Arquivos da etiqueta: Yolanda Castaño

Fanny + Alexander volven poñer música aos novos poetas galegos

Publicado o por

alfaiasOs composteláns Fanny + Alexander están de volta co seu terceiro disco, Alfaias, de novo editado baixo licenza Creative Commons tanto en formato físico a traves de A Regueifa Discos coma en formato mp3 no netlabel A Regueifa Plataforma. Ao longo de once novos temas o duo percorre as distintas aristas do poliédrico Pop contemporáneo, indo dende o pop indietrónico de temas coma Setecentos e Espida de credo até o pop acústico e canónico de músicas coma Tardes de domingo e Na febre dos incendios, sen renunciar nunca á atitude experimentadora e permanente vontade de penetrar en estilos aínda inéditos na nosa lingua, coa firme vocación de levar o pop galego aos sons do século XXI.

Continuando coa liña dos seus dous primeiros traballos, as letras de todos os temas son adaptacións de textos de autores galegos da súa xeración (Mario Regueira, Emma Couceiro, Diego Ameixeiras, Lara Dopazo Ruibal, Xiana Arias, Igor Lugris, Pedro Lamas, Yolanda Castaño, Estibaliz Espinosa, Daniel Salgado e Alberte Momán), e contan ademais coa colaboración das voces de Carlos Valcárcel de Projecto Mourente en Artefacto Burbur, Martin Wu de The Homens en Toda esa enerxia escura, Alex Charlón de Ataque Escampe en Vigo ou Berlin e o hammond de Banin de Los Planetas en Tardes de domingo.

Descargar disco completo: arquivo zip 84 MB.

A Coruña e Vigo: presentación do novo libro de Alfonso Armada

Publicado o por

O luns 20 de abril ás 20:00 horas na Libraría Librouro de Vigo presentarase o libro TSC. Diario da noite, de Alfonso Armada, nun acto que contará coa participación de César Portela, Fran Alonso e o autor.

Ao día seguinte, martes 21 de abril, o libro vai ser presentado na Galería Sargadelos da Coruña (R/ Real, 56), coa presenza de Pilar García Negro e Yolanda Castaño. Será a partir das 20 horas. A entrada nos dous casos é libre.

Xira poética de Yolanda Castaño por España e Francia

Publicado o por

A poeta santiaguesa-coruñesa inicia mañá toda unha xeira de citas literarias que a desprazarán pola xeografía de España e Francia ao longo do que resta do mes de marzo. Este venres día 6, Yolanda Castaño participará no IV Festival Internacional de Poesía de Lleida “Mahalta 2009”, ao longo dun programa que culminará no espectáculo poético conxunto que terá lugar no Auditori Enric Granados da cidade ás 21h dese día. Cunha presenza especial de autores e autoras dos Países Cataláns, o Festival Mahalta de Poesía enriquecerase coa presenza doutros poetas europeos estranxeiros, así coma do único convidado chegado da literatura en español, Antonio Cabrera, o autor de poesía en asturiano Antón García e a propia Yolanda, en galego.

A semana próxima Yolanda Castaño será tamén a única autora galega que tome parte no “IV Festival de la Palabra. VERSÁTIL.ES-09” en Valladolid, un evento anual vencellado á Universidade desta capital castelán-leonesa que se estenderá do día 10 ao 12. Obradoiros, presentacións de libros, mesas redondas, recitais e concertos terán lugar en Valladolid cunha atención especial aos aspectos máis prácticos da escrita, coa presenza de nomes coma os de Jordi Doce, María Eloy-García, Alberto Santamarina, Sofía Rhei ou Nacho Vegas.

Xusto a continuación, Yolanda participará no ciclo que dende o ano 1992 desenvolve a Aula de Poesía Díez-Canedo en Badaxoz cunha lectura individual de poemas propios para o público xeral e outra nun Centro de Ensino Secundario da cidade extremeña. Na seguinte semana cidade acudirá á cidade de Elche para tomar parte no I Festival de Poesía “Nosomostanraros” organizado polo Instituto Municipal de Cultura cun espectáculo poético multimedia que terá lugar o día 18 no Centro de Cultura Contemporánea l’Escorxador. Un despregue de videopoesía, performance, música, efectos de luz e son a cargo da poeta galega.

Rematará o mes en Francia cunha conferencia sobre poesía galega dos últimos anos na Universidade da Sorbona en París o día 27, que repetirá na Universidade de Rennes o 30 e o 31 en Lorient, citas organizadas polos lectorados de galego na capital francesa e na rexión bretoa.

Yolanda Castaño está a piques de ver publicada a edición bilingüe galego-castelán do seu último poemario,“Profundidade de Campo, que fora gañador do XV Premio de Poesía Espiral Maior e que verá agora a luz no selo madrileño de Visor para o resto de España e Latinoamérica.

Viena: Yolanda Castaño no Festival de Poesía “European Voices”

Publicado o por

Yolanda CastañoYolanda Castaño viaxou nestes días a Viena, onde entre os días 23 e 25 está a ter lugar o Festival de Poesía “European Voices”. Os actos celebraranse na Literaturhaus, no Instituto Italiano de Cultura en un dos famosos e máis activos cafés vieneses, onde se poderá escoitar a última poesía europea da man de autores tamén de Francia, Alemaña, Italia, Austria e Hungría. Castaño será a única participante vida de España, sendo autora de poesía en galego e amosando as súas traduccións ao alemán, a maioría das cales son obra da escritora residente na Coruña Heidi Kunh-Böde, autora de narrativa e teatro en galego.

Celanova: I Encontros de poesía nova

Publicado o por

En Celanova (Casa dos poetas, Celanova), entre o 18 e o 19 de xullo do 2008, terán lugar os primeiros ENCONTROS DE POESÍA NOVA, no contexto do centenario de Manuel Curros Enríquez.
Entre os participantes figuran César Antonio Molina, Luis Alberto de Cuenca, José Antonio de Ory, Miguel Anxo Fernán-Vello, Helena de Carlos, Yolanda Castaño, Estíbaliz Espinosa, Baldo Ramos, Paulino Vázquez, Cecilia Quílez, Berta Dávila, José Ramón Trujillo, Emilio Ruiz Barrachina, José Manuel Lucía Megías, Justo Bolekia, Javier Pérez Vazo, Basilio Rodrígez Cañada e Xosé Luis Méndez Ferrín. O encontro finalizará co espectáculo poético-musical QUEN PUDERA CONVOSCO VOAR, sobre a obra poética de M. Curros Enríquez, pola Compañía teatral Casahamlet e con dirección de Manuel Lourenzo e Santiago Fernández.

Yolanda Castaño no Festival Mundial de Poesía de Venezuela

Publicado o por

Co lema “Sen tregua, coma as nubes” a 5ª edición do Festival Mundial de Poesía de Venezuela está a ter lugar no país caribeño dende o día 18 e ata o 25. O evento, organizado polo Ministerio do Poder Popular para a Cultura –que dirixe o galego Francisco Sesto- a través da “Casa Nacional das Letras Andrés Bello” celébrase en todo o territorio nacional, dedicándose este ano ao poeta margariteño Gustavo Pereira (Premio Nacional de Literatura 2000).
Nun percorrido pola totalidade dos 24 estados do país, 200 poetas venezolanos súmanse aos 38 internacionais provintes de 30 diferentes países de Europa, América, Oriente Próximo, África e Oceanía. Entre eles, a galega Yolanda Castaño, única chegada dende as linguas minorizadas do Estado, e que completa xunta Mª Ánxeles Pérez López a delegación española.
Este Festival Mundial, que xa contara con outro galego –Miguel Anxo Fernán-Vello- na súa segunda edición hai dous anos, experimenta un constante crecemento dende os seus comezos, colocándose coma o segundo en importancia en toda América Latina, despois do de Medellín (Colombia). O programa inaugurouse o día 19 ás 18:30, no emblemático Teatro Teresa Carreño da capital. Recitais, obradoiros e presencia editorial darán respaldo a este acontecimento cultural.

Entrega do VIII Premio de Poesía Fiz Vergara Vilariño

Publicado o por

«A entrega da 8ª edición do Premio de Poesía Fiz Vergara Vilariño, que nesta edición gañou a poeta Olalla Cociña, terá lugar ás 20:00 horas o venres 18 de abril no hotel NH Alfonso IX de Sarria.
Na entrega do premio intervirán, Xosé Mª Álvarez Cáccamo, Yolanda Castaño e Martín Veiga (xurados desta edición), Eduardo Valiña (artista plástico que cede a obra desta edición), o concelleiro de Cultura do Concello de Sarria, Xermán Arias, e María Casar (presidenta da A.C. Ergueitos). O mantedor do acto será X. A. Neira Cruz.
Ao rematar o acto haberá unha cea no mesmo hotel (o prezo das tarxetas é 25€ – 667429225). Nesta ocasión tamén nos sería moi grato poder terte neste acto que anova en cada edición o noso labor de manter viva a memoria do Fiz e de facer medrar a árbore da poesía cun novo poemario anainado na casa da Espiral Maior.» (A. C. ERGUEITOS)

Presentación en Compostela de Profundidade de campo, de Yolanda Castaño

Publicado o por

Yolanda CastañoO próximo mércores día 2 de abril terá lugar a presentación en Compostela do último Premio Espiral Maior de Poesía. O Centro Galego de Arte Contemporánea albergará, a partir das 20h, unha velada multimedia arredor de Profundidade de campo, quinto poemario individual da compostelana Yolanda Castaño.