Arquivos da etiqueta: Libro aberto

Contidos do programa Libro aberto

Publicado o por

Esta semana visita o programa Libro aberto o escritor e guionista Emilio Alonso, que presentará Mercurio, a obra coa que gañou o Premio Novela por entregas de La Voz de Galicia.

O espazo da TVG analizará a evolución do humor gráfico en Galicia. Xaquín Marín e Xosé Lois González (O Carrabouxo) abordarán o tema comentando as súas últimas publicacións. Tamén falarán da nova proposta da editorial Galaxia: a colección infantil “Audiocontos”. Unha selección de obras infantís clásicas que se presentan como versións dramatizadas nun CD que contén música e narración oral.

Na sección de “Libros na Rede”, visitarán a páxina web de Biblos, a través da cal podemos, entre outras cousas, seguir a información relacionada co Premio Biblos Pazos de Galicia, descargar os diferentes números da publicación bimestral do club ou consultar un catálogo de títulos de recente aparición.

Todo isto hoxe 15 de decembro á noite despois da película na Televisión de Galicia. Tamén podemos ver o programa na G-2 (TDT) o mércores ás 20:00 horas.

Libro aberto, contidos do 8 de decembro

Publicado o por

Esta semana visita o programa a escritora viguesa María de los Ángeles Alfaya Bernárdez, coñecida no mundo literario como An Alfaya. A autora preséntanos a súa terceira novela para adultos, Areaquente. Unha historia na que un fotógrafo, Cristovo do Val, se adentra nun espazo desértico e inhóspito. De Areaquente falaremos coa escritora no MARCO, o museo de arte contemporánea de Vigo.

Ademais, coñeceremos á familia máis popular de Galicia, Os Bolechas. Falaremos co seu creador, Pepe Carreiro que nos contará cáles son os segredos deste fenómeno editorial.

Conversaremos con César Antonio Molina sobre a súa última novela Lugares donde se calma el dolor, o cuarto volume das súas memorias.

Tamén faremos un repaso pola traxectoria da editorial Rinoceronte. A piques de cumprir os cinco anos esta editorial, especializouse en traducións ó galego de literatura estranxeira.

Na sección de Libros na Rede, visitaremos a páxina web do ilustrador David Rubín. A través da súa páxina coñeceremos os traballos do artista no mundo do cómic.

Todo isto o 8 de decembro á noite despois da película dos martes, na Televisión de Galicia. Tamén poden ver o programa na G-2 (TDT) o mércores ás 20:00 horas. Ademais poden achegarse ao noso programa a través da nosa páxina web.

O programa “Libro aberto” da TVG dedicouse ao libro en castelán

Publicado o por

2 de outubro de 2009
libroaberto@crtvg.es

Saúdos,

Esta semana visita o programa o científico e escritor Germán Sierra para presentarnos a súa cuarta novela “Intente usar otras palabras”. O autor, encadrado na chamada Xeración Nocilla, relata nesta obra, da man do seu protagonista, moitas das obsesións da sociedade contemporánea.

E o pai do Proxecto Nocilla, o coruñés Agustín Fernández Mallo, preséntanos “Nocilla Lab”, a obra coa que pecha esta triloxía. Coméntanos tamén o documental, elaborado por el mesmo, no que podemos atopar moitas das claves do seu traballo creativo.

Trataremos tamén as técnicas do ilustrador Felipe Ugalde que foi o gañador co II Premio Compostela de Álbum Ilustrado ca súa obra “Un gran soño”. A este galardón, convocado polo concello de Santiago e a editorial Kalandraka, presentáronse máis de 280 proxectos procedentes de 22 países.

Na sección de “Libros na Rede”, abordaremos a web da Asociación Española Galega de Editores. Na páxina podemos atopar as novidades do mundo do libro así como información detallada sobre tódalas editoriais asociadas ou sobre os eventos que forman parte da axenda cultural galega.

E para rematar unha proposta pop de boas letras e mellores melodías: Señor Chinarro, coa que se presenta o cantautor sevillano Antonio Luque. O tema co que despedimos o programa, “Los Ángeles”, forma parte do seu disco “Ronroneando”.

Todo isto na G-2 (TDT) ás 20:00 horas.

Ademais poden achegarse ao noso programa a través da páxina web.

Redacción
Libro Aberto

Adeus ao programa Libro aberto da TVG

Publicado o por

Reproducimos polo seu interese a carta de despedida que acaba de enviarnos o responsábel do programa, Luís Rei Núñez:

Amigos do programa Libro aberto:

Nestes días estase completando o proceso de renovación do equipo directivo da Compañía de Radio-Televisión de Galicia, e os novos responsables da Galega tomaron a decisión de suprimir o Servizo de Cultura, creado en outubro de 2005.

Está por ver a continuidade de programas que nestes anos foron consolidándose na grella, como Miraxes, Planeta cine, Alalá, Onda curta ou Ben falado!. De momento, o primeiro que desaparece é Libro aberto, cuxa última emisión será a da noite do 24 de xuño.

Dado que ese programa de Libro aberto xa está gravado e non hai nel ningunha despedida dos seus seguidores e amigos, xa que a decisión nos foi comunicada con posterioridade, quero aproveitar o medio polo que habitualmente nos comunicamos para despedirme e agradecervos a vosa atención e interese.

Se en anos anteriores a pausa era só durante o tempo de verán, sabendo que volveriamos en setembro, esta vez, lamentablemente, descoñecemos se será un adeus para sempre, perdendo esta canle pública o espazo que durante catro anos acudiu puntualmente á súa cita semanal cos amantes dos libros e da literatura.

Foron 127 emisións, con máis de duascentas entrevistas a autores galegos (como Fernández Paz, Manuel Rivas, Marina Mayoral ou Luz Pozo Garza), e de fóra (como Bernardo Atxaga, Ferreira Gullar, Eduardo Galeano ou Luis Sepúlveda); con presenza en feiras como as de Guadalajara (México) ou Bolonia; con monográficos como os de Brais Pinto, Xosé María Castroviejo ou Ramiro Fonte; e, por que non dicilo, con recoñecementos como o Premio Fernández del Riego dos editores galegos e cunha audiencia que (sempre que a emisión foi os mércores ás doce e media da noite) triplicou a dos programas similares doutras canles públicas.

Lonxe de calquera sectarismo, prestando atención ás novidades da nosa ampla oferta editorial, e achegándonos a clubes de lectores e librerías de toda Galicia, Libro aberto acolleu autores de todos os xéneros e xeracións, que tiveron no espazo unha ventá inmellorable para conseguir a necesaria visibilidade na sociedade para a que traballan.

Desde o convencemento de que pechar para sempre un espazo dedicado ós libros sería un gravísimo paso atrás, despídome de vós formulando o desexo de que en setembro, e como á volta dos tres veráns anteriores, a Televisión de Galicia volva deixar que a literatura atope un moi necesario espazo nas súas emisións.

Un saúdo afectuoso,

Luís Rei Núñez
Director de Libro aberto

Libro aberto, programa do 20 de maio

Publicado o por

Libro Aberto recibe esta semana ao escritor Xosé Fernández Ferreiro, un dos membros fundadores do grupo Brais Pinto, que falará da súa última novela Tempo de Centeo. Unha das reportaxes semanais analizará a corrente artística do neorrealismo, movemento que naceu en Italia como resposta á necesidade de volver ao espírito da novela realista do XIX. Despois abordarán as etapas do proceso de edición con motivo da publicación de Do orixinal ao libro. Manual de edición, obra de Juan L. Blanco Valdés que analiza este proceso e fixa, por primeira vez en galego, os termos propios da edición técnica.

O escritor Francisco Fernández Naval falará do seu último libro, Para Seguir Bailando, un conxunto de dez relatos nos que aborda temas como o abandono do medio rural, a corrupción, a memoria ou o abuso exercido sobre a muller. Na sección de crítica, Xesús Fraga analizará a obra O corazón do negror do escritor Joseph Conrad, inspirada nos seis meses que o autor pasou no Congo colonizado de Lepoldo II de Bélxica. Pola súa parte, Isabel Soto analizará a obra ¿Quen matou a Inmaculada de Silva? de Marina Mayoral. Neste libro xuvenil aparece, como noutras obras da escritora mindoniense, o espazo imaxinario e simbólico de Brétema.

Pechará o programa unha referencia ao Projecto Miño, o último traballo dun dos músicos de jazz máis gabados pola crítica europea, o ferrolán Baldo Martínez. Cunha mestura de tradición e modernidade, o Proxecto Miño permítenos entender o jazz dende as súas orixes, onde predomina a fusión e a combinación de culturas.

Libro aberto emítese hoxe mércores 20 de maio á noite (00:45), na Televisión de Galicia. Tamén poden ver o programa na G-2 (TDT) o luns ás 23:30 horas, ou a través da páxina web.

Libro aberto, programa do 13 de maio

Publicado o por

Esta semana Libro aberto celebra o Día das Letras Galegas, recibindo ó ensaísta Antón Baamonde, que falará do homenaxeado deste ano, o filósofo e intelectual galeguista Ramón Piñeiro. Na primeira reportaxe do programa farán un repaso pola biografía de Ramón Piñeiro, figura clave para entender o galeguismo. Salvador García Bodaño dará as explicacións necesarias para entender por completo a figura do intelectual de Láncara. A seguir abordarán a actividade do Centro Ramón Piñeiro que, como o escritor que lle dá nome, contribuíu de xeito decisivo á normalización da lingua galega. Con máis de 150 publicacións no seu haber, este centro é un dos principais grupos de investigación en humanidades de Galicia. Ademais na sección de novidades literarias darán conta tanto das reedicións das obras de Ramón Piñeiro como das novas publicacións vencelladas ao homenaxeado.

O programa ocúpase tamén dos Premios Literarios Minerva que dende hai 50 anos e coincidindo coa celebración do Día das Letras Galegas outorga o colexio Manuel Peleteiro. Un certame de longa tradición que comezou chamándose Xogos Florais Minerva, e do cal saíron os escritores galegos máis importantes da nosa literatura actual.

Na sección de crítica Armando Requeixo explicará que ademais do noso Día das Letras Galegas existen outras efemérides literarias nacionais. Escocia, Irlanda ou Cataluña teñen días de homenaxe ás súas literaturas.

Pecha o programa unha novidade sobre o homenaxeado no Día das Letras Galegas de hai seis anos: a Fotobiografía do poeta Antón Avilés de Taramancos. Esta publicación gráfica e sonora de Ouvirnos permítenos recorrer as distintas etapas da vida e obra de Avilés de Taramancos.

Libro aberto emítese hoxe mércores 13 de maio á noite (00:45), na Televisión de Galicia. Tamén poden ver o programa na G-2 (TDT) o luns ás 23:30 horas, ou a través da páxina web.

Libro aberto, programa do 6 de maio

Publicado o por

Esta semana visita o programa Libro aberto a poeta e xornalista Olalla Cociña Lozano, que falará do seu terceiro poemario Libro de Alicia co que gañou o premio Fiz Vergara Vilariño.. A reportaxe semanal aborda a obra A Esmorga de Eduardo Blanco Amor, con motivo do cincuenta aniversario da súa publicación. O libro segue destacando pola súa modernidade, tratando unha historia na que se establece un diálogo no que non aparece un dos interlocutores..

O programa visitará a exposición Editar en galego baixo a censura franquista, organizada pola Fundación Penzol. A exposición, que recorrerá diferentes puntos de Galicia, aborda os avatares da edición en galego durante o Franquismo e o papel da censura como represor da literatura galega.

O investigador Xurxo Martínez falará do seu libro José Almoina, Pilar Fidalgo. EXILIO, obra que reivindica e rescata a historia de José Almoina, un lugués que foi vicecónsul da República en Burdeos.

Na sección de crítica, Carlos Quiroga falará do escritor portugués Miguel Real e da obra deste A Voz da Terra, refererida ao terremoto de Lisboa de 1755. Pola súa parte, Luis Alonso Girgado analizará a traxectoria literaria do nicaraguano Sergio Ramírez, cuxa obra reflicte a vida política e social de Nicaragua da segunda metade do século XX. Para rematar, imaxes do filme Parranda, a versión cinematográfica d’A Esmorga que o director asturiano, Gonzalo Suárez, dirixiu no ano 1977. Na película colaborou, como coguionista xunto ao director, o propio Eduardo Blanco Amor.

Libro aberto emítese hoxe mércores 6 de maio á noite (00:45), na Televisión de Galicia. Tamén poden ver o programa na G-2 (TDT) o luns ás 23:30 horas, ou a través da páxina web.

Libro aberto, programa do 29 de abril

Publicado o por

Esta semana visita o programa Libro aberto o escritor ourensán Xosé Carlos Caneiro, que falará do seu último libro, Blue Moon, unha novela publicada por Biblos Clube de lectura.

A reportaxe semanal abordará os Premios Biblos, galardóns para menores de 25 anos concedidos polo Biblos Clube de Lectores. O club organiza xa a quinta edición destes premios que lle permiten ao gañador rematar a súa novela asesorado por un escritor de renome.

Con motivo do vixésimo aniversario da fundación de Gálix, a asociación galega do libro infantil e xuvenil, o programa falará da súa actividade, especialmente o seu club literario “Tendendo redes”, que pretende instaurar un espazo de reunión e análise para autores, críticos e editores. Libro aberto conversará ademais coa escritora Marilar Aleixandre sobre a súa última novela A cabeza de medusa, que aborda o tema da violencia sexual. A obra foi galardoada co premio Fundación Caixa Galicia.

No espazo de crítica literaria Xavier del Valle Inclán fará análise do libro Correspondencia con el exilio que recolle as case mil cartas que Cela cruzou con trece escritores exiliados. O experto en teatro Carlos Franco falará de Cartas de amor a Stalin, Himmelweg e A Paz perpetua, de Juan Mayorga, unha colección de teatro que publica Galaxia en colaboración coa Escola de Arte Dramática de Galicia. O programa pecha cunha reportaxe sobre Rosalía 21, un proxecto que combina tres propostas coas que reler a obra de Rosalía de Castro nun espectáculo audiovisual.

Libro aberto emítese hoxe mércores 29 de abril á noite (00:45), na Televisión de Galicia. Tamén poden ver o programa na G-2 (TDT) o luns ás 23:30 horas, ou a través da páxina web.

Libro aberto, programa do 22 de abril

Publicado o por

Esta semana visita o programa Libro aberto o poeta, ensaísta e profesor lugués Claudio Rodríguez Fer, que falará do seu libro de poemas Ámote vermella. A reportaxe semanal aborda a exposición co mesmo nome, Ámote vermella, conectada con dúas obras literarias: os microtextos de Carmen Blanco publicados en Atracción Total e agora o poemario de Claudio Rodríguez Fer. Este proxecto multisoporte é unha idea inspirada no número Vermellas da revista “Unión Libre”.

O programa analizará ademais a figura de Daniel Mordzinski, tamén coñecido como “o fotógrafo dos escritores”, que retratou a moitos dos grandes nomes da literatura en español, tales como Vargas Llosa, García Márquez ou Cela.

Coma sempre haberá lugar para a crítica literaria. Nesta ocasión, Isabel Soto falará do libro infantil de Manuel Rivas O sombreiro Chichiriteiro, que edita Xerais. Despois, na sección de traducións, Xesús Fraga analizará a obra Do que estou a falar cando falo de correr, do xaponés Haruki Murakami. A lectura desta semana corre a cargo de Constantino Bértolo, que compartirá cos espectadores un fragmento da súa obra La cena de los notables. Para rematar, imaxes do documental Lister, pronunciado Liste da académica galega Margarita Ledo Andión. O filme analiza a Europa da Fronte Popular e a España da guerra civil a través da figura do dirixente comunista Líster e das mulleres que formaron parte da súa vida.

Libro aberto emítese mañá mércores 22 de abril á noite (00:45), na Televisión de Galicia. Tamén poden ver o programa na G-2 (TDT) o luns ás 23:30 horas, ou a través da páxina web.

Libro aberto, programa do 15 de abril

Publicado o por

O programa da TVG Libro Aberto entrevista esta semana a Marta Lemos Jorge, autora do libro Unha paixón herdada. Obra ambiental de José María Castroviejo, que se centra na produción xornalística deste autor considerado un precursor do ecoloxismo. Na reportaxe semanal farán un percorrido polos aspectos máis destacados da biografía de Castroviejo, e o seu neto Andrés Douglas Castroviejo e o profesor Xosé M. Salgado analizarán a súa personalidade e produción literaria.

O programa conversará ademais cunha das promesas da literatura en portugués, o escritor angoleño Ondjaki, autor, entre outros, do libro de relatos E se amañá o medo.

Abrirá a sección de crítica Armando Requeixo para falar dos tandems literarios, e despois Laura Caveiro comentará a obra de Jean-Paul Sartre As Moscas, traducida ao galego por Xosé Manuel Beiras.

A lectura desta semana corresponde a Gonzalo Navaza, que compartirá cos espectadores un fragmento da súa tradución do libro As flores do mal. E para rematar o programa, un clásico do cine, o filme de Henry King As neves do Kilimanjaro, adaptación libre da novela homónima de Ernest Hemingway. Todo isto hoxe mércores 15 á noite (00:45) na Televisión de Galicia, ou ben na G-2 (TDT) o venres ás 15:30 horas e tamén a través da súa páxina web.