Entrevista de Manuel Díaz Villaverde ao escritor Marcos S. Calveiro no xornal Galicia Hoxe. Ler a conversa completa.
Arquivos da etiqueta: Marcos Calveiro
Marcos S. Calveiro gaña o Premio Lazarillo de Narrativa Xuvenil
O autor anunciou a nova hoxe mesmo no seu propio blog:
“Unha novela miña que se titulará O pintor do sombreiro de malvas vén da gañar a edición 2009 na modalidade de narrativa xuvenil do Premio Lazarillo convocado pola OEPLI dende o ano 1958. O libro publicarase na primavera do ano 2010 en galego por Edicións Xerais, en castelán por Edelvives e en euskera por Ibaizabal.
A historia acontece na pequena vila francesa de Auvers, na ribeira do río Oise, durante sesenta e nove días do verán do ano de 1890 e está protagonizada polo rapaz do lenzo que acompaña ao pintor do sombreiro de malvas…”
Ver listaxe de gañadores do Premio Lazarillo (1958-2007)
Santiago: mesa redonda con Concha Blanco, Marcos Calveiro e Rosa Aneiros
O club de lectura Gálix Tendendo redes organiza unha mesa redonda que leva por título A fráxil existencia, temática escollida para o mes de novembro polo club, e que aborda eses libros que teñen como fondo de reflexión os inadaptados sociais, os seres humanos que dun xeito ou doutro se sitúan nas periferias da sociedade.
Nesta mesa redonda participarán a escritora Concha Blanco, que centrará as súas reflexións no tratamento desta temática da súa novela Nano; o escritor Marcos Calveiro, que centrará as súas reflexións no tratamento desta temática dentro da súa novela Rinocerontes e quimeras e a escritora Rosa Aneiros, que centrará as súas reflexións no tratamento desta temática na súa última obra Ás de bolboreta. Modera a mesa Ánxela Gracián. O acto terá lugar o xoves 26 de novembro de 17 a 19 horas no Consello da Cultura Galega (pazo do Obradoiro, Santiago).
Gondomar: encontro con Marcos Calveiro arredor de Festina lente
A libraría Libraida, en colaboración con Edicións Xerais, organiza un encontro co escritor Marcos Calveiro, autor de Festina lente, a novela proposta no club de lectura Sete Vidas para o mes de outubro. O acto, presentado polo profesor Manuel Candelas, celebrarase este venres, 23 de outubro, ás 20.30 horas na libraría Libraida (Rosalía de Castro núm. 13, Gondomar).
A novela Festina Lente abre mañá martes 6 a nova tempada do Club de lectura Sete Vidas
Este martes de 6 de outubro, ás 20.00 horas, Espazo Lectura reanuda as sesións mensuais do Club de Lectura Sete Vidas, que se celebrará, como en sesións anteriores, na Biblioteca de Gondomar. O autor da novela, Marcos Calveiro, estará na librería Libraida o próximo 23 de outubro, á disposición de todos os lectores.
O libro que citará aos lectores e lectoras para falar e debater, informalmente, sobre el é, nesta ocasión, a novela Festina lente, de Marcos Calveiro, publicada por Xerais. Trátase dunha novela que está a ter unha gran acollida entre o público e que mesmo está dando lugar a roteiros literarios por Santiago de Compostela, a cidade onde está ambientada. Un texto escrito con enorme alento e prosa depurada, que propón unha intrigante viaxe polo mundo dos libros e o coñecemento nun tempo de intolerancia.
Esta sesión do Sete Vidas completarase o día 23 de outubro cunha visita do autor, Marcos Calveiro, á libraría Libraida de Gondomar, onde falará sobre a súa novela e manterá un encontro cos lectores e lectoras.
Santiago: xornada de actividades arredor do libro Festina lente
O club de lectura Gálix Tendendo Redes pecha ata setembro as súas actividades cunha xornada lúdico-artístico-literaria que pretende poñer de relevo un dos temas máis debatidos ao longo destes meses, o das marxes, é dicir, os territorios de fronteira da Literatura Xuvenil. Para iso escolleron unha obra de ficción pertencente ao xénero da novela histórica, cunha trama de misterio sólida e ben documentada, así como cunha calidade e exixencia literarias interesantísimas. Trátase da novela publicada por Edicións Xerais de Galicia Festina lente do autor Marcos Calveiro. Haberá unha lectura compartida o día 2 de xullo de 17 a 19 horas no Consello da Cultura Galega. Ese mesmo día o doutor Carlos Sastre, experto en iconografías medievais, renacentistas, modernas e contemporáneas establecerá as claves entre arte e literatura ao longo da Historia.
O sábado 4 de xullo poñerán fin a esta primeira andaina inverno-primavera 2009 cunha xornada artístico-literaria polo escenario de Festina lente en Santiago de Compostela, así como cunha actividade de Bookcrossing patrocinada por Edicións Xerais de Galicia, na que se deixarán en variados escenarios da zona vella de Santiago de Compostela exemplares desta obra e doutras tanto dos autores escollidos este ano no club de lectura como doutros pertencentes á literatura xuvenil galega. Pechará o día un recital poético que leva como lema Canteiro en Compostela, no cal moitas das nosas poetas e moitos dos nosos poetas labrarán con palabras a beleza da cidade pedra. Para apuntarse á actividade do día 4 de xullo é preciso contactar por correo electrónico coa organización en calquera destes enderezos: Gálix / Ánxela Gracián / Tendendo Redes.
Santiago: mesa redonda sobre novela histórica xuvenil
O club de lectura Gálix Tendendo Redes organiza mañá xoves día 4 de xuño de 17 a 19 horas no Consello da Cultura Galega unha mesa redonda que leva por título Narrar a historia, sobre as claves da novela histórica xuvenil e o seu tratamento na literatura para adultos. Participarán Marilar Aleixandre, Xosé A. Neira Cruz e Marcos S. Calveiro, todos eles autores de obras seleccionadas para a súa lectura polo club, así como a crítica literaria e doutora da Universidade de Santiago de Compostela Dolores Vilavedra. A entrada é libre.
Premios da Crítica 2008
A Sección de Crítica da AELG anunciou hoxe as obras propostas para os os premios da Asociación Española de Críticos Literarios. Copiamos a seguir a anotación que publicaron a última hora da mañá no seu blog:
Reunida en Santiago de Compostela o luns 13 de abril de 2009, a Sección de Crítica da Asociación de Escritores en Lingua Galega acorda, tras o debate e votación correspondentes, propor para os Premios de narrativa e poesía galegas que a Asociación Española de Críticos Literarios fallará o vindeiro día 18 de abril en Santander, as seguintes obras:
-Modalidade de narrativa: Festina Lente, de Marcos S. Calveiro, da editorial Xerais.
-Modalidade de poesía: Hordas de escritura, de Chus Pato, Xerais.
De Festina Lente o xurado valorou a súa orixinalidade, trazo que a fai destacable nun panorama prolífico de seu no xénero histórico, así como a súa riqueza lingüística e a capacidade de dar vida á Compostela dos séculos XVI e XVII, transformando en literatura unha ben peneirada documentación histórica.
De Hordas de escritura destacou a solidez do seu discurso vangardista e a construción dunha poesía que se articula como unha loita contra a propia linguaxe literaria, trazos que marcan un fito importante na xa longa traxectoria da autora.
A COMISIÓN XESTORA DA SECCIÓN
Xabier Docampo e Marcos Calveiro, premios Irmandade do Libro 2009
O escritor Xabier DoCampo recibiu onte no Carballiño o premio Irmandade do Libro ao “Autor do ano 2008”, outorgado pola Federación de Libreiros de Galicia. Na categoría de “Libro do ano 2008” o vencedor foi Marcos S. Calveiro pola novela Festina lente. Tamén recibiron premios Alvarello editora (“Obra editorial 2008” pola Colección rescate), as bibliotecas públicas de Oleiros (“Fomento da lectura”), o IES Blanco Amor de Ourense (“Centros de ensino”), a Asociación Cultural Rosalía de Castro (“Institucións”) e Andel do libro galego e portugués (“Librarías”).
Gálix presenta o Club de lectura “Tendendo Redes”
Mañá xoves 26 de febreiro ás 17:30 preséntase no salón de actos do Consello
da Cultura Galega (praza do Obradoiro, Santiago de Compostela) o Clube de Lectura “Tendendo Redes”, organizado pola Asociación Galega do Libro Infantil e Xuvenil Gálix coa colaboración da Dirección Xeral de Difusión e Promoción Cultural da Consellería de Cultura e do Consello da Cultura Galega. Entre outras accións, o Club de Lectura promoverá encontros con autores como Xosé A. Neira Cruz, Fran Alonso, Agustín Fernández Paz, Marilar Aleixandre, Miguel Vázquez Freire, An Alfaya, Marcos Calveiro ou Fina Casalderrey, que descubrirán os segredos que se agochan detrás de cada libro, os escenarios xeográficos que serviron de inspiración aos autores, as lecturas que os foron construíndo ou as propostas fílmicas e musicais que serviron de punto de partida para o nacemento da escrita. Tendendo Redes conta ademais cun blog propio no que se poderá seguir a dinámica do club e botar man de diversos recursos teóricos (estudo da obra, lecturas críticas, miradas de críticos de renome, como foi abordada esta temática por outros escritores, actividades transversais, un foro de debate, etc.) que permitirán un achegamento máis profundo ao texto e ao autor ou autora.
