A última creación de Eduardo Estévez na rede leva por título esca e pedra, e está albergada no espazo virtual culturagalega.org. Consiste na elaboración dun poema cada semana a partir dun tema xurdido aleatoriamente: «Cada semana accedo á galipedia, premo en “páxina aleatoria” e a partir do artigo que saia, escribo un poema. Así trinta veces. Trinta semanas. Trinta poemas.» (esca e pedra)
Arquivos mensuais: Novembro 2008
Aumenta substancialmente a contratación de teatro galego
«Valencia, Madrid, Castela e León, Castela A Mancha, Murcia, Euskadi, Aragón e Cataluña así como as localidades portuguesas de Estarreja, Moita e Porto programarán nos vindeiros meses un total de 143 funcións de teatro e danza galegas. Este é un dos froitos acadados na Feira Galega das Artes Escénicas 2008, recentemente pechada cun balance moi positivo.» (A Nosa Terra)
Ignácio Loyola Brandão e Laurentino Gomes reciben o Jabuti
«O premio máis tradicional da literatura brasileira, con 50 anos de andaina, premiou na noite do 31 de outubro dous xornalistas nas dúas categorías máis destacadas do certame, mellor libro de ficción e de non ficción, respectivamente.» (A Nosa Terra)
Sarria: presentación do IX Premio de Poesía Fiz Vergara Vilariño
«A Agrupación Cultural Ergueitos e a Concellaría de Cultura do Concello de Sárria presentan a convocatoria da 9ª edición do Premio de Poesía Fiz Vergara Vilariño. O próximo sábado 8 de novembro, ás 12:30 horas, no Salón de Plenos do Concello de Sárria presentaremos os dípticos coas bases desta 9ª edición, que serán distribuídos por toda Galicia e polos centros galegos do exterior. Este ano contamos cun novo deseño gráfico que agardamos contribúa a difundir un dos premios de poesía con máis prestixio de Galicia.» (A. C. Ergueitos – Sárria)
Nace unha asociación para erradicar os significados pexorativos do dicionario da Real Academia Española
Naceu en Compostela a “Asociación Cultural Garipano”, co propósito firme de «conseguir erradicar os significados incompletos e pexorativos que se poden observar sobre o termo “gallego” no dicionario da RAE (Real Academia Española). Segundo esta Academia, o termo “gallego” significa:
1. adj. Natural de Galicia. U. t. c. s.
2. adj. Perteneciente o relativo a esta comunidad autónoma de España.
3. adj. En Castilla, se dice del viento cauro o noroeste, que viene de la parte de Galicia. U. t. c. s.
4. adj. Ant., Arg., Col. y Ur. Dicho de una persona: Nacida en España o de ascendencia española. U. t. c. s.
5. adj. C. Rica. tonto (‖ falto de entendimiento o razón).
6. adj. El Salv. tartamudo.
7. m. Lengua de los gallegos.
8. m. C. Rica y Nic. Especie de lagartija crestada que vive en las orillas de los ríos y nada con mucha rapidez.
9. m. C. Rica.libélula.
10. m. Cuba y P. Rico. Ave palmípeda de plumaje ceniciento, rabadilla, vientre y cola blancos, patas, pico y párpados rojizos.
11. m. Cuba. En un ingenio, dispositivo que aplana y nivela la caña antes de ser molida.
Despois de moita investigación e tempo dedicados a contactar coas Academias de América do Sur, descubrimos que os significados de “tonto” e “tartamudo” son irreais tal e como os amosa a Academia. Cremos como asociación que níngunha comunidade de persoas merece ser abafallada en ningún lugar e moito menos nunha obra académica de tal “prestixio”. Por outra banda pedimos que a definición da lingua galega se realice como é debido tal e como fan no mesmo dicionario coa definición de línguas coma “Catalán” ou “Euskera” ou “Vasco”.
Ademais, cremos que no caso do galego tamén se debe indicar que é unha língua romance e que Galicia foi un Reino independente, como se fai referencia por exemplo co “Catalán”.
Ademais, cremos que esta definición debería establecerse nunha segunda ou como moito nunha terceira acepción e non nunha sétima como aparece até o momento.
Para conseguirmos estes propósitos, estamos realizando unha recollida de sinaturas masiva a través da nosa páxina web.» (Asociación Cultural Garipano)
Vilalba: Xosé Neira Vilas e Anisia Miranda, “chairegos de honra “
O 15 de novembro de 2008, en Vilalba ás 12:00, terá lugar unha táboa redonda coa participación de:
• Antía Cal
• Marica Campo
• Isaac Díaz Pardo
• David Otero
• Ramón Regueira
Despois celebrarase un xantar de Irmandade na NOVA RUTA de Vilalba. O evento será amenizado cun concerto de A Quenlla.
Para apuntarse ao xantar ou máis información: 646 41 38 90 e xermolos@xermolos.org
(Asociación Cultural Xérmolos)
Valencia: os encontros GALEUSCA chegan á súa XXV edición
(A Coruña, 5 novembro 2008).- Mañá xoves día 6 de novembro, no vóo que sae de Lavacolla ás 21,20 horas, sairá en dirección a Valencia a delegación galega que participará na XXV edición de Galeusca.
Organizada pola asociación de escritores en lingua catalana, os encontros Galeusca chegan á súa XXV edición, a celebrar no País Valenciano, nas localidades de Valencia e Sueca. Celebraranse en Valencia e Sueca do 7 ao 9 de novembro de 2008.
Homenaxe a Ramiro Fonte na II Bienal Literaria “De Pedra e de Palabra”
«O acto de clausura da II Bienal Literaria ‘De Pedra e de Palabra’ do Pen Clube, completouse cunha homenaxe ao recentemente falecido Ramiro Fonte. Seis poetas, amigos e algúns deles moi próximos xeracionalmente a Fonte, participaron nun recital, presentado por Luciano Rodríguez. A homenaxe consistiu na lectura, a cargo de cada un dos participantes, dun poema do autor eumés, e doutro texto propio.
Ana Romaní, Anxo Angueira, Xavier Seoane, Salvador García-Bodaño, Xosé María Álvarez Cáccamo e Gonzalo Navaza foron os participantes nun acto emocionante que ademais coincidiu no día en que se coñecera a nova da morte de Anxo Rei Ballesteros. […]» (Vieiros)
Ana Romaní recibe o premio dos editores cataláns á mellor xornalista de radio
«O Gremio de Editores de Catalunya fixo entrega, no transcurso da XXIII Nit de l’Edició que se celebrou onte no Hotel Arts de Barcelona, os seus premios Atlàntida, que nesta ocasión recaeron no presidente do Goberno, José Luis Rodríguez Zapatero, e a Comisión de Cultura do Congreso dos Deputados; no xornal “El País”; no programa de TV2 “Página 2”; na publicación electrónica “Vilaweb”; e na xornalista e escritora galega Ana Romaní, directora do programa “Diario Cultural” da Radio Galega. [..]» (AGE)
Ferrol: clausura da campaña “Cantar e contar”
A campaña de fomento da lingua galega “Cantar e contar: ler na nosa lingua” que se celebra no Centro Cultural Carvalho Calero de Ferrol, organizada pola Secretaría Xeral de Política Lingüística e a editorial Kalandraka, chegará hoxe ao seu remate cunha sesión especial de contos e música dirixida ao público familiar, a partir das 18:30. (Kalandraka)
