«A que xa é a XXII edición do Festival de Poesía do Condado bota a andar en Salvaterra de Miño o próximo xoves 4. Este ano, o encontro preséntase como foro de achegamento ás reivindicacións populares e veciñais fronte aos intereses empresariais, co lema ‘Galiza non se vende’.[…]» (A Nosa Terra)
Arquivo da categoría: Sociedade
O “caso Steiner” continúa en xornais e blogues
Despois do que foi sen dúbida unha entrevista con afirmacións desacertadas de George Steiner sobre a cultura galega, as reaccións particulares e asociativas tamén cuestionan a responsabilididade do autor da entrevista, o xornalista Juan Cruz. Ante isto o propio xornalista tamén se manifesta, dando lugar a unha situación en que o debate sobre o que somos como cultura e o que proxectamos fóra está a resultar inevitábel. Poder seguirse o debate a partir das intervencións seguintes:
1. AELG reacciona fronte ás declaracións de George Steiner
2. Pen Clube de Galicia ante a entrevista a George Steiner
3. Steiner: superar a fase da indignación
4. O Pen Clube critica Juan Cruz pola entrevista a George Steiner
5. Juan Cruz: “He sido siempre un defensor de la cultura y la literatura gallega”
6. O de marras
7. “Síntome ferido”
8. “A temeridade dun filósofo”
9. Bomba no PEN Clube polo “caso Steiner”
10. “o pallaso Steiner, os cartos”
A Coruña: un monumento para Alexandre Bóveda
O sábado 30 de agosto ás 13:00 inaugurarase na Coruña o monumento a Alexandre Bóveda. Será na praza do mesmo nome, ubicada na zona dos Catro Camiños. Intervirán no acto Roberto Catoira (Presidente da Agrupación Cultural Alexandre Bóveda), María Xosé Bravo (Concelleira de Cultura) e Henrique Tello León (Alcalde en Funcións). O evento comezará ás 12:30 e incluirá as actuacións do Coro Alexandre Bóveda e da Banda Municipal interpretando o Himno Galego.
Promoven esta iniciativa a Agrupación Cultural Alexandre Bóveda e o Concello da Coruña.
Pen Clube de Galicia ante a entrevista a George Steiner
«[…] En relación coa afirmación do filósofo, ensaista e crítico literario, George Steiner, expresada ao xornalista e escritor Juan Cruz, na devandita entrevista, o P.E.N. de Galicia manifesta:
Que o ignorante atrevimento do vedraio intelectual, nado en París en 1929, nas súa afirmación sobre “la obrigatoriedad de hablar en gallego en una universidad de España” e o seu desprezo pola literatura galega, comparándoa pexorativamente coa catalá, puido ser remediado, perfectamente, polo entrevistador.
Juan Cruz, máis que entrevistador coautor de Yo intento fracasar mejor mejor, non é un octoxenario desinformado. Este escritor canario coñece a existencia e a traxectoria da literatura galega, trata directamente a varios autores actuais, non se lle escapan nomes como o de Álvaro Cunqueiro, Rafael Dieste, Eduardo Blanco-Amor, Celso Emilio Ferreiro, Carlos Casares, Alfredo Conde…e ten participado en numerosas actividades literarias en Galicia, a última nas Xornadas de Mariñán, organizadas pola Fundación “Carlos Casares”, do 4 ao 7 de xuño pasado.
Non cabe dúbida ningunha de de Juan Cruz aproveitou as declaracións de George Steiner para botar leña ao lume na actual situación lingüística e literaria no Estado das Autonomías, co “Manifiesto por la lengua común” como telón de fondo. Pouco lle debemos agradecer a partir de agora, ao simpático e poderoso novelista, que acostuma a festexar os “chistes de gallegos”, os que loitamos, día a día, en Galicia e nos foros internacionais, pola pervivencia da literatura de noso.» (Galicia-Hoxe)
AELG reacciona fronte ás declaracións de George Steiner
A AELG LAMENTA QUE GEORGE STEINER DESCOÑEZA E DESPRECE A LINGUA E A LITERATURA GALEGAS.
(A Coruña, 27 agosto 2008).- A Asociación de Escritores en Lingua Galega (AELG) lamenta profundamente as declaracións de George Steiner a respecto do noso idioma e da nosa literatura. Non podemos aceptar, nin pasar por alto, que unha persoa de probada valía intelectual, que no seu día recibiu o premio Príncipe de Asturias da Comunicación, manifeste un descoñecemento tan elevado da nosa literatura e non teña reparos en demostralo nunha entrevista, amosando un total desprezo polo que non coñece, facendo gala da súa ignorancia e demostrando unha nula gratitude cos cidadáns do Estado que un día o premiou.
A AELG quere pensar que estamos ante un caso de descoñecemento temerario da nosa tradición literaria, e non ante un prexuízo, que non poderíamos entender nunha persoa desta traxectoria e que, no entanto, si é quen de entender a cuestión catalá. Por tanto convidamos ao señor George Steiner a visitar o noso país e coñecer a nosa lingua e a nosa cultura, manifestándolle que nos encantará ilustralo sobre as antigas e fértiles orixes da lingua galega e da súa literatura, que transcendeu as fronteiras da Península, converténdose o noso legado literario medieval en modelo literario culto de referencia, e aínda hoxe é obxecto de admiración e estudo en todos os países do mundo, como o demostra a produción editada nas diversas manifestacións de xéneros literarios, ora clásicos ora en proceso de reinterpretación, as traducións a múltiples linguas europeas, a súa presenza en congresos, seminarios, encontros e outros foros literarios canda representantes doutros sistemas literarios, os importantes premios e recoñecementos conseguidos polos escritores e escritoras en lingua galega, no panorama estatal e internacional, así como os milleiros de páxinas escritas, dentro e fóra do país, ao redor da reflexión teórica que a creación literaria en lingua galega provoca nos estudosos e críticos.
Para a AELG esta é unha demostración palpábel da necesidade de impulsar as estruturas estábeis xa existentes e espalladas polo mundo, destinadas á promoción e ensino da lingua e da cultura galegas, así como crear outras novas que vinculen a identidade galega, e as súas diferentes manifestacións, cos centros internacionais de prestixio, á procura da necesaria internacionalización da nosa lingua e cultura desde presupostos claramente identificadores dunha terra con cultura milenaria e unha identidade propia.
SAÚDOS
GABINETE DE COMUNICACIÓN DA AELG
Tel. 660 530 525
Correo-e: prensa@aelg.org
Novo número de Foeminas (Revista Virtual de Xénero)
Xa está disponíbel o número 29 da revista foeminas. Para consultala, só é preciso entrar na web da revista.
Amplíase o prazo do Premio Concepción Arenal para temas de interese social
Amplíase o prazo de entrega de propostas para o Premio Concepción Arenal ao 30 de setembro de 2008.
Publícase A conta atrás, unha novela gráfica inspirada na catástrofe do Prestige
Publícase <em>A conta atrás</em> (Faktoría K), unha novela gráfica inspirada na catástrofe do Prestige. Con guión de Carlos Portela, ilustracións de Sergi San Julián, prólogo de Manuel Rivas e entrevista de Álvaro Pons.
“Entre dous séculos”: III Encontro de Escritores/as Novos/as
A Asociación de Escritores en Lingua Galega, co apoio da D. X. de Xuventude e Solidariedade, da Deputación da Coruña e da S. X. de Política Lingüística, está organizando para os días 26 e 27 de setembro o III Encontro de Escritores/as Novos/as, no Pazo de Mariñán.
Dáse así continuidade a esta actividade cuxa segunda edición tivo lugar en 2002. Á volta de seis anos é tempo de que, co lema “Entre dous séculos”, teñamos ocasión de revisar a creación máis nova do noso sistema literario, concretamente a daqueles/as autores/as que comezaron a publicar desde os noventa até o día de hoxe. Para isto, prográmanse catro mesas redondas cos seguintes títulos e relatores/as:
-Cartografías literarias no novo século: Oriana Méndez, Mario Regueira, Rubén Ruibal.
-Presenza e invisibilidade das/os escritoras/es na sociedade actual: Iolanda Aldrei, Ana Acuña.
-A literatura. Internet e novas tecnoloxías: Lara Bacelo, Leo Campos, Eduardo Estévez.
-Literatura, sociedade, nación: María Reimóndez, Rafa Villar, Carlos Negro.
Haberá tamén un recital no Museo de Belas Artes da cidade da Coruña co título xenérico de “Antes mort@s que solemnes”.
A actividade está aberta a todos os asociados/as, aínda que vai enfocada especialmente aos/ás que veñen publicando desde os 90 até a actualidade, e que terán prioridade dado o límite de prazas do Pazo de Mariñán. É por iso que desde xa se abre o prazo para solicitalas, que se estende até o 12 de setembro. De resto, a asignación farase, alén de polo criterio xa citado, por estrita orde de chegada da solicitude a este mesmo mail. A Asociación faise cargo de todos os gastos de estancia.
A Aelg editará un número da súa revista Escrita Contemporánea coas Actas deste encontro. Nelas, ademais das intervencións nas mesas redondas, e co ánimo de ter unha visión máis completa do tema proposto, quérese dar oportunidade a todos os socios/as da Aelg que empezaran a publicar desde os 90 até hoxe, de que nos envíen en forma de texto (4 páxinas de 1800 caracteres como máximo), a súa reflexión persoal de como ven situada a súa persoal traxectoria creadora dentro do sistema literario; a reflexión estenderase tamén a analizar se o concepto de xeración é válido para entender a nova produción literaria, ou se deixou de ter utilidade tendo en conta que as recentes tecnoloxías permiten desenvolver formas de creación, de difusión e colaboración inéditas; así mesmo, as achegas poderán concluír se hai ou non os suficientes elementos novidosos na escrita dos novos/as que permitan caracterizala no seu conxunto. Estas achegas entregaranse neste mesmo mail até o 15 de outubro.
(O Consello Directivo da Aelg)
Bos Aires: V Xuntanza aberta do obradoiro ‘Cousas de mulleres’
(Bos Aires, 30 de xulio) – O colectivo de galegas na emigración Herbas de Prata organiza o sábado 9 de agosto a quinta xuntanza dos seus obradoiros “Cousas de Mulleres” coa intención de abrir un espazo para a voz das mulleres, un sitio no que elas sexan escoitadas e teñan a liberdade de falar de todo canto viven, pensan e sinten.
A cita será na Asociación hijos del ayuntamiento do Porto do Son o vindeiro sábado 9 de agosto ás 15,30 horas na rúa Mariano Acosta 240, da localidade de Avellaneda.
Os obradoiros vivenciais están a percorrer as institucións da colectividade galega en Bos Aires, alí onde cada centro ou asociación abra as súas portas. “Unha vez ao mes abrimos estes faladoiros onde o que buscamos é escoitarnos, é falar do que nos pasa como mulleres, como emigrantes, como nais ou fillas ou avóas ou netas, como traballadoras ou como personas no paro. Falar, ou sexa, do noso vivir como mulleres”, detallaron dende Herbas de Prata. Máis información en herbasdeprata@gmail.com.
