O escritor e profesor Henrique Rabuñal intervén na Universidade Internacional Menéndez Pelayo dentro do curso consagrado ao 800 aniversario da Coruña para falar da relación entre a poesía galega e a cidade herculina. O acto é o venres 28 ás 16.30 da tarde na Fundación Luís Seoane e leva como título “A Coruña no espello dos seus poetas”.
Henrique Rabuñal é autor de dúas obras de temática coruñesa: Poemas coruñeses (2008) e A Coruña na historia (1999). Poemas coruñeses leva un prólogo do alcalde Javier Losada, foi editado dentro das actividades do proxecto “A Coruña 800” e contén unha antoloxía de poesía galega sobre a A Coruña de autores e autoras dos séculos XIX e XX, desde Rosalía de Castro ata Manuel Rivas.
Henrique Rabuñal é un dos autores do volume A Coruña á luz das letras, de recente publicación, no que múltiples autores actuais evocan a cidade do Faro.
Arquivo da categoría: Palestras
A Coruña: conferencia de Xosé María Álvarez Cáccamo sobre Álvarez Blázquez
O venres 28 de novembro, ás 20:30 no Salón de Actos da Biblioteca Pública da Coruña Miguel González Garcés, terá lugar a conferencia “Xosé María Álvarez Blázquez: a terra, os libros, a poesía”, a cargo de Xosé María Álvarez Cáccamo.
Compostela: conferencia de Jorge Marmelo
Organizada pola Asociación de Escritores en Lingua Galega, mañá martes día 25 do mes que andamos, ás 19,30 horas no salón de actos da Escola Oficial de Idiomas de Compostela (rúa Ulpiano Villanueva, 1-2), o escritor e xornalista portugués Jorge Marmelo dictará unha conferencia baixo título “A literatura como diamante que faz explodir ao contrário”.
Jorge Marmelo naceu en Porto en 1971, onde exerce como xornalista desde 1989. En 1996 inicia o seu periplo como escritor de ficción coa obra O homem que julgou morrer de amor, para publicar logo Portugués, guapo y matador (1997); “Nome de tango” (1998); As mulheres deviam vir com livro de instruções (1999); O amor é para os parvos (2000); Palácio de cristal, jardim paraíso (2000); Sertao dourado (2001); Paixoes & embirrações (2002); Oito cidades e uma carta de amor (2003); A menina gigante (2003); Os fantasmas de Pessoa (2004); O silêncio de um homem só (2004, Grande Prémio do Conto Camilo Castelo Branco); Os olhos do homem que chorava no rio (2005) e O peixe Baltazar (2005). Publica habitualmente textos e contos en diferentes antoloxías e publicacións de Portugal, Brasil, México e Francia.
Lugo: Congreso Internacional de Literatura hispánica e Prensa Periódica (1875-1931)
A Coruña: Historias da Coruña. A memoria da cidade
Do 19 ao 28 de novembro de 2008 deselvolveranse as Historias da Coruña. A memoria da cidade: “O futuro da cidade construímolo entre todos e todas, no día a día, aproveitando sempre o traballo e a experiencia de quen nos precedeu, ao tempo que planificamos en termos de futuro, transcendendo intereses inmediatos co pensamento nas vindeiras xeracións.”
Intervirán através dun amplo programa Xavier Seoane, Aurora Marco, María Lopo, Kathleen March, Tareixa Campo, Laura Tato, Cilha Lourenco, Carlos Biscaínho, Xosé António Fraga, Xosé Luís Martínez, Laura Mariño e Diego Pardo. Ver programa. (AS-PG)
VI Encontro de Escritores Galegos
«Terá lugar no Pazo de Mariñán, en Bergondo, a fin de semana do 20, 21 e 22 de novembro, e nel participarán unha vintena de autores, autoras, e profesionais da crítica literaria galega. […]
O encontro ‘A literatura e a proxección exterior’ reunirá seis comunicacións sobre os tres xéneros literarios: Manuel Lourenzo e Manuel F. Vieites falarán sobre teatro, na mañá do venres Ramón Nicolás e Rexina R. Vega sobre a narrativa, esa tarde, e Luis G. Tosar e María do Cebreiro, sobre a poesía, o sábado pola mañá. O poeta e crítico Arcadio López-Casanova pronunciará a conferencia inaugural.
Amais dos autores e autoras que participan nas mesas, estarán presentes Agustín Fernández Paz, Anxo Regueira, Cesáreo Sánchez Iglesias, Fernando Pinto do Amaral, Miro Villar, Fidel Vidal, Javier Gómez-Montero, Víctor Andrés Ferretti, Teresa Bermúdez, Eva Veiga, Emilio Coco, Rubén Ruibal e Vicente Araguas.» (A Nosa Terra)
Fotos Galeusca 2008
Conclusións Galeusca 2008
ESCRITORES GALEGOS, BASCOS E CATALÁNS REFORZAN OS SEUS LAZOS NO TRANSCURSO DA CELEBRACIÓN DO GALEUSCA 2008
Constatan a evidencia de estarmos a vivir unha situación de involución que se manifesta en posicionamentos públicos como o “Manifiesto por la lengua común”.
(A Coruña, 9 novembro 2008).- Escritores galegos, bascos e cataláns reuníronse entre o 7 e o 9 de novembro en Valencia para celebrar a XXV edición do Galeusca, primeiro desde a constitución da Federación de Asociacións de Escritores Galeusca.
Organizada conxuntamente polas asociacións de escritores en lingua galega, basca e catalana, o tema central desta XXV edición xirou arredor da “Literatura e a paisaxe do eu”, co obxectivo de despregar e afondar na literatura como un espazo de construción do propio suxeito e as súas múltiples concrecións.
Para falar destes aspectos distribuironse o tema en tres sesións de traballo: Sobre paisaxes propias, onde os relatorios centraronse sobre a propia ficción, sobre a propia obra literaria, convertindoos nun espazo de reflexión autobiográfica persoal e colectiva / O dietarismo, unha forma de reflexión, centrada no xénero literario do dietario, baixo as distintas formas, persoal, cultural, literaria, de reflexión persoal e colectiva, e / Este experimento que se chama eu, na que se abordaron cuestións de constitución do individuo e da creación da propia subxectividade
A Asociación de Escritores en Lingua Galega estivo representada polos autores Marica Campo, Francisco Castro, Agustín Fernández Paz, Anxos Sumai, Marilar Aleixandre, Isidro Novo, Xerardo Méndez, Carlos Negro, Antía Otero, Mercedes Queixas, Elvira Riveiro Tobío, Xan Arias, Xavier Queipo e Cesáreo Sánchez Iglesias.
Conclusións do Galeusca 2008
As asociacións de escritores galegos, bascos e cataláns, reunidos en Valencia e Sueca entre os días 7 e 9 de novembro de 2008, concluiron que:
1. Cómpre continuarmos a traballar na procura da normalidade como creadores e creadoras, malia as nosas situacións sociolingüísticas, políticas e culturais seren adversas.
2. Afirmamos a evidencia de estarmos a vivir unha situación de involución que se manifesta en posicionamentos públicos belixerantes como o “Manifiesto por la lengua común”, entre outros, que xa nos fixeron responder conxuntamente o pasado mes de xullo.
3. Nesta liña, o 15 de xuño constituimos a Federación de Asociacións de Escritores Galeusca para articular accións comúns e dar resposta a actitudes belixerantes como a xa citada e avanzar nun grao de convivencia dentro da diversidade cultural.
4. Isto obríganos a que, logo de 25 anos, debamos reflexionar e reformular o modelo de relación e actuación conxunta. Nesta liña, os noso lazos veranse reforzados coa realización de máis actividades de distinto formato e unha esixencia común ante as diversas institucións implicadas.
5. De maneira especial traballaremos para reformular o marco que nos permita mellorar as condicións de profesionalización e o respecto aos dereitos de propiedade intelectual, e en especial en temas sensibeis como contratos de edición, formatos dixitais e os retos formulados polas novas tecnoloxías, así como o desenvolvemento da lexislación derivada de organismos europeos.
6. Concretando, temos iniciado xa formas de maior relación a través da incorporación de iniciativas como as casas de escritores e escritoras e residencias de creación. E tamén, a incorporación de escritores e escritoras das outras dúas linguas nas actividades propias de cada asociación. Neste sentido, lembramos o recentemente celebrado III Encontro de Novos Escritores, no Pazo de Mariñán (A Coruña), así como a posta en marcha a partir do próximo mes de xaneiro da Casa do Escritor Hugoenea, sita no concello de Pasaia, para uso dos escritores e escritoras das tres linguas. Asemade, a próxima celebración do Congreso de Literatura Infantil e Xuvenil en Mollerussa (Lleida) o vindeiro mes de maio de 2009, exemplos das novas formas de colaboración.
(Gabinete de Comunicación da AELG. Tel: 660 530 525. Correo-e: prensa@aelg.org)
A Coruña: homenaxe a Jenaro Marinhas del Valle
Actos de homenaxe no centenario do nacemento de Jenaro Marinhas del Valle
PROGRAMA
Día 11 de novembro de 2008
Na Facultade de Filoloxía da Universidade da Coruña
12:00
“Apresentación dos actos previstos. Primeira aproximación a D. Jenaro Marinhas del Valle”. Interveñen: María Xosé Bravo, Mª Pilar García Negro, Pablo G. Mariñas, X. María Monterroso Devesa e Teresa López.
13:00
Perfil humano-literario de Jenaro Marinhas, por Henrique Rabuñal.
“Experiencias en dirección e escenificación de obras teatrais de Jenaro Marinhas”. Interveñen: Lino Braxe e Francisco Rodríguez.
Día 21 de novembro
Na Casa Museo Casares Quiroga (Panadeiras, 12)
18:00
“O feminino e a protesta na obra de teatro Ramo Cativo”. Interveñen: Kathleen March e Tareixa Campo.
19:00
Mesa redonda: Continuidade dos presupostos avangardistas no teatro de Jenaro Marinhas, por Laura Tato.
Claves expresivas do teatro de Jenaro Marinhas, por Cilha Lourenço
O público na constitución dun teatro nacional: o pensamento de Jenaro Marinhas, por Carlos Viscainho.
No Teatro Rosalía Castro
20:30
Representación: “A velada”. Teatro proscrito (Memorial Iván Toxeiro. Asociación Alexandre Bóveda)
Audiovisual “Jenaro Marinhas na lembranza”. Autores: Manolo Graña e Arturo Iglesias.
Exposición: “Jenaro Marinhas: drama e exemplo do século XX galego”. No mes de decembro a Casa Casares Quiroga acollerá unha exposición que pretende axudar a difundir a vida e a obra deste intelectual galeguista sempre comprometido coa dignificación da nosa cultura.
Valencia: os encontros GALEUSCA chegan á súa XXV edición
(A Coruña, 5 novembro 2008).- Mañá xoves día 6 de novembro, no vóo que sae de Lavacolla ás 21,20 horas, sairá en dirección a Valencia a delegación galega que participará na XXV edición de Galeusca.
Organizada pola asociación de escritores en lingua catalana, os encontros Galeusca chegan á súa XXV edición, a celebrar no País Valenciano, nas localidades de Valencia e Sueca. Celebraranse en Valencia e Sueca do 7 ao 9 de novembro de 2008.
