Ante a triste noticia do pasamento do escritor Ramiro Fonte Crespo, a Asociación de Escritores en Lingua Galega ven de solicitar do Concello de Pontedeume que se lle poña o nome do insigne Poeta a algún dos seus edificios públicos relacionados co mundo da Cultura, de modo que sirva como tributo á súa memoria por parte da vila que o viu nacer.
Arquivo da categoría: Homenaxes
VI Encontro de escritores ourensáns, dedicado a Manuel Curros Enríquez
A Sección de Literatura do Liceo de Ourense, co patrocinio da Consellería de Cultura e Deporte da Xunta de Galicia, convoca o VI Encontro de Escritores Ourensáns nunha xornada dedicada ao Centenario de Manuel Curros Enríquez, para o vindeiro venres, 17 de outubro a partir das oito e cuarto da tarde no Liceo de Ourense. Programa. (Liceo de Ourense)
Comunicado da AELG no pasamento de Ramiro Fonte
A Asociación de Escritores en Lingua Galega lamenta profundamente a grande perda do escritor e amigo Ramiro Fonte Crespo, vulto indiscutíbel da literatura galega actual cuxa obra pasará sen dúbida a ser considerada un fito histórico da cultura contemporánea.
A AELG desexa tamén manifestar a súa vontade de promover unha homenaxe nacional ao escritor de Pontedeume, coa intención de recoñecer publicamente os seus incalculábeis valores humano e literario. En breve informaremos de lugar e data.
(Consello directivo da AELG)
Silleda: homenaxe a Alonso Ríos
«O mestre, escritor e político Antón Alonso Ríos recibirá unha homenaxe nacional o 13 de setembro no lugar do seu nacemento, Camporrapado, na parroquia silledense de Cortegada. Alonso Ríos é unha das figuras máis salientables do galeguismo durante a Segunda República, foi perseguido tralo levantamento militar de 1936 e converteuse nun dos grandes protagonistas da Galiza no exilio desde Bos Aires. […]» (Consellaría de Cultura e Deportes)
A Coruña: presentado o libro A Coruña á luz das letras
Tal como anunciamos, o 26 de agosto tivo lugar a presentación desta obra colectiva patrocinada polo Concello da Coruña con motivo do 800º aniversario da cidade. Participaron nela máis de sesenta socias e socios da AELG, algúns dos cales interviron desde a mesa. Aquí presentamos o vídeo que un dos socios gravou, así como outro máis sobre o dúo que acompañou musicalmente o evento, composto por Moncho do Orzán e Ricardo Morente.
[kml_flashembed movie="http://br.youtube.com/v/Nv5-Hk_mZHM" width="320" height="240" wmode="transparent" /]
[kml_flashembed movie="http://br.youtube.com/v/nbx71QNFNPc" width="320" height="240" wmode="transparent" /]
(Vía O levantador de minas)
A Terra Chá lembra o cuarto cabodano de Manuel María
«Amigos e admiradores celebrarán o luns en Outeiro de Rei o cuarto cabodano do poeta Manuel María. A xornada comeza cun xantar na Casa Rural Reboreda de Abaixo e continuará, a partir das catro e medio da tarde, coa lectura de poemas de Manuel María en Penas das Rodas. […]» (Galicia-Hoxe)
Os XVI Encontros na Terra Cha homenaxean Antom Santamarina
«Guitiriz acolle o vindeiro 5 de setembro o XVI Encontros na Terra Cha, que este ano están dedicados a Antón Santamarina, primeiro presidente das Mocedades Galeguistas de Bos Aires. Alí reuniranse escritores, entre eles, Xavier Alcalá ou Xosé Martínez Romero e históricos galeguistas como Avelino Pousa Antelo, recentemente premiado co Ramón Piñeiro ‘Facendo país’ e Antón Moreda. […]» (A Nosa Terra)
Aldea de Saa: homenaxe a Sixto Aguirre e Camilo Díaz Valiño
O 14 de agosto de 2008, ás 12:00 na Aldea de Saa (curva de Lodeiro – N 547, km 40, vindo de Lugo, perto de Palas de Rei e antes vindo de Compostela), terán lugar os seguintes actos en homenaxe aos mártires Sixto Aguirre e Camilo Díaz Valiño:
I. ACTO DE AMOR E LEALDADE AOS NOSOS MÁRTIRES E EN ESPECIAL NESTA DATA A DOUS VALENTES LOITADORES REPUBLICÁNS: SIXTO AGUIRRE e CAMILO DÍAZ VALIÑO: desccubrimento da pedra homenaxe aos dous exemplares defensores da liberdade e da República e intervencións (TI PREPARA A TÚA, obrigadamente e non máis de 2ou 3 minutos).
II. NA IGREXA DE SAN PEDRO DE MEIXIDE ACTO DE FIDELIDADE E DE IRMANDADE.
III. NO “ PAZO MARIÑAO” (San Pedro de Meixide): xantar solidario (25 €, avisar antes do día 10 de agosto no tfno. 636032750 ou no enderezo erdao@hotmail.com)
Ramiro Fonte será homenaxeado en Ferrol
No acto, que será o 28 de xullo, Ramiro Fonte recibirá o Premio Porto Magno polo conxunto da súa obra. O xurado estivo composto por Julia Uceda, Iolanda Díaz, Félix Villares Mouteira, Miguel García-Posadas, Ramón Pernas, Segundo Leonardo Pérez López e Ramón Loureiro. Este galardón foi creado por polo Coro Toxos e Froles da para conmemorar o 150 aniversario da concesión do título de cidade a Ferrol. (Vieiros)
Silleda: Homenaxe a Ramón de Valenzuela
O mércores 23 de xullo terán lugar varios actos en lembranza de Ramón de Valenzuela.
1º) Acto cívico ás 20:00 na Praza da Feira da Bandeira coa participación de Mariví Villaverde (viúva do autor), Xosé Neira Vilas (escritor e académico) e Luís Bará (Director Xeral de Creación e Difusión Cultural da Consellaría de Cultura e Deporte). Logo procederase á inauguración da Rúa Ramón de Valenzuela.
2º) Acto de homenaxe na Casa da Viña, parroquia de Manduas. Descuberta de placa conmemorativa na casa natal, realizada polo artista silledense Jorge Conde.
(Adellís asociación socio-cultural – Comisión pola Memoria Siñor Afranio)
