O domingo 9 de xuño, ás 17:00 horas, no Xardín das Pedras que Falan (no Parque de Fonseca), en Santiago de Compostela, terá lugar o acto de descubrimento das pedras dedicadas ás escritoras Nolwenn Korbell, bretoa, e Adania Shibli, palestina. A inauguración será introducida polo poeta Claudio Rodríguez Fer, director da Cátedra Valente de Poesía e Estética da Universidade de Santiago de Compostela. A ensaísta e catedrática de Francés María Lopo, tradutora da autora bretoa ao galego, presentará e traducirá a Nolwenn Korbell. Sara Ashour, universitaria nacida en Gaza e criada e graduada en Galicia, traducirá ao galego a intervención en árabe de Adania Shibli.