Este venres (sexta-feira) as 20.00 no Museo do Mar de Vigo, inagúrase a exposición “Onde o Mundo se chama Terranova”. O núcleo desta exposición son as lembranzas, fotos, obxectos e experiencias vitais recollidas por cinco biólogos galegos (Anxo Fdez-Arroyo, Euloxio Vázquez, Lorenzo Suárez, Enrique álvarez Escudero e Xavier Queipo) a bordo dos navíos bacalloeiros faenando en Terranova entre 1982-1990. A importancia desta exposición está no carácter documental sobre unha pescaría que xa desdapareceu, vista tal e como era hai máis de dúas décadas.
Arquivo da categoría: Sociedade
Compañeiros/as da AELG:
Coa intención de facerlle fronte á globalización e dado que semella posíbel a revitalización e repoboación do noso agro, propóñovos que entre todos/as recuperásemos o nome dos produtos que nel se daban e quizais se volvan dar. Porque as novas xeracións non saben o que é unha saborosa camoesa ou un delicioso peruco e en troques coñecen a encerada “red winter” e a insípida “golden” que lles venden no supermercado.
Trátase de, ademais de achegar nomes de castes de froitas, verduras e outros produtos do campo, facer cando se crea necesario unha pequena descrición, resaltar as súas características.
Tamén sería interesante saber particulares tratamentos ou embutidos non comúns da carne do porco ou doutros animais.
Fundamental, como no resto das palabras con memoria, é poñer o lugar de escoita.
Enviade as vosas achegas ao e-mail da sección: palabra.con.memoria@aelg.org
Podedes ver aquí a colleita de palabras con memoria a día de hoxe. Espero que esta proposta sexa do voso interese.
Isidro Novo, Vogal da Aelg en Lugo.
Viaxe literaria a Lóuzara
VIAXE LITERARIA A LÓUZARA
Se viñeras a min polo avesedo
dunha norteira fraga de veludo,
o viño meu xa non sería acedo.
Nin acedo sería o tempo rudo,
pois farías da miña vida un ledo
paraíso de amor no vento mudo.
Fiz Vergara, Nos eidos da bremanza
Lóuzara a Xabreira, o val máis cheo de risos deste país, o berce da poesía do Fiz e o lugar máis máxico para todos os ERGUEITOS, un centro alimentador, un lugar de repouso. Os centos de castiñeiros a tripar polas encostas, o silencio, o río, a Fonte da Cova, o muíño do Fiz, a fervenza de Augadalte e o pozo de Beltrán. Porque ningún lugar hai mellor para metamorfosearse en auga como o Fanto Fantini de Cunqueiro e escapar dos cárceres da vida. Convidámosvos a todos a acompañarnos en xuño *(o día 14)* á nosa viaxe literaria a Lóuzara, para recitar aos outeiros os versos do Fiz que voarán polo ceo do seu val como bolboretas preñadas de ilusións. Quizais teñamos tempo para perdelo, coñezamos o noso interior como un mapa de sentimentos e escoitemos aos recitadadores como a música dos ríos de Lóuzara.
Agardaremos por vós na Casa da Cultura de Sárria ás 12:00 para saír cara Paredes de Lóuzara ao Mesón de Paredes onde nos agarda o comezo. Confirmade por mail (*mariacasar@hotmail.com* ) ou nos teléfonos 678 60 15 50 (María) ou 677 429 225 (Xerardo).
Solicitude de voluntarias/os
A ONGD Implicadas/os No Desenvolvemento solicita a colaboración de persoas voluntarias interesadas en participar e organizar un evento de sensibilización que se vai a celebrar en Santiago de Compostela o día 7 de xuño.
O Camiño da Auga é a actividade de sensibilización que consiste nunca peregrinaxe simbólica dende a Porta do Camiño ata a Praza da Quintana. Nesta peregrinaxe convidarase a mulleres do mundo da política, cultura e o deporte de Galicia e á sociedade de Santiago para cargar cos colectores de auga que levan as mulleres en Etiopía como un xesto de solidariedade e unha forma de visibilizar esta situación. Ao mesmo tempo realizaranse actividades de teatro e animación organizadas por grupos de voluntariado de Implicadas en diferentes prazas da zona vella de Santiago: Praza do Obradoiro, Praza de Cervantes e Praza de Praterías.
Na Praza do Quintana farase o acto central da campaña. Instalarase un escenario onde as participantes lerán un manifesto e realizarase unha actuación do grupo etíope de danza contemporánea Adugna e Nova Galega de Danza sobre o tema da auga. Tamén se contará cunha actuación musical.
Todas aquelas persoas interesadas en participar e/ou colaborar nesta actividade poden poñerse en contacto coa organización a través do seguinte número de teléfono: 650 798 163. Non perdas esta oportunidade única e implícate connosco! Agradecemos máxima difusión. Grazas!
Gabinete de comunicación de Implicadas No Desenvolvemento
Bookcrossing no Val Miñor por Espazo Lectura
O colectivo Espazo Lectura promove a partir deste próximo sábado unha campaña de bookcrossing no Val Miñor, que conta coa colaboración dos Concellos de Baiona, Gondomar e Nigrán. A iniciativa suporá a liberación de 120 libros en diferentes espazos públicos dos tres concellos para que a xente poida collelos, lelos e volver a deixalos ceibes co obxectivo de que outras persoas poidan atopalos. O acto de prensentación da campaña terá lugar o próximo sábado, 10 de maio, ás 11 da mañá, nos xardíns do parque da Ramallosa, ao lado da antiga estación do tranvía, e contará coa presenza de representantes de Espazo Lectura e dos tres alcaldes e outros representantes das corporacións municipais de Baiona, Gondomar e Nigrán.
Esta iniciativa, que bota a andar na Semana das Letras Galegas, ten como obxectivo achegar o libro galego aos veciños e veciñas do Val Miñor, fomentar a lectura e divulgar a iniciativa do bookcrossing na nosa zona. Os 120 libros rulantes que se van liberar foron rexistrados por Espazo Lectura na web oficial de Bookcrossing e están etiquetados cun número de identificación que permite que as persoas que os atopen poidan entrar na web e dar conta do lugar onde os atoparon, deixar algún comentario sobre a súa lectura e indicar onde os volveron deixar para que outras persoas poidan buscalos. A solta de libros vai acompañada da edición de 10.000 folletos nos que se explica o espírito da campaña e o que hai que facer se se atopa un destes libros e serán distribuídos a través de centros de ensino, bibliotecas, asociacións culturais e veciñais, etc.
Máis información aquí ou no 619292991.
Acto de homenaxe a Curros na Coruña
A Concellaría de Cultura do Concello de Coruña e a Real Academia Galega promoven un acto cívico en homenaxe a Curros Enríquez. Será o sábado 5 de abril de 2008 ás 17:30 horas, e consistirá nun cortexo de honra a Curros Enríquez que comezará no cemiterio de San Amaro e finalizará nos Xardíns de Méndez Núñez. Tamén terá lugar a actuación das corais Follas Novas, Cántigas da Terra, El Eco e Toxos e Frores.
Homenaxe “Os Bos e Xenerosos” á AS-PG
Debido a obrigas profesionais inaprazábeis por parte da organización, participantes e asistentes, a Aelg vese na inevitábel obriga de adiar para o SÁBADO DÍA 12 DE ABRIL a Homenaxe “Os Bos e Xenerosos” que se lle ía ofrecer á Asociación Socio-Pedagóxica Galega o 29 de marzo próximo.
Por tanto, o acto de recoñecemento público desenvolverase co mesmo programa o SÁBADO 12 de ABRIL, a partir das 11:45 da mañá, no Auditorio do Centro Galego de Arte Contemporánea de Santiago de Compostela (Rúa Valle Inclán, s/n).
Desta maneira, alárgase tamén o prazo para se apuntar para o xantar de confraternidade que que compartiremos no restaurante do Hotel Porta do Camiño (Rúa Miguel Ferro Caaveiro, s/n), a partir das 14:30. Podedes confirmar a vosa asistencia ata o 8 de abril en oficina@aelg.org ou no
teléfono 981 133 233, de 09:00 a 14:30 ou de 17:00 a 20:00. O prezo do menú, que se pagará no propio restaurante, será de 28€.
Acta do xurado do XIII Premio “Vicente Risco” en ciencias sociais
«Reunido o xurado, composto por Fernando Acuña Castroviejo (en representación do Concello de Castro Caldelas), Teresa Devesa Graña (en representación do Concello de Allariz), Luís Martínez Risco-Daviña (en representación da Fundación Vicente Risco), Francisco Fernández Rei (en representación da Fundación Sotelo Blanco), e Xosé María Eguileta Franco (en representación da Fundación Vicente Risco e Fundación Sotelo Blanco), acordou por maioría:
1.-Valorar a calidade científica dos traballos presentados.
2.-Conceder o XIII PREMIO “VICENTE RISCO” DE CIENCIAS SOCIAIS ó traballo presentado co título A PESCA FLUVIAL TRADICIONAL EN GALICIA. CANEIROS, PESCOS E PESQUEIRAS. Aberto o sobre correspondente, a persoa gañadora resultou ser Xosé Lois Ladra Fernández, domiciliado na Coruña.
Con gran rigor metodolóxico, cunha bibliografía actualizada e con excelente manexo das fontes documentais, o autor realiza unha oportuna investigación multidisciplinar sobre as pesqueiras ou caneiros de Herbón (Baixo Ulla), de Portomarín (Alto Miño) e Arbo (Baixo Miño) desde varias perspectivas complementarias: histórica, etnográfica, antropolóxica, arquitectónica, ictiolóxica, toponímica e lingüística.
O xurado espera que a difusión deste traballo contribúa a que a Xunta de Galicia declare Ben de Interese Cultural as devanditas pesqueiras, para así contribuír á revalorización da arquitectura tradicional dos ríos de Galicia.
Este premio está dotado con 6.000 euros e a obra gañadora será publicada por Sotelo Blanco Edicións.
Xosé Lois Ladra Fernández (A Coruña, 1972; tlf: 676 862 924) é licenciado en Xeografía e Historia pola Universidade Complutense e licenciado en Antropoloxía Social e Cultural
pola UNED. Profesionalmente desenvolve a súa actividade como arqueólogo e como investigador na área do patrimonio etnográfico galaico-portugués.
En Santiago de Compostela, a 8 de marzo de 2008»
Próximos actos literarios do Liceo de Ourense
O Liceo de Ourense programa para a semana próxima unha programación intensa, que ofrecemos a modo de avance:
Martes, 11 de marzo.
Organizado pola Sección de Literatura: Xornada adicada á memoria de Manuel Curros Enríquez no I Centenario do seu pasamento
12:00 horas. Colexio Curros Enríquez: Ofrenda floral e Recital diante da Estatua do Poeta polos Alumnos do Colexio. Intervención de Marcos Valcárcel.
20:15 horas. Salón Nobre do Liceo de Ourense: mesa redonda “Vida e obra de Curros Enríquez”. Interveñen Xesús Alonso Montero, Antonio Piñeiro e Marcos Valcárcel.
Mércores, 12 de marzo
Organizado pola Sección de Literatura: Xornada literaria “A Muller e a Poesía”.
20:15 horas. No Salón Nobre da Sociedade, con motivo da celebración do Día Internacional da Muller Traballadora: recital póetico-musical a cargo de Teresa Devesa e Loly Conde.
Presentarase en Compostela Migracións na Galicia contemporánea. Desafíos para a sociedade actual
O 28 de febreiro, ás 20:00 horas e na libraría Couceiro (Praza de Cervantes) de Santiago de Compostela, presentarase a obra Migracións na Galicia contemporánea. Desafíos para a sociedade actual (Sotelo Blanco Edicións, col. Diáspora Investigacións), coordinada por Xosé Manuel Cid Fernández, Xoán Carlos Domínguez Alberte e Raúl Soutelo Vázquez. Intervirán Francisco Xosé Fernández Naval, Juan Manuel Rey Rey , Xosé Manuel Cid, Julio Miras Amor e Olegario Sotelo Blanco.
