A galeria de arte Dosmilvacas. a r t e (Avda. de Astorga, nº 7 bajo, Ponferrada) inaugura este venres 15 de xuño ás 21:30 horas a mostra colectiva “alimentARTE. Encuentro artístico literario y gastronómico”. Participan nela preto de 30 artistas e ofrece unha visión ampla e diversa das relacións entre o mundo da arte, a literatura e a gastronomía.
Arquivo da categoría: Internacional
200.000 Euros para traducir obras desde e para o galego
“A Consellaría de Cultura destinará este ano 95.700 euros e outros 104.300 o ano que vén para contribuír á tradución de obras literarias galegas a outras linguas e viceversa. […] “As axudas están dirixidas ás editoriais e valoraranse, entre outros criterios, a calidade da obra e o seu interese.” (Consellaría de Cultura e Deporte)
Tertulia en Madrid sobre a real facturación do sector editorial
O 13 de xuño de 16:00 a 19:00 horas na Representación en España da Comisión Europea (Paseo de la Castellana, 46, Madrid), terá lugar unha tertulia sobre Folios, caracteres, palabras: verdades y mentiras en los sistemas de facturación del sector editorial. Estará a cargo de Carlos Milla (traductor) e Marta Pino (traductora).
Conferencia n’A Coruña sobre a tradición popular en Escocia
O xoves 7 de xuño terá lugar unha conferencia a cargo do profesor escocés D. David Clark sobre tradición popular en Escocia. Será ás 20:30 horas no salón de actos da Asociación Cultural Alexandre Bóveda (Olmos, 16-18, 1º).
“Cultura e artes do Portugal contemporâneo”: curso en Compostela
Do 10 ao 13 de xullo realizarase o curso de verán titulado “Cultura e Artes do Portugal Contemporâneo” na Faculdade de Filosofia da Universidade de Santiago de Compostela. Dedicará un día a cada un dos temas: audiovisuais, música, moda e artes do palco. Serán catro mulleres (especialistas nas respectivas áreas) a tratar de cada painel durante os catro días. Máis información aquí. (Instituto Camões – Galiza)
Asinado convenio entre a AELG e o Consello da Cultura Galega
O Consello da Cultura Galega (CCG) e a Asociación de Escritores en Lingua Galega (AELG) asinaron onte un protocolo de colaboración institucional no que se comprometen a fomentar a creación de literatura na lingua do país e a difundir o seu coñecemento dentro e fóra das fronteiras autonómicas.
Os presidentes de ambas as dúas institucións, Cesáreo Sánchez Iglesias, da AELG, e Ramón Villares, do Consello da Cultura, asinaron onte en Santiago este documento, no que plasman os mecanismos polos que colaborarán nun futuro para “fomentar o intercambio de experiencias no ámbito da escrita, a docencia da escrita literaria ou científica, histórica, etc., a investigación e a promoción cultural”.
Entre outras cousas, o CCG e a AELG colaborarán na organización dunha serie de xornadas de debate sobre os textos de creación literaria, crítica e científica en galego, no deseño de obradoiros literarios destinados á sociedade galega, así como en actividades para vencellar as letras galegas e outras literaturas do mundo. Ao mesmo tempo, as entidades colaborarán na consolidación das súas respectivas webs, co establecemento de relacións de comunicación e de servizos destinados ó público. (AELG)
Presentación de “Haikús da Costa da Morte”, de Alfonso Armada e Antón Patiño
O venres 1 de xuño terá lugar ás 20:30 horas a presentación por parte de Juan Manuel Bonet do cartafol de gravados e poemas Haikús da Costa da morte, de Alfonso Armada e Antón Patiño, na Galería Antonio Machón (C/ Conde de Xiquena, 8, Madrid). O acto coincide coa mostra actual de Antón Patiño “Memoria líquida”, que se exhibe na Galería Antonio Machón até o día 7 de xuño de 2007.
Entrega de premios do concurso “Contos do Mediterráneo”
Dentro do programa do “IIº Ciclo Galiza: nin rastro de mulleres?”, na Biblioteca Francesca Bonnemaison de Barcelona (Sant Pere més Baix, 7) terán lugar un recital poético en homenaxe a María Mariño e a entrega de premios do concurso literario Contos no Mediterráneo, que contará coa presenza do escritor Diego Ameixeiras. Será o venres 25 de maio de 2007, ás 19 horas.
Yolanda Castaño no Festival Internacional “Primavera poética” de Lituania
Yolanda Castaño será desde o día 21 de maio a única representante do estado español no Festival Internacional “Primavera poética” de Lituania. Este festival conta xa con 43 edicións (dende o ano 1965). O encontro constitúe unha consolidada cita no mundo da poesía a nivel mundial e que vai contar este ano e por vez primeira na súa historia cunha autora de literatura galega. (La Voz de Galicia)
Convocatoria australiana sobre a literatura actual
Desde a revista Antípodas (Journal of Hispanic and Galician Studies) chega a convocatoria do número XXII coa intención de documentar o “Panorama da escrita en lingua galega entre os séculos XX e XXI”. É un proxecto que nace da colaboración entre Antípodas (Journal of Hispanic and Galician Studies) e a Universidade da Coruña:
“Convidamos a participar neste volume dedicado a escrita actual en galego a todos os especialistas e investigadores no eido da literatura galega no cambio de século (aproximadamente entre 1990 e hoxe), aínda que tamén poden remitirse artigos en torno a literatura escrita en lingua galega e publicada despois do ano 1975. Antípodas pretende poñer ó día o momento literario de Galicia e, asemade, presentar un panorama dos autores máis novos que están xa a publicar con éxito. Estamos á procura de artigos orixinais que permitan olladas novedosas, diferentes enfoques da crítica, e, nesa mesma liña, aportacións no eido poscolonial, a literatura comparada ou os estudos de xénero. Os traballos deberán versar, preferentemente, sobre a producción literaria de autores en lingua galega que acadaron un certo nivel de notoriedade a partir do ano 1990, e aqueles outros máis novos que están agora acadando os primeiros recoñecementos polo seu labor literario. Antípodas desexa, deste xeito, analizar a situación da literatura en galego e tamén as súas perspectivas cara ó futuro máis inmediato […].”
Prazo para o envío dos traballos completos: 15 de Decembro de 2007. Pódese obter máis información na web da revista.
