O sábado 10 de xullo ás 12:30 h. celébrase a II Festa da Palabra, en homenaxe a Arturo Baltar, na Insua dos Poetas (estrada de Carballiño a Lalín (OU-902) Km. 4,5). Entre outros escritores e artistas participan: Manuel Rivas, Luis González Tosar, Víctor Campio, Antón Lamazares e Acisclo Manzano. Ao remate do acto compartirase un xantar de irmandade. Pódese descargar o convite aquí.
Arquivo da categoría: Homenaxes
A Coruña: Terra Berger, homenaxe poético-musical a John Berger
O mércores 30, ás 20:30, no Antigo Cárcere Provincial da Coruña, haberá un recital poético-musical de homenaxe a John Berger, Terra Berger, coa participación de Xoán Abeleira, Rosa Aneiros, Lupe Gómez, Xavier Seoane, Manuel Rivas, Yolanda Castaño e Cesáreo Sánchez Iglesias, acompañados da actuación en directo de Berrogüetto. O aforo limitado, e as entradas son convite (repártense desde o luns 28, no recinto do Cárcere, entre as 12:00 e 14:00, e de 18:00 a 21:00).
Marilar Aleixandre homenaxeada pola AELG
A homenaxe “A Escritora na súa Terra”, impulsada pola Asociación de Escritores en Lingua Galega, chega este ano a súa XVI edición recaendo, por decisión unánime da súa asemblea de socios e socias, na figura de Marilar Aleixandre, que será homenaxeada o sábado día 5 de xuño en Santiago de Compostela. Esta iniciativa anual conforma xa unha tradición na traxectoria da Aelg, e tense constituído ao longo de máis dunha década como unha celebración na que a terra de orixe do homenaxeado/a cobra un protagonismo fundamental nesta cita cultural. Tratase dunha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a), a plantación dunha árbore simbólica (elixida polo propio autor, e que neste caso é un abruñeiro), a colocación dun monolito conmemorativo ou a inauguración dun espazo público co nome do/a homenaxeado/a ou cun nome elixido polo/a homenaxeado/a.
Programa de actos
Sábado, 5 de xuño de 2010 (11:45 horas) – Parque Avda. de Barcelona (Santiago de Compostela): Plantación dun abruñeiro (árbore simbólica da escritora) e descubrimento do Monólito conmemorativo. Descubrimento da placa que atribúe o nome da homenaxeada ao parque. Interveñen: Cesáreo Sánchez Iglesias, presidente da Aelg; Mercedes Queixas, secretaria xeral da Aelg; Xosé Sánchez Bugallo, alcalde de Santiago de Compostela; Marilar Aleixandre.
13,00 horas – Salón Nobre do Pazo de Raxoi (Santiago de Compostela): Acto de entrega da “Letra E”. Interveñen:Mercedes Queixas, secretaria xeral da Aelg; Cesáreo Sánchez Iglesias, presidente da Aelg; Ana Romaní: Laudatio. Entrega da peza escultórica do artista Silverio Rivas. Intervención da homenaxeada: Marilar Aleixandre.
14,30 horas – Hotel-Restaurante “Palacio del Carmen” (Rúa das Oblatas s/n, Santiago de Compostela): Xantar de confraternidade aberto aos/ás socios/as da Aelg, á vecindade de Santiago de Compostela e demais persoas interesadas.
Sigue lendo
Homenaxe a Marilar Aleixandre: fin de reservas
O sábado 5 de xuño a Asociación de Escritores en Lingua Galega celebra a XVI Edición “O/A Escritor/a na súa Terra”, recaendo este ano na figura de Marilar Aleixandre, que será homenaxeada en Santiago de Compostela. Se desexas acompañar a Marilar no xantar de confraternidade co que remata a homenaxe, informámoste de que o prazo para facer a reserva remata esta fin de semana xa que o luns 31 é a data tope que nos dá o restaurante para confirmar o número de asistentes ao xantar, non admitindo máis reservas a partires desa data.
ASOCIACIÓN DE ESCRITORES EN LINGUA GALEGA (AELG)
Horario: Luns a xoves, de 08:00 a 14:30 e de 15:30 a 17:30; venres de 08:00 a 14:00. Tlf./Fax: 981 133 233. Avda. de Alfonso Molina, s/n. Edif. de Sindicatos, 8º andar. 15008 – A CORUÑA.
IV Agasallo a Luís Seoane
Será o luns 1, ás 20:00, na Biblioteca Pública da Coruña Miguel González Garcés.
«Na Biblioteca Miguel González Garcés da Coruña celebramos o IV AGASALLO A LUIS SEOANE no día do seu CENTENARIO (1910 – 2010) . Luís Seoane naceu en Bos Aires o 1 de xuño de 1910 e morreu na Coruña en 1979.
Farémolo coa presentación do libro Poemas alumeados de figurandorecuerdo(s)edicions. Trátase dunha escolma de poesías de Luís Seoane, cada unha delas ilustrada por artistas plásticos contemporáneos amigos do artista, así como polos que se senten identificados ou influídos pola súa obra e polo seu pensamento. Catorce poemas elexidos dos seus diferentes libros, Fardel de eisilado , ediciós Anxel Casal, Bos Aires, 1952; Na brétema, Sant-Iago , ediciones Botella al mar, Bos Aires, 1956; As cicatrices , editorial Citania, Bos Aires, 1959; A maior abondamento , ediciones Cuco-Rei, Bos Aires-A Coruña, 1972; Luís Seoane. Obra poética , ediciós do Castro, Sada, 1977.
Neste fermoso libro co que agasallamos a Luís Seoane fai a presentación Xosé Luís Méndez Ferrín , escritor e presidente da Real Academia Galega ; e os artistas que participan son o pintor Xaquín Chaves ; o pintor e gravador Jesús Núñez ; o pintor e publicista Lipa Burd ; Xoán Piñón fotógrafo; a deseñadora Lía Santana ; o pintor Felipe Criado ; o deseñador Xosé Salgado ; o pintor Xabier Correa Corredoira ; o deseñador Pepe Barro ; o fotógrafo Luis López “Gabú” ; o artista multidisciplinar Tiago Guedes Madeira ; a artista plástica Pilar Turbón ; o pintor e debuxante Detlef Kappeler ; o pintor e acuarelista Reiner Schiestl e o ilustrador gráfico Hermenegildo Sábat .
Con motivo da celebración poderá verse unha mostra dos orixinais que alumean este libro. Contaremos coa presenza dalgúns dos artistas e de Luis José Eguiburu Seoane, fillo da irmá do artista homenaxeado, Estela Seoane López, representando á vez aos fillos de Rafael Seoane López, Rafael e Ana Seoane , que viven en Bos Aires. Son os tres únicos sobriños de Luis Seoane.
Deseguido asistiremos a un concerto do grupo musical DOA que se suma ao homenaxe a Luis Seoane coa presentación de varios temas do seu último traballo “A Fronda dos Cervos” (2006), de próxima edición. Coas cantigas de Alfonso X, Martín Codax, Códice Calixtino e os textos dos trobeiros galaico-portugueses, a música galega estará presente no acto. […]
Para rematar, acercarémonos á Praza Luis Seoane (Monelos, Novos Ministerios) para plantar, por cuarto ano consecutivo, tres plantas de ruda e un allo verde, ao pé do busto do artista, en memoria do libro de Luis Seoane “ Tres hojas de ruda y un ajo verde” publicado en Bos Aires en 1948.»
Marilar Aleixandre, protagonista da XVI Edición “O/A Escritor/a na súa Terra”
O sábado 5 de xuño a Asociación de Escritores en Lingua Galega celebra a XVI Edición “O/A Escritor/a na súa Terra”, recaendo este ano na figura de Marilar Aleixandre, que será homenaxeada en Santiago de Compostela.
Se desexas acompañar a Marilar no xantar de confraternidade co que remata a homenaxe, informámoste de que terás que facer a reserva até este venres, 28 de maio, a través do telf. 981 133 233 ou respondendo esta mensaxe. O prezo do prato é de 35€, que se pagará no propio restaurante nunha mesa habilitada para o efecto. Os actos comenzarán ás 11:45h no Parque Avda. de Barcelona, onde se plantará a árbore escollida pola escritora (un abruñeiro) e se descubrirá un monólito conmemorativo. Ás 13:00h, no Salón Nobre do Pazo de Raxoi, terá lugar o acto de entrega da “Letra E”. Ás 14:30h, xantar de confraternidade no Hotel-Restaurante “Palacio del Carmen” (Rúa Oblatas s/n.)
Podes ver o programa de actos e localización no mapa dos lugares da homenaxe.
A Coruña: “Interseccións: a ollada de Novoneyra”, unha homenaxe de Emilio Cao e Branca Novoneyra
Será este mércores 26 ás 21:00 no Teatro Rosalía de Castro, con entrada libre.
“INTERSECCIONS” foi un proxecto conxunto entre NOVONEYRA e CAO, mestura de música e poesía, que foi presentado en diversos espazos da xeografía galega como o Auditorio de Galicia, a Igresia do Cebreiro, e a Aula de Cultura de Caixagalicia en Santiago de Compostela. Tempo despois retomaron aquel proxecto e chamáronlle “ INTERSECCIONS/2” un proxecto discográfico inconcluso, para o que viaxaron xuntos ao Caurel, e mesmo chegaron a gravar parte do material.
INTERVENCIÓN POÉTICO/MUSICAL
A proposta de concerto de EMILIO CAO, co título de “INTERSECCIONS, A OLLADA DE NOVONEYRA” recolle algúns dos poemas de NOVONEYRA musicados por el (Amiga, Alba e Delgada, Quen na outa tarde, Cain as follas), que foron rectificados polo propio Novoneyra para a súa gravación, así como outras músicas queridas polo poeta, e outras que ían configurar o seu inconcluso traballo conxunto.
Outra singularidade deste concerto será a participación de BRANCA NOVONEYRA (filla do escritor), bailarina e coreógrafa, que ven de presentar o seu primeiro poemario.
Intervirá tamén CARMEN REY, (cantante vinculada dende hai anos a os directos de Emilio Cao), e que puxo a súa voz, xunto coa de Ainoa Arteta, á longametraxe “DE PROFUNDIS” de Miguel Anxo Prado. Tamén ten feito moitas colaboracións con músicos da escena folk (Xose Manuel Budiño) e do jazz (Baldo Martínez, Clunia Jazz…).
A intervención contará tamén coa presenza do singularísimo pianista MANUEL GUTIÉRREZ, compoñente do grupo SUMRÁ co que xa ten gravados catro traballos (en Free Code Records), e que se presenta ao público no Auditorio de Galicia nos últimos días de Xaneiro/2010, cunha xa dilatada carreira e diversas colaboracións, entre elas coas artistas galegas Rosa Cedrón e Maite Dono.
Culleredo: homenaxe a Uxío Novoneyra a cargo de Darío Xohán Cabana
O vindeiro mércores 26 de maio, ás 20:00 na Biblioteca da poesía “Uxío Novoneyra” (Vilamelania-Vilaboa, Culleredo), terá lugar en homenaxe ao poeta unha lectura a cargo do escritor Darío Xohán Cabana.
Oleiros: homenaxe a Uxío Novoneyra
