Manuel Rivas fala sobre o seu novo libro, As voces baixas, na Feira do Libro da Coruña de 2012.
Pezas para armar a vida de Celso Emilio Ferreiro
Reportaxe-entrevista
de Daniel Salgado a Ramón Nicolás en El País:
““A Celso Emilio recoñéceselle o valor de clásico; niso, a posteridade foi xusta”, considera o biógrafo, “pero talvez falta ir máis alá de cuestións ideolóxicas”. Nun diagnóstico apurado, Nicolás avisa dos Ferreiros menos transitados e reclama atención para o narrador —“Os relatos d’A fronteira infinda forman un libro moi interesante”—, o xornalista de opinión que vive soterrado nas hemerotecas ou o divulgador da cultura galega “cando podía e como podía, e tamén cando non podía”. E iso malia que, explica, o escritor revitalizouse criticamente despois de atravesar certo deserto cando a dialéctica literaria, nos oitenta, o considerou a antítese do que debía facerse.
Onde o mundo se chama Celso Emilio Ferreiro emerxe dunha década de asexos e dous anos de labor intensivo. “Cousas da providencia laica”, chacotea o autor, “e de que me convenceron Luís Ferreiro [fillo do poeta] e do editor Bragado”. E irrompe nunha paisaxe, ao seu ver, “moi necesitada de biografías”. Ben pola dedicación que precisan, ben polo imán que supón o Día das Letras Galegas, o xénero non despega. “A min servíronme moito cousas como as de Marcos Calveiro ou Iago Martínez sobre Lois Pereiro e a de Murguía de Barreiro é moi interesante”, conclúe, “mais ¿para cando biografía de Rosalía, Curros ou Pondal?”.”
Vila Nova de Cerveira: presentación da colección DiVersos de Positivas
O
sábado 22 de setembro, ás 18:00 horas locais, na Livraria Porta XIII de Vila Nova de Cerveira, terá lugar a presentación conxunta da colección DiVersos de Edicións Positivas. No acto participarán Paula Carballeira, Estevo Creus, Rosalía Fernández Rial, Alfredo Ferreiro, Serxio Iglesias, Samuel L. París e o editor Paco Macías, acompañados pola música do grupo De outra margem.
A Coruña: O texto e o público, obradoiro dirixido por Lino Braxe
O texto e o público
é un obradoiro de teatro aplicado ao texto poético, dirixido por Lino Braxe, cos seguintes fundamentos: A búsqueda do corazón do texto. A música interior da obra literaria. A expresión exterior do corazón e da música. A leitura da obra. A comunicación ao público da nosa criación.
RESUMO
– Nivel: Iniciación.
– Duración: Trimestral. Prazas limitadas.
– Datas de inicio e finalización: 01/10/2012 ao 17/12/2012.
– Horario: luns de 18:00 a 20:00 horas.
– Prezo: 60 €/mes socios. 80 €/mes non socios.
– Inscrición: aquí.
Ourense: curso sobre A crise dos estudos de humanidades e a tradición do galeguismo á luz de Nós
Do martes 25 ao venres 28 de setembro, no Campus de Ourense da Universidade de Vigo, desenvolverase o curso A crise dos estudos de humanidades e a tradición do galeguismo á luz de Nós, que reunirá a medio cento de docentes das tres universidades galegas e destacados intelectuais para afondar na actual desvalorización das Humanidades e para facer unha revisión crítica do legado cultural e literario do galeguismo. Máis información aquí.
A guerrilla editorial
“Hai
xa tres anos, un grupo de pequenos editores, coa característica común de residir na capital galega, xuntábanse para compartir gastos e organizar algunha actividade. Resultado deste encontro, Editores de Compostela está amosar nos últimos meses unha destacada creatividade á hora de achegar o libro aos lectores, con propostas como o Outlet do libro ou o Exprés Literario. A semente do colectivo, composto na actualidade por Edicións Positivas, Alvarellos, Sotelo Blanco e Urco, xurdiu no maxín de Francisco Macías, de Positivas. “Eu fixen un chamamento hai xa catro ou cinco anos no seo da Asociación Galega de Editores para contactar cos outras firmas de Compostela, fundamentalmente con vistas a compartir gastos como os de hotel ou transporte para irmos a feiras”, explica Macías. “Ao final a xuntanza non se daba feito, e hai cousa de tres anos conseguín reunirme con Quique Alvarellos e Chelo de Sotelo Blanco e botámolo andar. Despois coñecín a Tomás de Urco, que se sumou ao proxecto. A convocatoria segue aberta se alguén máis se quere integrar”, puntualiza. Henrique Alvarellos, pola súa banda apunta que “aínda que os integrantes, por dicilo dalgún xeito, somo catro, sumamos colaboracións puntuais con outros selos da cidade, e estamos abertos a aproveitar sinerxias a nivel de comunicación ou de asistencia a feiras”. (…)”. Desde Cultura Galega.
Descobren un fragmento da versión galega das Partidas de Afonso X
“O arquivo do Museo de Pontevedra albergaba, sen o saber, o fragmento dunha versión en galego do texto das Partidas de Afonso X O Sabio. O pergameo, que se data no século XVIII fora utilizado como cuberta para o Libro del Ayuntamiento de Pontevedra de 1573-1575 e a súa descuberta facíase pública no web do Museo a pasada semana. O texto correspóndese coa Quinta Partida, un apartado deste texto xurídico que se refire ós contratos entre persoas, e está escrito a dobre columna, en escritura gótica textual con tres cores de tinta. Segundo sinala o Museo está pendente de verificar se o texto se corresponde con outro fragmento que se conserva no Arquivo do Reino de Galicia.” Desde Cultura Galega.
Xabier Iglesias recupera a memoria de Nós
“Dende
hai unhas semanas, o escritor e humorista gráfico Xabier Iglesias López traballa no blogue Os libros de Ánxel Casal, onde recupera imaxes e recensións dalgúns dos libros publicados polo editor Ánxel Casal na Imprenta Lar e na Editorial Nós entre os anos 1924 e 1936, como el mesmo sinala. A propia vida, de Leandro Carré Alvarellos; A Dona das torres, de Ánxel del Castillo; O lobo da xente, de Risco; ou A terra chama, de Uxío Carré son algúns dos libros que podemos atopar, algúns máis esquecidos que outros, pero memoria viva do galeguismo e da edición galega.” Desde Fervenzas Literarias.
A Real Academia Galega custodiará máis de mil arquivos de voz con poemas de Celso Emilio
“O
presidente da Real Academia Galega, Xosé Luís Méndez Ferrín, asinou en Lugo un convenio co presidente da Radio Lugo-Cadena SER, Julio Beberide Martínez, para a cesión das máis de 1.000 voces que compón o proxecto O son da nosa fala. 1.000 voces para Celso Emilio Ferreiro. A rúbrica materializouse nun acto no que tamén estiveron presentes o presidente da Deputación de Lugo, Xosé Ramón Gómez Besteiro; o concelleiro de Cultura de Lugo, Antón Bao, e o fillo de Celso Emilio Ferreiro, Luís Ferreiro. O Grupo Radio Lugo, a través dos profesionais Paco Nieto e Tania Lombao, impulsa un proxecto de promoción cultural e lingüística con motivo da celebración neste 2012 do centenario do nacemento do escritor de Celanova Celso Emilio Ferreiro. A través desta iniciativa, as ondas da Cadena SER na provincia de Lugo emiten diariamente un mínimo de tres poemas ou pezas biográficas sobre o autor, recitados por persoas da esfera política, cultural e social de Galicia, así como por persoas anónimas e xente procedente de máis de vinte países de todo o mundo. A sinatura do convenio foi un acto simbólico en que a Radio Lugo cedeu un CD cunha mostra de cincuenta poemas, mais que se materializará no mes de xaneiro, cando a emisora decana de Lugo doe a totalidade de arquivos que sexan emitidos até o último día deste ano.” Desde La Opinión.
Parlamento das letras: Xosé Vázquez Pintor
Entrevista
de Armando Requeixo a Xosé Vázquez Pintor no seu blogue, Criticalia:
“(…) – Armando Requeixo (AR): ¿Que cres que lle falta aínda ás nosas letras e que lle sobra definitivamente?
– Xosé Vázquez Pintor (XVP): Fáltalle aínda un censo grande e ceibe: lectoras e lectores, esa marabilla de respecto e de agarimo. Sóbralle a indiferenza dun poboado na nugalla, que sempre se marxina e encubila: “eu non entendo, non sei ler nin quero; amais non teño tempo…”. (…)
– AR: ¿Cal é a túa valoración do noso presente literario?
– XVP: En grande parte xa fica dito. Engadir de urxencia a nosa preocupación comunitaria, case heroica, pola Lingua: a mellor ferramenta patrimonial; a marabilla. (…)”.
