Onte domingo quedou inaugurado o XI Salón do Libro Infantil e Xuvenil de Pontevedra, que desenvolverá un completo programa de actividades até o 14 de marzo. Salientamos de maneira moi especial a homenaxe ao escritor Agustín Fernández Paz que terá lugar o sábado 13 de marzo, coa participación de Xabier P. Docampo e a actuación de Mini e Mero. Podedes descargar o programa en PDF (2,2 MB) premendo nesta ligazón
Arquivos da etiqueta: Xabier P. DoCampo
Once escritores galegos que recibiron o Premio Nacional solicitan a dimisión do Conselleiro de Cultura e Turismo, Roberto Varela
O señor conselleiro de Cultura da Xunta de Galicia vén de facer pública, e non por primeira vez, unha análise da cultura galega temeraria e negativa. Antes xa nos ten ofrecido a súa opinión de que “a cultura galega limita”, unha descualificación da nosa mesma identidade colectiva. Deberemos deixar de ter cultura propia, deixar de sermos galegos para non estar “limitados”? Como pode protexer e traballar a prol da nosa cultura quen se expresa con ese fondo complexo de inferioridade identitario? Non pode. Agora precisou máis o diagnóstico, a cultura galega está “ensimesmada e acomplexada”, expresión claramente ofensiva para os creadores e xestores da cultura de Galicia. Pero que, ademais, indica un descoñecemento claro do estado da nosa cultura, tanto no que atinxe ás obras como ao tecido industrial que as sustenta.
Os abaixo asinantes, autores de obras escritas todas elas en lingua galega que foron merecedoras do premio nacional de literatura nas súas distintas modalidades (narrativa, literatura dramática, literatura infantil e xuvenil, tradución e ensaio), consideramos que isto, coma as outras moitas distincións e consideracións que as obras da nosa cultura veñen tendo en toda España e fóra das fronteiras do Estado, negan a insultante e despectiva cualificación do señor Conselleiro.
Estamos verdadeiramente asombrados e fartos de que o conselleiro de cultura do goberno galego desprece sistematicamente a cultura galega, como un auténtico “bombeiro pirómano”.
Consecuentemente, para que desapareza esta pasmosa anomalía, pedimos a dimisión ou cesamento inmediato de don Roberto Varela como Conselleiro de Cultura do goberno de Galicia, dado que o seu escaso coñecemento e falta de consideración cara a cultura galega veñen evidenciar a nula idoneidade para o posto que ocupa. El ha ser máis feliz lonxe de todos nós, “limitados”, “ensimesmados” e “acomplexados”, e todos nós recuperaremos unha situación que teña un mínimo de cordura.
Alfredo Conde (Premio Nacional de Narrativa, 1985)
Paco Martín (Premio Nacional de Literatura Infantil y Juvenil, 1985)
Antón Santamarina (Premio Nacional de Traducción, 1988)
Xabier P. DoCampo (Premio Nacional de Literatura Infantil y Juvenil, 1995)
Manuel Rivas (Premio Nacional de Narrativa, 1996)
Fina Casalderrey (Premio Nacional de Literatura Infantil y Juvenil, 1996)
Manuel Lourenzo (Premio Nacional de Literatura Dramática, 1997)
Suso de Toro (Premio Nacional de Narrativa, 2003)
Rubén Ruibal (Premio Nacional de Literatura Dramática, 2007)
Agustín Fernández Paz (Premio Nacional de Literatura Infantil y Juvenil, 2008)
Xusto Beramendi (Premio Nacional de Ensayo, 2008)
A AELG en Achegarte: Xabier P. Docampo (vídeo)
Entrevista a Xabier P. Docampo na Feira Achegarte.
Vilalba: homenaxe a Xabier P. DoCampo
A Fundación Manuel María e os Clubes de lectura da Asociación Cultural Xermolos homenaxean o vindeiro 24 de outubro ao autor rabadense Xabier P. DoCampo, coa colocación do cuarto hectómetro literario no Paseo dos Soños do río Madanela. Os actos comezarán ás 12 do mediodía cunha mesa redonda, no Muíño do Rañego, na que participarán os escritores Fina Casalderrey, Xosé Cobas, María Xesús Fernández, Agustín Fernández Paz, Antía Otero, Mercedes Queixas e David Otero. Logo da colocación do monolito no Paseo dos Soños, haberá un xantar de irmandade no restaurante A Nova Ruta de Vilalba. Os interesados en acudir poden apuntarse no teléfono 646 413 890.
Xabier P. Docampo, nado en 1946, é autor de abondosas obras literarias, ademáis dun destacado membro de movementos de renovación pedagóxica. Obtivo en 1996 o Premio Nacional de Literatura Infantil e Xuvenil por Cando petan na porta pola noite. Na actualidade é un dos promotores da Plataforma Prolingua.
Entrevista a Xabier P. Docampo en A Nosa Terra
“Reivindicamos que se cumpra a lei e que se garanta o status real da lingua propia de Galiza. Existe unha lingua maioritaria que conta con todas as beizóns, que ninguén atacou nunca e que mesmo conta coa meirande parte dos medios de comunicación ao seu favor. Podemos comprobar como hai medios privados subvencionados con cartos públicos e que non benefician en absoluto o galego, senón todo o contrario. Nós queremos que o galego acade un status semellante ao do castelán –que goza dunha situación vantaxosa malia non ser o noso idioma propio–. Hoxe en día, non se está a dar a verdadeira cooficialidade”. [Ler entrevista completa a Xabier P. Docampo]
A Coruña: conferencia de Xabier P. Docampo
O dia 29 de Setembro, terça-feira (martes), a Agrupaçom Cultural O Facho comeza as actividades do período 2009-10 coa palestra O governo Opus/P.P. e a sua política etnocida contra a Língua Galega dentro do ciclo “Língua, Literatura e Naçom”. A conferencia correrá a cargo do escritor Xabier P. Docampo. Será a partir das oito do serán na Fundación Caixa Galicia, no Cantón Grande da Coruña.
A Coruña: charla de Xabier P. Docampo e Xosé Cobas
Continúan os actos conmemorativos da inauguración da nova Biblioteca dos Rosales. Hoxe luns 28 de setembro ás 18:30 viaxaremos a mundos fantásticos e imaxinarios coas narracións do escritor Xabier P. Docampo e cos debuxos do ilustrador Xosé Cobas. A entrada é libre.
Xornada literaria no mar de Baiona con Xabier P. Docampo e Xosé Cobas
O club de lectura “Gálix Tendendo Redes”, coordinado por Ánxela Gracián, escritora e vicepresidenta da Asociación Galega do Libro Infantil e Xuvenil, Gálix, realizará mañá, sábado 26 de setembro en Baiona, unha nova xornada literaria que, nesta ocasión, leva por título “Por mares de tinta e cantos de sereas”. Nesta ocasión, dende a literatura intentan “tender redes” cara ao ambiente, a historia e a etnografía unindo os nosos esforzos coa Coordinadora Mediombiental de Estudos Mariños, Cenma, encargada de xestionar a goleta Nauja e co Instituto de Estudos Miñoranos. O “NAUJA” é un barco de madeira, aparellado con dous paus que posúe unha ampla e despexada cuberta, o que lle confire ao barco un alto nivel de seguranza para os navegantes sen deixar de ser un barco que mantén ese espírito que desprenden os barcos antigos das mellores novelas de viaxes. Está xestionado pola Coordinadora para o Estudio de Mamíferos Mariños, organización de ámbito galego e fundadora da SEC, para desenvolver as actividades marítimas na costa galega, de carácter ambiental e de investigación no mar, especialmente centrado no mundo dos cetáceos, pero sen deixar de tratar outros eidos como poida ser a bioloxía, a ecoloxía, a oceanografía, a pesca, a etnografía e outras materias que incidan sobre o mar.
Gálix Tendendo Redes tamén “lanza redes” á historia e a etnografía, a través da colaboración co Instituto de Estudos Miñoranos. Para a edición da xornada de mañá Gálix Tendendo Redes contou tamén co apoio de Edicións Xerais de Galicia.
A xornada POR MARES DE TINTA E CANTOS DE SEREAS consistirá nunha navegación literaria e física na procura de todas as Ítacas. Ao longo da travesía os asistentes tornaranse, da man de Xabier Docampo e Xosé Cobas, ricos en coñecementos e experiencias e aprenderán o que significan todas as viaxes.
Lugo: II Xornada de Literatura oral
Os días 16 e 17 de outubro vai ter lugar no Salón de Actos da Deputación de Lugo a II Xornada de Literatura oral arredor da figura do lobo, O mito que fascina. Intervirán como relatores Xabier P. Docampo, escritor, Premio Nacional de Literatura Infantil e Xuvenil; Antxon Gómez Lorente, escritor, garda de montes do Parque Natural de Pagoeta; Alberte Reboreda, arqueólogo, técnico de Patrimonio Cultural, e X. Luis Garrosa Gude, escritor, profesor e investigador da literatura oral.
Baiona: xornada de actividades arredor d’O libro das viaxes imaxinarias
Organizada polo club de lectura Gálix. Tendendo redes, o sábado 26 de setembro desenvolverase en Baiona e arredores unha xornada de actividades que baixo o lema de Por mares de tinta e cantos de serea xirará arredor da obra O libro das viaxes imaxinarias de Xabier Docampo e Xosé Cobas. A xornada está organizada por Gálix, coa colaboración do Instituto de Estudos Miñoranos e de Xerais. O prezo por persoa é de 44 euros, incluíndo a viaxe na goleta, picnic e participación nos talleres. As persoas interesadas en participar na xornada poden solicitar a súa inscrición no correo electrónico coa secretaría de Gálix ou chamando aos teléfonos 650 93 89 72 ou 981 58 98 83. A data límite de inscrición é o 21 de setembro. [Vía Xeraisblog]
