“Intriga, 
unha historia do galeguismo e tramas da CIA entreveranse en A función do tequila, a obra coa que Manuel Guede gañou onte o Premio Rafael Dieste de teatro, convocado pola Deputación da Coruña. Guede, que na súa ultima achega dramática perfilara o personaxe de La bella Otero, regresa aos intestinos do século XX para pescudar na peripecia vital da muller que a CIA lle puxo de secretaria a Castelao na súa visita a Nova York en 1938, cando o autor de Sempre en Galiza trataba de lograr apoio económico para a II República. Ela era daquela unha rapaza e chamábase María Docampo. Porén, ao tirar do fío descobre unha figura fascinante: o seu marido, José García Peña Jalisco, personaxe que xa trataran Fernando Salgado e Daniel Cortezón, pero que Guede converte agora no eixe dunha trama callada de realidade e ficción. O que fora director do Centro Dramático Galego (CDG) durante catorce anos estaba onte encantado “de entrar no selecto club dos que gañamos o Dieste e o Cunqueiro de teatro, como Roberto Vidal Bolaño” e tamén estaba satisfeito de que o xurado valorase un texto que fai dramaturxia a partir dunha investigación histórica. A obra, subliñou o xurado, está “baseada en feitos reais e ben documentada, desvela que Castelao e Luis Soto foron espiados pola CIA e propón un interesante xogo entre pasado e presente, entre realidade e recordos, e entre personaxes que varían a súa identidade, que ten a capacidade de enganchar ao espectador”. Guede, pola súa banda, recoñece que traballou moito, en especial a través dunha documentación que lle amosou a estremecedora relación de Docampo con Jalisco: nos anos corenta, ela ven a Galicia “fuxindo de non sabemos que” e “a finais desa década foi cruelmente asasinada polo seu marido xunto coa súa irmá e a súa nai” nunha aldea de Sada. Para Guede -“ou para Méndez Ferrín e Isaac Díaz Pardo”, puntualiza- tratouse dun crime político: un encargo da CIA para facer desaparecer a que fora a súa espía.” Vía Galicia Hoxe. A nova tamén se recolle na páxina da Deputación, e en Xornal, La Voz de Galicia, Galiciaé.
Arquivos da etiqueta: Premio de Teatro Rafael Dieste
Convocado o XV Premio de Teatro Rafael Dieste
“Coa
intención de incentivar a creatividade no ámbito do teatro, por ser unha das formas artísticas de maior incidencia social e en lembranza do xenial autor rianxeiro, a Deputación Provincial da Coruña convoca o XV Premio de teatro Rafael Dieste, de acordo coas seguintes:
BASES
Primeira.- Poderán optar ao premio todos os autores de calquera nacionalidade, que presenten obras inéditas e non premiadas con anterioridade, que estean escritas en lingua galega.
Segunda.- Establécese un premio único e indivisible, dotado con 6.500 euros. Esta cantidade está suxeita ás retencións legais que lle sexan aplicables. A Deputación publicará a obra premiada, reservándose durante un prazo de dezaoito meses os dereitos de editala e de representala, e entregaralle ao gañador trinta exemplares. A Deputación poderá contratar unha compañía teatral galega para realizar a montaxe e a representación da obra premiada, sen que isto supoña unha compensación complementaria para o autor.
Terceira.- O tema e a extensión da obra será libre, e a súa presentación será feita por quintuplicado, en exemplares separados, en tamaño DIN A 4, tamaño de letra 10, espazo 1 ½, polas dúas caras, numerados, grampados ou encadernados. Cada obra será presentada baixo o sistema de plica, polo que será enviada achegada dun sobre aparte; no exterior do sobre figurará o título da obra e o lema ou pseudónimo do seu autor; no interior incluirase unha copia do DNI, o enderezo, teléfono de contacto e correo electrónico e, ademais, unha declaración expresa de que a obra é inédita e que non foi premiada, ata a data da súa presentación, en ningún outro certame ou premio.
Cuarta.- O prazo de presentación de orixinais comezará o día seguinte ao de publicación desta convocatoria no Boletín Oficial da Provincia e rematará o día 15 de febreiro de 2011. Os orixinais enviaranse á Deputación da Coruña, Avda. Alférez Provisional 2, 15006 A Coruña, indicando no sobre XV Premio de teatro Rafael Dieste.
Quinta.- O xurado estará presidido polo presidente da Deputación da Coruña e formarán parte del: a deputada presidenta da Comisión de Cultura, Xuventude e Patrimonio Histórico e Artístico, catro persoas de recoñecido prestixio no ámbito teatral e un dos gañadores de anteriores edicións, que poderá ser substituído por outra persoa no caso de que, a ningún deles, lle fose posible aceptar a súa participación. O nomeamento do xurado será feito polo presidente da Deputación, e actuará como secretario o da Corporación ou o funcionario no que delegue. A composición do xurado farase pública con anterioridade á súa reunión no taboleiro e na páxina web da Deputación, co fin de que se poidan interpor, se é o caso, os recursos legais pertinentes.
Sexta.- Os participantes terán a obriga de comunicarlle á Deputación a concesión de calquera premio que obteña a obra presentada, no momento en que esta situación se produza, o que dará lugar á súa exclusión do concurso. O xurado actuará en pleno, en sesión a ser posible única, sendo necesaria a asistencia da maioría simple dos seus membros. Para os efectos da validez da súa constitución aplicarase o disposto no art. 26.1 da Lei 30/1992 do réxime xurídico das administracións públicas e do procedemento administrativo común. As deliberacións serán secretas e delas redactarase a acta correspondente. Sendo un dos obxectivos deste concurso a representación da obra premiada, valoraranse positivamente os factores que incidan na súa viabilidade escénica: número de personaxes, condicións técnicas, etc. O xurado non poderá declarar deserto o premio e presentará a súa proposta ao presidente da Deputación, que é o órgano competente para resolvelo. A decisión do xurado terá lugar no primeiro trimestre do ano 2011 e darase a coñecer no taboleiro de anuncios e na páxina web da Deputación, e a través dos distintos medios de comunicación. A plica correspondente á obra que resulte finalista poderá ser aberta polo secretario do xurado co fin de que, se o seu autor o permite, poida darse a coñecer o seu nome.
Sétima.- Non se devolverán os orixinais non premiados que, a partir da decisión do xurado, serán destruídos.
Oitava.- A participación nesta convocatoria supón a total aceptación destas bases.
A Coruña, 20 de decembro de 2010.”
XIV premio de teatro “Rafael Dieste”
Organiza e convoca a Deputación da Coruña, que establece un premio único de 6.500 € e se compromete a publicar a obra premiada. Poderán optar ao premio todos os autores de calquera nacionalidade que presenten obras inéditas e non premiadas con anterioridade escritas en lingua galega. O prazo de admisión de orixinais remata o día 15 de abril de 2009. Ler texto completo das bases.
