da palestra, proxectarase o documentario Modelo Burela.
Ao día seguinte, o sábado 30, preséntase o proxecto editorial de Estaleiro. Os obxectivos desta editora son a difusión de pensamento crítico, o traballo sen subsidios, o copyleft e a liberdade normativa. O libro que innagura a colección de ensaio é A revolução pendente. Democracia e feminismo de Carlos Diegues. O autor estará presente para falar deste libro que, segundo as súas palabras, pretende ser “uma contribuição para a construção de uma alternativa política coerente e global, crítica com um processo globalizador que castiga de maneira especial as mulheres, em forma de violência, de exclusão da cidadania plena e de feminização da pobreza”.
Barcelona: actividades de Estaleiro Editora
Entre o días 22 e 25 de abril Estaleiro Editora desenvolverá unha axenda de actividades en Barcelona para dar a coñecer o seu proxecto de edición alternativa e independente a través do poemario Máquina de guerra, primeiro libro da autora galega e residente en Barcelona Raida Rodríguez. O 22 de abril ás 16:30 o portavoz da editora Carlos G. Figueiras compartirá mesa con Raida Rodríguez Mosquera na Facultat de Lletres da Universitat Autònoma, nun acto organizado polo Lectorado de Galego da devandita universidade. Dous días despois, o 24 de abril, Estaleiro levará o seu proxecto ao Espai Social Magdalenes, onde trala presentación de Máquina de guerra ás 19:30 comezará un recital galego–catalán aberto ás persoas interesadas. Este segundo acto está organizado polo Espai Gallec dels Països Catalans. O último evento desta intensa axenda terá lugar ao día seguinte, 25 de abril, ás 18:00 no Centro Galego de Barcelona .
Máquina de guerra dá continuidade a unha enérxica actividade literaria desenvolvida por Raida Rodríguez en revistas, en recitais e na rede, espazo en que a autora mantén o blogue Punto de fuga. Máquina de guerra pretende dar conta das ameazas que atinxen a condición humana na contemporaneidade e desenvolve, neste sentido, unha acción reflexiva e rebelde que aspira a cuestionar e repensar as grandes categorías do pensamento e da acción política, sexa o xénero, a nación, a lingua, o poder ou a memoria. Como o resto de obras lanzadas por Estaleiro poderá ser descargada libremente na páxina web da editorial.
Estaleiro: convocatoria para a cultura libre
A editorial independente galega Estaleiro Editora celebrará, o próximo mércores 17 de decembro a primeira edición de fESTALEIRO, festa por unha cultura libre. A festa celebrarase no pub Tarasca de Santiago de Compostela (R. Entremuros 13) dende as 22:00 h.
A entrada á festa é gatuíta e haberá sorteos de livros de Estaleiro Editora e de outras editoras independentes, discos editados sob licencias libres e outro material. A festa contará coas actuacións dos grupos The Name e Ataque Escampe. A banda de rock de serie B celebra tamén, con este concerto, a despedida da súa exitosa xira “A invención da pólvora”. Estaleiro Editora pretende, con este acto, divulgar diferentes manifestacións artísticas do ámbito da cultura libre e a creación de espacios en que difundir o seus materiais, alternativos ao circuito oficial da literatura e do pensamento subsidiados.
Lembramos que, coa intención de fomentar o consumo dos seus produtos culturais, o estaleiro coloca todos os seus produtos no seu web, www.estaleiroeditora.org, para descarga libre e gratuíta.
