Mañá xoves 24 de setembro de 2009 ás 20 horas, no Museo Provincial de Lugo celébrase unha nova edición da revista oral de periodicidade trimestral O pazo das musas, nº 19, cos seguintes contidos: Activismo cultural, a cargo da Asociación de Amigos do Patrimonio de Castroverde; Exposición virtual: Un bosque nas miñas lembranzas, por Laura Pernás; Poesía, por Xiana Arias Rego; Xoias do Museo: Xoias tradicionais do MPL, por Mª del Rosario Fernández, e Música, a cargo de Celina da Piedade. A entrada é de balde. Máis información na web do museo.
Arquivo da categoría: Revistas
Dispoñible na rede Galicia21: Journal of Contemporary Galician Studies
Galicia21, a primeira revista académica online de estudos galegos xa está dispoñible na rede e recibe dende o seu lanzamento no pasado mes de xullo máis de 60 visitas diarias de lectoras e lectores de todo o mundo. Os editores da revista son Craig Patterson (Cardiff University) e Helena Miguélez Carballeira (Bangor University). Grazas ao seu formato innovador e á achega multidisplinar e crítica que a revista pretende promover para a disciplina dos estudos galegos contemporáneos, o medio está sendo consultado polas comunidades investigadoras e académicas de todo o mundo, sendo os Estados Unidos, Brasil, España e o Reino Unido os países dende os que teñen partido a maioría das pescudas.
O primeiro número de Galicia21 inclúe, entre outros, artigos académicos da escritora e tradutora María Reimóndez, a poeta e académica María do Cebreiro, e Anxo Lorenzo, profesor da Universidade de Vigo e actual Secretario Xeral de Política Lingüística. Tamén inclúe a título de autor convidado un artigo do escritor Miguel Anxo Murado e unha entrevista a Domingo Villar, autor de Ollos de auga, co motivo da súa conferencia no Festival do Libro de Edimburgo no verán de 2008.
Galicia21 manterá este formato nos vindeiros números, sempre incluíndo artigos académicos, recensións de publicacións académicas recentes e un artigo convidado de cariz máis creativo ou especulativo. O obxectivo principal da primeira revista académica de estudos galegos dispoñible na rede e en formato bilingüe (galego e inglés) é o de convertirse nun punto de encontro e de referencia para o crecente número de investigadoras e investigadores que conforman a comunidade académica internacional dos estudos galegos contemporáneos.
Novo número da revista Foeminas
Xa está dispoñible online o número 42 da revista Foeminas (Revista Virtual de Xénero). Foeminas está editada pola Concellería de Muller e Servizos Sociais. Para ler este número e os seus números anteriores só é preciso entrar na web da revista. Podedes visitar tamén a canle de Foeminas en Youtube.
Semana das Letras Galegas en Faro
Programa da Semana das Letras Galegas organizado polo Centro de Estudos Galegos da Universidade do Algarve, en Faro:
4ª feira, 27 de Maio. Faculdade das Ciências Humanas e Sociais (FCHS), sala 2.35, às 14:30h: Grupos minorizados e literatura galega: Estratexias de resistencia e a incorporación das escritoras. Conferencias a cargo de Mario Regueira e Lorena Souto.
5ª feira, 28 de Maio. Sala 2.35 da FCHS, 14:30h: Apresentación da revista Dorna. Expresión Poética Galega.
6ª feira, 29 de Maio. Associação dos Músicos, Faro. 21:30h: Concerto de Migna Mala (Algarve), Nanook e os vagabundos (Algarve) e Leo i Arremecaghona!!! (Galiza)
Sábado, 30 de Maio. Pátio de Letras. 21:30h: Presentación de Estaleiro Editora e concerto de músicas de protesto (O Leio e José Mário Branco)
Xa está na rede o número de marzo da Revista Foeminas
Xa pode consultarse online o número de marzo de 2009 da revista Foeminas (Revista Virtual de Xénero), editada pola Concellería de Muller e Servizos Sociais. Neste número, a sección Historia de Mulleres dedica unha homenaxe ás pioneiras e máis representativas mulleres traballadoras galegas, e as primeiras en ser visibilizadas. A Galería de Arte recolle o traballo dunha pioneira e moi vixente profesional da fotografía, a lucense Mary Quintero. Contemporáne@ multiplícase ao presentar á poeta Emma Luaces, heterónima de Carmen Blanco. En Portada brinda a primeira parte dun informe denominado As mulleres e o traballo. Apuntes para saber por que e como se da a desigualdade entre homes e mulleres. A profesora e escritora Virginia Ferrer reflexiona no artigo E Darwin da súa costela creou á muller sobre o bicentenario do nacemento do científico inglés e a súa relación co xénero feminino. Javier Prado Espiñeira relata a súa admiración e recoñecemento pola pedagoga italiana María Montessori. Para rematar, en Mullerciclopedia publícase a crítica de Cristina Corral Soilán sobre a novela A elegancia do ourizo da francesa Muriel Barbery.
Novo número da revista Foeminas
Xa está dispoñible online o número de febreiro de 2009 da revista Foeminas (Revista Virtual de Xénero). Foeminas está editada pola Concellería de Muller e Servizos Sociais do Concello de Lugo. O número de Foeminas correspondente a febreiro pon o seu acento na linguaxe e na comunicación, e leva á portada a segunda parte do artigo de Cristina Corral Soilán chamado Limitacións na linguaxe non verbal: a imaxe da muller na publicidade. A sección Enlazad@s toma tamén como eixe central a linguaxe, o discurso e a comunicación cun artigo denominado O que non se nomea non existe. A sección Contemporáne@ recorda o ingreso de Margarita Ledo Andión na Academia das Letras Galegas. Historia de Mulleres recolle a conmovedora historia da “nai dos dereitos civís” en EE.UU., Rosa Parks. A Galería de Arte ofrece o traballo da destacada e tamén esquecida pintora mexicana María Izquierdo, mentres que Mullerciclopedia ocúpase do primeiro libro de poemas de Lupe Gómez chamado Pornografía.
Vigo: presentación do nº 24 de “Festa da palabra silenciada”
O grupo Feministas Independentes Galegas (FIGA) e a Concellería de Igualdade do Concello de Vigo organizan hoxe xoves 19 de febreiro a presentación do nº 24 de Festa da palabra silenciada, que leva por título O verbo patriarcal. Será no Salón de Actos da Escola de Artes e Oficios de Vigo, na rúa García Barbón, 5. No acto participarán as colaboradoras Olga Castro e Victoria Lojo e a directora da revista María Xosé Queizán, así como Laura López, Concelleira de Educación e Iolanda Veloso, Concelleira de Igualdade.
Xa está nas rúas o novo número da revista Atenea
O Ateneo Ferrolán, fundado en 1879, anuncia que xa está nas rúas o número 33 de Atenea, a revista trimestral que promoven e que ofrece información sobre os servizos e horarios do Ateneo, interesantes artigos de opinión, a análise dos concursos e actividades e a programación do trimestre. Se desexan recibir a revista ATENEA, consulten as condicións para asociarse ou subscribirse nos enderezos de contacto do Ateneo:
Ateneo Ferrolán
Rúa Magdalena 202-204, 1º.
CP.15402 – FERROL (A Coruña)
Apdo. Correos: 303
Telf.: +34 981 357 970
Fax: 981 354 098
secretaria@ateneoferrolan.org
A Coruña: presentación do nº 179 da revista Grial
O luns 22 de decembro, ás 20:00 no Centro Sociocultural da Fundación Caixa Galicia (Médico Rodríguez, 2-4), terá lugar a presentación do número 179 da revista Grial, que leva como epígrafe “O idioma cara ao futuro”. Participarán Víctor F. Freixanes e Henrique Monteagudo, codirectores da revista Grial, Teresa Porto, directora da Fundación Caixa Galicia, Anxo M. Lorenzo, profesor de Filoloxía Galega na Universidade de Vigo, e Xaime Subiela, politólogo e asesor da Consellería de Cultura.
Novo número de Foeminas (Revista Virtual de Xénero)
Xa está disponíbel o número 31 da revista foeminas. Para consultala, só é preciso entrar na web da revista.
Foeminas chega ao seu número o 31 celebrando o seu terceiro aniversario e conmemorando o Día Internacional pola Eliminación da Violencia contra as Mulleres. Estas datas están totalmente relacionadas como o demostran, na nosa Portada, os artigos “Un aniversario máis” e “VII Xornadas Locais sobre Violencia de Xénero”.
Tamén ofrecemos na Portada unha breve reflexión sobre este terceiro aniversario de Foeminas titulado “E que cumpras moitos máis.”. Neste espazo ademais expoñemos a sección habitual Contemporáne@ dedicada á frautista galega Alicia Val Basanta e unha entrevista realizada por Cristina Corral Soilán á recoñecida cociñeira Beatriz Sotelo Sequeiros quen acaba de recibir un premio polo seu traballo.
Historia de Mulleres presenta a primeira parte da vida da mundialmente coñecida pintora Maruja Mallo e na Galería de Arte un artigo sobre Nancy Spero de Luz Darriba.
Mullerciclopedia achéganos a crítica do libro de poemas “Esencia de trementina” de Cristina Corral Soilán realizada por Esperanza Carballos. Este libro foi recentemente publicado e presentado e conta cun enorme valor afectivo para a nosa revista.
Para rematar, poderán gozar das nosas seccións tradicionais como “Viaxeiras”, “Foeminas panorámica,” “Mullerecetario” e “Noticias” con novas e renovadas achegas.
