O libro infantil O reino ideal, de Miguel Anxo Mouriño, será publicado por Galaxia neste mes. O autor ofrece xa paralelamente un blogue no que pretende animar a quen o lea a introducirse pouco a pouco no mundo da enigmística, unha actividade lúdica e creativa de grande potencial formativo que en galego ten aínda moi pouca presenza. Pode accederse a el n’ A páxina de Buli.
Arquivo da categoría: Infantil e xuvenil
“U-49”, nova novela xuvenil de Rafael Lema
A editorial Tambre-Edelvives publicará a novela xuvenil U-49, nova obra de Rafael Lema. Trátase dunha historia de aventuras sobre un submarino alemán histórico, o U-49, que na I Guerra Mundial mantivo unha intensa actividade bélica nas augas da Costa da Morte, causando o afundimento de mercantes aliados, sobre todo no ano 1917.
Marcos Calveiro gaña o premio Ala Delta de literatura infantil
«Por primeira vez, unha obra na nosa lingua gaña o Premio Ala Delta de Literatura Infantil. O carteiro de Karrada, de Marcos S. Calveiro, foi seleccionada entre máis dun cento de obras escritas nas catro linguas oficiais do estado. O premio, que este ano acadou a súa edición número 18, está dotado con 12.100 euros. No seu blog, o autor agradece o apoio do editor Ignacio Chao e do crítico Martin Pawley, e salienta o feito de que, nunha época “en que a nosa lingua está recibindo tantos ataques”, se recoñeza unha obra escrita en galego.» (Vieiros)
Carballo: Praza dos libros 2007
«O Xardín Municipal de Carballo encherase durante catro días, do 23 ao 26 de agosto, de libros, de actividades lúdicas, participativas, divertidas e formativas para nenas e nenos e para persoas adultas, de autoras e autores da comarca e do país, de presentacións e sinaturas de libros, de recitais, de actuacións, de representacións, etc. Unha nova edición da feira literaria de Bergantiños á que non podes faltar.»
PROGRAMA
XOVES 23
11.00 h: Inicio da Praza dos Libros 2007 e Ciclobiblioteca.
12.30 h: Presentación da Praza dos Libros e do terceiro trimestre do programa Literactúa, de difusión do libro e a lectura en galego (setembro, outubro, novembro).
13.00 h: Inauguración e pregón de Mercedes Queixas Zas.
19.30 h: Presentación de Solidariedade Galega co Pobo Saharauí, coa presenza de Mahmoud Elhda, subdelegado saharauí para Galiza.
20.30 h: Presentación de Lingua, nación e identidade, de Xosé Ramón Freixeiro Mato.
21.30 h: Recital-presentación de As horas de María, de Paco Souto.
VENRES 24
11.30 h: A fábrica da fantasía: Actividades veloces para facer e levar (actividade para nenas, nenos e maiores). Contos rápidos para levar. Poemas a toda máquina. Imaxes que contan historias.
20.00 h: Actuación de Títeres Viravolta. Unha de piratas.
21.00 h: Presentación conxunta de Arte e parte, de Xurxo Borrazás, e da reedición de Crónicas de Carballo I, de Xan Fraga.
22.30 h: Concerto da caboverdiana Nancy Vieira.
SÁBADO 25
13.00 h: Presentación de Historia dunha lata e de Lume!, de Alberto Varela Ferreiro.
19.30 h: Presentación de Seavia é nome de parroquia, de José Antonio Andrade.
20.30 h: Presentación de O bosque de Nadgor, de Farruco Graña.
21.30 h: Concerto-presentación Hai cu. Pintadas no váter, de Leo i Arremecághona.
DOMINGO 26
11.00 h: Un libro, un pan. Todas as persoas que merquen algún libro serán agasalladas cun pan da marca Pan de Carballo.
12.00 h: Sinatura de libros de Santiago Jaureguizar.
20.00 h: Charla dramatizada de María Mariño, por Brais Fernández Álvarez.
21.30 h: Concerto do cantautor cubano Norge Batista e remate da feira.
IV Premio Arume de poesía para nenos
«A Fundación Xosé Neira Vilas presentou hoxe a IV convocatoria do premio de poesía infantil en lingua galega ‘Arume’, dotado con mil euros, coa fin de fomentar a creación lírica dirixida á poboación escolar. Nela poderán participar persoas de calquera nacionalidade que presenten textos inéditos escritos en galego antes do 31 de outubro.» (xeraciónweb) Aquí as bases do premio.
Presentación en Compostela do “Catálogo de literatura infantil e xuvenil” da Fundación Germán Sánchez Ruipérez
O martes 10 de xullo, ás 12:30 horas no Salón de Actos do Centro Sociocultural O Ensanche (Frey Rosendo Salvado, 14-16 baixo, Santiago de Compostela), terá lugar o acto de presentación do Catálogo de Literatura Infantil e Xuvenil da Fundación Germán Sánchez Ruipérez. (GÁLIX)
Gadis repartirá 8.000 exemplares d’ «O xabaril branco», de Tucho Calvo
“Gadis repartirá entre os seus clientes oito mil exemplares da novela xuvenil O xabaril branco, unha historia escrita por Tucho Calvo e ilustrada por Miguelanxo Prado. Nos establecementos que a cadea de alimentación ten en León distribuirase a tradución ao castelán do libro. Gadis quere así fomentar a lectura entre os máis novos, e regalará o libro a todos aqueles que fagan unha compra superior aos 30 euros ata que se acaben as existencias da novela.” (La Voz de Galicia)
Presentación n’ A Coruña de “Punver”, de Yolanda Castaño
Mañá sábado día 16, ás 12:30, preséntase Punver, o último libro da escritora Yolanda Castaño. Será na Biblioteca Municipal Infantil Xuvenil (r/ Durán Loriga, 10 – baixo), “nun acto aberto a todo o público interesado, en especial aos máis pequenos, a partir de 3 anos. A actividade está pensada coma un contacontos moi participativo a cargo de Yolanda Castaño, seguido dun obradoiro de pintura no que os nenos e nenas poderán gozar con Punver da man do ilustrador Eduardo Hermida.”
Ditaminados os Premios Xerais 2007
Presentación en Ferrol de “Tartaruga”, de Xaquín Marín
A presentación do libro Tartaruga, de Xaquín Marín (Baía Edicións), terá lugar en Ferrol o martes 12 de xuño ás 20:00 horas na carpa da Feira do libro (Cantóns de Molins). Intervirá, ademais do autor, o escritor Antón Cortizas.
