O Vocabulário Ortográfico da Língua Portuguesa (VOLP), publicado en outubro de 2009 pola Porto Editora, está disponíbel gratuitamente na Internet desde o pasado venres neste enderezo. Segundo informa o xornal Público, o VOLP “teve orientação científica do linguista João Malaca Casteleiro e permite pesquisar mais de 180 mil vocábulos representativos do património lexical da língua portuguesa. Disponibiliza ainda informações sobre classificação gramatical, indicação de pronúncia, formas irregulares no feminino, plurais de compostos, estrangeirismos, abreviaturas e símbolos mais usados na língua portuguesa”.
Arquivos mensuais: Xaneiro 2010
ProLingua anuncia as localidades nas que se presentará o libro das 55 mentiras…
A Plataforma ProLingua anunciou hoxe a listaxe provisional de localidades nas que se presentará o próximo venres 5 de febreiro o libro 55 mentiras sobre a lingua galega. Son máis de sesenta as vilas e cidades de todo o mundo que acollerán o acto, un fito histórico para o sistema literario galego: A Coruña, A Estrada, Allariz, Baiona, Barcelona, Bethelem, Bos Aires, Bruxelas, Cacheiras, Caldas de Reis, Cambados, Cangas, Carballo, Carnota, Celanova, Cerceda, Chantada, Copenhague, Corcaigh/Cork, Cotobade, Cuntis, Ferrol, Gondomar, Guitiriz, Lalín, Lisboa, Londres, Lugo, Madison – Wisconsin, Madrid, Marín, Melide, Moaña, Monforte, Nablús, New York, Nigrán, O Barco, O Grove, Ourense, Padrón, París, Pobra de Trives, Ponferrada, Ponteareas, Pontevedra, Ribadavia, Ribadeo, Ribeira, Salceda de Caselas, San Martiño de Trebello (Val do Ellas), Santiago, Saraievo, Trintxerpe, Tübingen, Tui, Verín, Viana do Bolo, Vigo, Vilafranca do Bierzo, Vilagarcía, Vilalba e Vitoria/Gasteiz. Tedes máis información no blog de ProLingua.
Faleceu J. D. Salinger
O célebre escritor estadounidense Jerome David Salinger faleceu onte en Cornish, New Hampshire, aos 91 anos de idade. A súa mítica novela O vixía no centeo foi editada en 1990 por Xerais con tradución de Xosé Ramón Fernández Rodríguez, e desde entón leva vendidos máis de vinte mil exemplares no noso idioma. Tamén podemos ler en galego Nove contos, editado por Sotelo Blanco.
A Coruña: o CGAI lembra a figura de Ramón Barreiro
O libro Ramón Barreiro: humor, parodia e modernidade, coordinado por José Luís Castro de Paz e Xaime Fandiño, será presentado hoxe ás 20:30 no Centro Galego de Artes da Imaxe. A sesión complétase coa proxección do filme El sobrino de don Buffalo Bill, escrito e dirixido por Ramon Barreiro (1906-1981), nacido en Valladolid mais fillo de galego e criado en Pontevedra.
A entrada é gratuíta.
Anselmo López Carreira fala do Antigo Reino de Galiza (vídeo)
Conferencia de Anselmo López Carreira sobre A desaparición do Reino de Galiza na historia española. Acto organizado pola Agrupaçom Cultural O Facho, no ciclo Economia e História da Galiza (Fundación Caixa Galicia da Coruña, 10/11/09). Producido e editado por blogaliza.tv:
Primeira parte
Segunda parte
Xosé Luís Méndez Ferrín: “O adxectivo Real foi un xeito de defenderse dos caciques autóctonos”
Entrevista de Daniel Salgado a Xosé Luís Méndez Ferrín no suplemento Luces de El País:
P. Posicionamentos da Academia tan inequívocos como o referente á lingua, non poden dificultar a negociación dun mellor financiamento coa Xunta?
R. Non ten nada que ver. Non creo que a Xunta de Galicia nos vaia castigar, nin vingarse. Sería pensar moi mal da xente. Penso que esas cousas non ocorren.
P. Daquela, a soberanía da que adoitan gabarse os académicos non é un mito?
R. A Academia é soberana. Comprobamos que o é. O documento chamado Análise académica, que é crítico co decreto do galego da Xunta, foi unha decisión respaldada por unanimidade, respaldada mesmo por dous académicos que non concorren ao plenario, que están separados voluntariamente dos traballos académicos.
P. Intentará que eses dous académicos, Xesús Alonso Montero e Xosé Luís Franco Grande, se reincorporen á vida activa da institución?
R. Tanto eu como todos os meus colegas están desexando que se incorporen plenamente. Xa se incorporaron de forma efectiva á Análise académica e fixeron valiosas contribucións. Pero, polo menos, que aparezan tamén fisicamente.
A AELG apoia aos once escritores galardoados co Premio Nacional
A Asociación de Escritores en Lingua Galega, agrupada na actualidade entorno a un colectivo de 381 autoras e autores, representantes da creación literaria en lingua galega, expresa o seu apoio aos once escritores galardoados no seu día co Premio Nacional, nas modalidades de narrativa, teatro, ensaio, tradución e literatura infantil e xuvenil, e comparte o seu reclamo da necesaria valoración responsábel e obxectiva para a cultura galega, pensada e (re)creada en galego, entendéndoa sempre integrada nun escenario permeábel e aberto ao mundo desde a procura da necesaria reatroalimentación que comeza polo coñecemento, apreciación e dignificación do propio.
A concesión dos Premios Nacionais aos escritores e á escritora en lingua galega asinantes, por parte do Ministerio de Cultura do Estado español, desde o ano 1985, ratifica a capacidade de os nosos creadores e creadoras seren autores dunha creación literaria exportábel alén das nosas fronteiras que nos enche de orgullo e admiración, e que só require destinatarios e receptores con vontade de se aproximar a ela e interpretala como un legado senlleiro dentro doutros parámetros globais.
Coñecer e recoñecer publicamente a cultura galega en xeral, e a literatura galega dos nosos escritores en particular, é o primeiro paso necesario para superar tópicos arcaicos e caducos e acreditar definitivamente na capacidade, valía e potencial enriquecedor da súa divulgación, materia pendente aínda de abranguer cun proxecto contundente e de futuro.
Actualización: a Asociación Galega do Libro Infantil e Xuvenil (Gálix) informou do seu apoio ao texto da AELG.
Encontros literarios do Liceo de Ourense
O Liceo de Ourense organiza a semana que vén os seus XX Encontros Literarios baixo o lema “Literatura e Compromiso”. Este ano contarán coa participación das escritoras Rosa Aneiros, Rosa Regás e Luisa Castro. Podedes ler toda a información neste PDF.
Gondomar: Agustín Fernández Paz presenta Valados
O vindeiro sábado, 30 de xaneiro de 2010, ás 12:00 horas, na Biblioteca Pública de Gondomar, o Club de lectura compartida Lendo Contigo celebrará o Día Escolar da Non Violencia e pola Paz con diferentes actividades que xirarán arredor do libro Valados, do escritor, premio nacional de Literatura Infantil e Xuvenil, Agustín Fernández Paz.
Valados, publicado pola editorial Xerais en 2009, é un libro que nos fala de todos eses valados, visibles ou invisibles, que se erguen para separar e illar unhas persoas doutras. Segundo o propio Fernández Paz, con Valados quixo «narrar as consecuencias que pode ter nas vidas das persoas a existencia destes muros que afondan na desigualdade. Eu quería unha historia como un alegato contra todos os muros. Creei unha sociedade nunha vila, na que están primeiro os muros invisibles que propician a división. Estes, despois, acaban cristalizando nun muro de arame e de cemento. É un texto que ten a súa dureza, pero que está escrito coa delicadeza posible e que deixa un asomo esperanza.»
Entrevista a Xoán Abeleira hoxe en Radio 3
O programa La LiBéLuLa de Radio 3 ofrecerá hoxe unha entrevista co escritor galego Xoán Abeleira para falar sobre o seu poemario Animais animais. O programa emítese de luns a venres despois da medianoite; podedes escoitar tamén os podcast na web de RTVE.
