Arquivo da categoría: Infantil e xuvenil

Salón do Libro Infantil e Xuvenil: axenda do xoves 11 de febreiro

Publicado o por

O Teatro Principal acollerá mañá xoves 11 de febreiro, ás 21: 00 horas, o concerto da Banda de Música de Pontevedra “As cidades a través da música”, adaptado á temática do Salón do Libro Infantil e Xuvenil de Pontevedra. Neste especial “Concerto en familia” que unirá música con imaxes interpretaranse, entre outras, pezas coma: “Tormenta del desierto” (Ferrer Ferrán), “Manhattan Pictures” (Jan Van der Roost) ou “Los Madriles” (Miguel Asíns Arbó). A entrada será gratuíta ata completar aforo.

Por outra banda, no Café Moderno (Fundación Caixa Galicia) ás 19:30 horas celebrarase a terceira xornada do ciclo Os autores e as cidades: Marcos Sánchez Calveiro fala na súa conferencia Cidades Vividas, Cidades imaxinadas sobre as urbes literarias o tratamento do espazo como aglutinante de todos os acontecementos, tal e como ocorre na sú obra Festina Lente, na que o autor nos somerxe nunha Compostela doutro tempo.

Na Sala de Exposicións do Pazo da Cultura ás 17.30 horas, os propios rapaces e rapazas poñen voz ao Salón do Libro Infantil e Xuvenil de Pontevedra e serán “Os nenos contadores” das “Tardes na sala”. “Os Bolechas” de Caramuxo Teatro voltan ao Auditorio do Pazo da Cultura ás 18: 30 horas. O gran éxito editorial galego, adaptado á cidade de Pontevedra, amósanos un día cheo de anédotas nesta divertida familia. Cunha duración de 45 minutos, está recomendado para o público a partir de 3 anos de idade. As entradas estarán á venda na billeteira dende unha hora antes do comezo, sendo o seu custo de 3 euros, salvo para os menores de 12 anos, que terá un desconto do 50%.

Axenda completa do xoves 11 de febreiro

Fernández Paz e DoCampo, sinalados entre os mellores autores do século XX

Publicado o por

Compañeiros de xeración, amigos e confidentes habituais, Xabier P. DoCampo e Agustín Fernández Paz son dous autores fundamentais para as letras galegas dende que colleron a pluma por vez primeira, a finais dos 80, e tamén dentro do conxunto do Estado, como proba que ambos os dous gañasen o Premio Nacional de Literatura Infantil e Xuvenil. E, dende esta semana, son tamén parte do canon da literatura española infantil e xuvenil do século XX, segundo ditaminaron 19 expertos, de cara ao I Congreso Iberoamericano de Lingua e Literatura Infantil e Xuvenil que se celebrará a finais de mes en Santiago de Chile.

Este grupo de expertos escolleu once obras que consideran as máis representativas do século XX, entre as que se contan Contos por palabras, de Fernández Paz, e Cando petan na porta pola noite, de DoCampo, os dous únicos libros que non foron escritos orixinalmente en castelán, e editados en ambos os casos por Xerais. “Foi toda unha sorpresa, porque a noticia chega xusto cando estaba a falar coa editorial de sacar unha edición actualizada do libro, porque penso que segue plenamente vixente”, afirma Agustín Fernández Paz.

O autor vilalbés considera “simbólico” que de novo el e DoCampo volvan compartir un premio xa que teñen “moitos puntos en común”, entre eles, que abriron novos camiños para a literatura infantil e xuvenil no final do século pasado.

“Son cousas que lle pasan a un, igual que ás veces colles unha catarreira”, bromea Xabier DoCampo, non sen lembrar que xa non é a primeira vez que el e Agustín están nunha escolma deste tipo. “Demostra, unha vez máis, que a literatura galega está ben considerada fóra, aínda que algúns nos acusen de ensimesmados e acomplexados”. En todo caso, confirman os dous que non irán a Chile para o congreso, porque “está moi lonxe” e porque non recibiron invitación. [Ler noticia completa en Xornal de Galicia]

Salón do Libro Infantil e Xuvenil: axenda do mércores 10 de febreiro

Publicado o por

Mañá, Mércores 10 de Febreiro, “Os Bolechas” chegan ao Auditorio do Pazo da Cultura da man de Caramuxo Teatro. Cunha duración de 45 minutos, está recomendado para público a partir de 3 anos. As funcións previstas para a mañá son concertadas cos colexios e contan cun aforo de 409 asistentes para as 10.00 horas e de
395 nenos e nenas para as 12.00 horas. A sesión da tarde é aberta a todos os públicos e as entradas estarán á venda na billeteira dende unha hora antes do comezo, sendo o seu custo de 3 euros, salvo para os menores de 12 anos, que terá un desconto do 50%.

Na Sala de Exposicións do Pazo da Cultura ás 17.30 horas, o contacontos Carballo con botas de Papaventos amenizará por terceira xornada das “Tardes na sala”.

O XI SALÓN DO LIBRO INFANTIL E XUVENIL DE PONTEVEDRA organiza no serán do mércores, 10 de febreiro de 2010, ás 19.00 horas, no Café Moderno (Fundación Caixagalicia) a presentación do proxecto “Contos do Camiño”
de OQO Editora, que empregará os contos populares de distintos países como fío condutor. Os relatos narrados, a música e as imaxes permitiranlles aos máis pequenos peregrinaren polas distintas rutas xacobeas e afondaren asemade nos valores da convivencia entre culturas.

A programación do Salón no Café Moderno continúa o ciclo “Os autores e as cidades”, que ás 19:30 horas contará coa conferencia NY coma cidade con luz, de Inma López Silva.

As actividades previstas na programación do XI Salón do Libro Infantil e Xuvenil de Pontevedra inclúen ademais:

-10:00 – 10:40 e 11:45 – 12:25
Obradoiro Escrita, con Tagen Ata
Obradoiro Ilustración, con Anxo Fariña
Obradoiro “A Cidade Enorme”. OQO Editora
CONTACONTOS: Celso Fernández, Pavís Pavós e Queliña
TEATRO: Migallas

-10:00 / 11:15.- OBRADOIROS URBANOS: Nenos Policía por un día

-10:00 e 12:00 Caramuxo teatro – Os Bolechas (Auditorio do Pazo – función concertada cos centros escolares)

-10:40 – 11:10: visita ao Salón
-11:00 – 11:30: visita ao Salón

– 11:30 – 13:00: OBRADOIROS URBANOS: Nenos Policía por un día

-12:25 – 12:45: visita ao Salón
-12:45 – 13:30: visita ao Salón

-17.30: Tardes na Sala: “Carballo con botas” (Papaventos)

-18:30: Caramuxo teatro – Os Bolechas (Auditorio do Pazo para todos os públicos)

-19:00: Presentación do proxecto “Os contos do camiño”. OQO editora (Casa das Campás)

-19:30 CONFERENCIA Ciclo Os autores e as cidades (Caixagalicia): “NY como cidade con luz” – Inma López Silva

Comezou o XI Salón do Libro Infantil e Xuvenil de Pontevedra

Publicado o por

Onte domingo quedou inaugurado o XI Salón do Libro Infantil e Xuvenil de Pontevedra, que desenvolverá un completo programa de actividades até o 14 de marzo. Salientamos de maneira moi especial a homenaxe ao escritor Agustín Fernández Paz que terá lugar o sábado 13 de marzo, coa participación de Xabier P. Docampo e a actuación de Mini e Mero. Podedes descargar o programa en PDF (2,2 MB) premendo nesta ligazón

Santiago: encontro con Fina Casalderrey

Publicado o por

O clube de lectura Gálix Tendendo redes convoca para o vindeiro mércores 20 de xaneiro un encontro-coloquio con Fina Casalderrey arredor da súa novela A pomba e o degolado. A presentación da autora corre a cargo de Miguel Vázquez Freire. Será entre as cinco e as sete da tarde, no Consello da Cultura Galega (Pazo de Raxoi, s/n) en Santiago de Compostela.

Ferrol: presentación do libro-disco Tic-tac de Pablo Díaz

Publicado o por
TicTac_imoscontarconto

O libro-disco Tic Tac do músico coruñés Pablo Díaz e con ilustracións de Marc Taeger será presentado este sábado 2 de xaneiro en Ferrol. O libro está editado por Kalandraka e conta coa colaboración de trinta músicos, entre eles Xabier Díaz, Guadi Galego, Carmen Rey e Ruote, ademais das achegas de Santiago Auserón e Xurxo Souto no prólogo e no epílogo, respectivamente.

Santiago: presentación dun libro de Xavier Queipo

Publicado o por
Presentación Illa dos cangrexos violinistas

O escritor galego Xavier Queipo (Santiago de Compostela, 1957) presentará o vindeiro martes, día 29 de decembro, na Libraría Couceiro de Santiago de Compostela o libro A illa dos cangrexos violinistas, álbum ilustrado por Jesús Cisneros e publicado por OQO editora. O acto comezará ás 20 horas.

Gondomar: Elvira Riveiro no club de lectura Lendo contigo

Publicado o por

Mañá sábado, 19 de decembro, ás 12:00 horas, na Biblioteca Pública de Gondomar, a poeta Elvira Riveiro participará na última sesión do ano 2009 do Club de Lectura Compartida Lendo Contigo, destinado a nais e pais e nenos e nenas de 8 a 11 anos. O libro proposto nesta ocasión é PAlAbrAs brAncAs, publicado pola editorial Xerais e finalista do Premio Merlín de Literatura Infantil 2007. PAlAbrAs brAncAs é un poemario moi especial, escrito unicamente coa vogal “a”, un marabilloso encontro con palabras que xogan a agasallarnos todos os “as” posibles.

Entrevistas a Agustín Fernández Paz en Faro e Xornal

Publicado o por

Entrevistas ao escritor Agustín Fernández Paz na prensa galega con motivo da publicación do seu libro Valados:

Faro de Vigo: “Agora hai máis muros ca nunca, uns 8.000 quilómetros no mundo”

Xornal de Galicia: “Cando alguén ergue unha muralla, sempre é para manter os seus privilexios”