A
noite do 23 de xuño a asociación Espazo Lectura celebrará, un ano máis, un san Xoán alternativo con A Fogueira dos Versos: unha festa na que se combina a celebración popular desta data (con comida e cacharela), co recitado de poemas a carón do lume e cun espectáculo cultural que este ano correrá a cargo de Luís Correa “Caruncho”, quen, acompañado da súa zanfona, interpretará un repertorio de música tradicional.
A Fogueira dos Versos celébrase na Casa da Lectura a partir das 21:00 horas. As persoas que se animen a participar poden contribuír á festa traendo das súas casas algo de comida.
Arquivos da etiqueta: Espazo Lectura Gondomar
Gondomar: visita de Anxos Sumai ao Espazo Lectura
O
martes 3 de xuño, ás 20:00 horas, na Biblioteca de Gondomar, remata a tempada 2013-2014 do Sete Vidas cun libro de Anxos Sumai. Nesta ocasión a autora estará na biblioteca a partir das 21:00 horas para falar da súa novela A lúa da colleita cos lectores e lectoras da súa obra que queiran acudir.
Donas, Gondomar: conversa con Carlos Negro arredor de Penúltimas tendencias
Desde
Espazo Lectura:
“Este sábado 31 de maio a partir das 20:30 h. a Casa da Lectura (Nogueira, 8, Donas, Gondomar) acollerá a sesión de peche da tempada do Comando Le, que terá como actividade central un encontro dos rapaces e rapazas co poeta Carlos Negro para conversar sobre o seu último libro, Penúltimas tendencias. Con esta sesión despídense ata outubro as actividades do Comando Le, o grupo de activismo cultural para rapaces e rapazas de 12 a 15 anos que funciona desde outubro de 2012 dentro da programación de Espazo Lectura.
Carlos Negro, que xa participara nas actividades do Comando Le impartindo un obradoiro de poesía, volve a Gondomar para falar cos rapaces do seu último poemario, Penúltimas tendencias, un libro de versos que rompen as costuras do silencio, un diario onde unha adolescente convulsa e opaca atopa a voz que nunca tivo, un álbum secreto para todas aquelas mozas que tentan ir máis alá da gaiola rosa dos contos de princesas, fuxindo da ditadura dos espellos.”
Mañufe, Gondomar: Lecturas na Tapería, organizadas por Espazo Lectura
Gondomar: Antonio García Teijeiro no club de Lectura Lendo Contigo
O
sábado 29 de marzo, ás 12:00 horas, na Biblioteca de Gondomar, o club de lectura compartida Lendo Contigo de Espazo Lectura contará coa presenza do poeta Antonio García Teijeiro, autor da antoloxía de poemas proposta para este mes no club: Un rato díxolle á lúa (Xerais, 2013).
Gondomar: Manuel Rivas participa en Espazo Lectura para falar da súa obra O raposo e a mestra
O
sábado 1 de febreiro, ás 12:00 horas, na Biblioteca Municipal de Gondomar, vaise celebrar unha nova sesión do club de lectura compartida en familia Lendo contigo, actividade que organiza a asociación Espazo Lectura. Nesta ocasión contarase coa presenza de Manuel Rivas, que falará do seu último libro infantil: O raposo e a mestra (Xerais, 2013). Ao remate da sesión, haberá unha interpretación das cancións do libro a cargo da Banda dos Cueiros no que se poderán aprender e cantar pezas tan coñecidas como Frère Jacques, Des kleine krokodil ou I can sing a rainbow. Aqueles nenos e nenas que queiran participar de maneira activa na actividade, formando parte do coro da Banda, teñen que estar a partir das 11:00 horas na Biblioteca de Gondomar para un divertido ensaio xeral.
Gondomar: Nada se esquece, de Puri Ameixide, en Espazo Lectura
O
martes 14 de xaneiro, ás 20:00 horas, na Biblioteca Municipal de Gondomar, terá lugar a primeira sesión do ano do club de lectura Sete Vidas, de Espazo Lectura, na que se falará sobre a novela proposta para este mes: Nada se esquece, da autora Puri Ameixide, publicado por Redelibros, nun acto en que a autora se achegará á biblioteca para falar cos lectores e lectoras que desexen participar.
Santiago e Gondomar: Todo roto, con I. A. R. Legido e Xelís de Toro
Gondomar: coloquio con Antonio Yáñez en Espazo Lectura
O
sábado 23 de novembro, ás 12:00 horas, na Biblioteca de Gondomar, o Club de Lectura Sete Vidas de Espazo Lectura organiza un encontro literario con Antonio Yáñez Casal, que xirará sobre Lóbez, publicada en Baía Edicións, No acto estará presente o autor, con quen o público asistente poderá intercambiar impresións sobre a súa obra.
Gondomar: Vermú literario con Dolores Redondo en Espazo Lectura
O
domingo 6 de outubro, ás 12:00 horas, na Xamonería Catro Camiños de Gondomar, o Club de Lectura Sete Vidas de Espazo Lectura abre a súa tempada cunha sesión moi especial: un vermú literario con Dolores Redondo acompañado de polbo á feira. A escritora vasca Dolores Redondo é autora do thriller de éxito internacional O gardián invisible, traducido a numerosas linguas en todo o mundo e estará connosco en Gondomar para acompañar os seus lectores e lectoras. Neste acto poderanse compartir coa autora uns atractivos momentos de charla e intercambio de impresións.
