A 
XIV edición da Feira do Libro de Monforte desenvolverase do mércores 24 ao sábado 27 de agosto, na rúa Cardeal, con horarios entre as 11:00 a 14:00 h. e de 18:00 a 22:00 horas. Os actos máis destacados do mércores 24 son os seguintes:
– 19:30 h. Pregón da Feira a cargo de Marcos Calveiro.
– 20:30 h. Mesa redonda sobre Lois Pereiro, coa participación de Xosé Manuel Pereiro, Manuel Bragado, Jacobo Fernández Serrano, Iago Martínez e Marcos Calveiro.
O 
martes 23 de agosto, a partir das 20:00 horas, na Estatua de Rosalía na Alameda de Santiago de Compostela, terá lugar o último Roteiro literario por Compostela, actividade da Asociación de Escritoras e Escritores en Lingua Galega en colaboración coa Concellaría de Cultura de Santiago, aos que a cidadanía pode sumarse sen necesidade de anotarse, axudando a coñecer a Compostela literaria da man dos nosos autores e autoras. O Roteiro, da man de Inma López Silva, terá o seguinte percurso: Ferradura, Villar, Catedral, Acibechería, Cervantes, Cinco Rúas, Belvís, Mazarelos e Praza da Quintana.
Entrevista 
a Antonio Raúl de Toro en El Progreso:
“- El Progreso: Como xurdiu o encargo de dirixir a antoloxía galega máis completa, con máis de 280 textos, traducidos ó inglés, baixo o título de Breogan’s Liththouse, da editorial Francis Boutle Publishers?
– Antonio Raúl de Toro Santos: A idea partiu dun amigo de Plymouth que é o director, xunto a Alan Kent, dunha colección de literatura e linguas menos utilizadas en Europa e animeime ó saber con que colaboradores ía traballar e finalmente presentamos a obra a finais do ano pasado en varias cidades galegas, así como na Universidade de Oxford, na irlandesa de Cork e é probable que tamén o fagamos no Instituto Cervantes de Dublín. (…)”
O 
venres 19 de agosto, ás 21:00 horas, na Praza do Cabo da Vila de Muxía (en caso de choiva, a cita trasladaríase ao Salón de Actos), preséntase o libro As crebas, de Miro Villar, publicado en Espiral Maior e premiado co XIII Premio de Poesía Concello de Carral. No acto participan, acompañando ao autor, Félix Porto, Xosé Henrique Rivadulla Corcón e Alexandre Nerium.
O 
luns 22 de agosto, a partir das 20:00 horas, no Castelo de Santa Cruz (Oleiros), terá lugar a inauguración da exposición Enarborar o bosque, na que se recollen os traballos feitos durante a xornada de Arte Reivindicativa ao Aire Libre na Carballeira de Chaián, o 5 de Xuño de 2011, formada por pintura, fotografía, escultura e escrita. Dentro dela terá lugar un recital poético-musical, no que participarán: Chelo Suárez, Francisco X. Fernández Naval, François Davo, Helena Villar Janeiro, Iolanda R. Aldrei, Lourdes Maceiras, Marina Cocós, Miguel Melero, Natalia Margalejo, Ramiro Torres e Xesús Rábade, e o poeta e músico Mou de Lugh, que acompañará os poetas cun hang drum. A exposición, que se poderá visitar até o 31 de agosto, e na que participan un total de 59 artistas, está organizada polo Colectivo Arteu.
O 
luns 22 de agosto, ás 20:00 horas, na Sede Náutica Novacaixagalicia de Sanxenxo, terá lugar a presentación de In vino veritas, de Francisco Castro, publicado en Galaxia. No acto estará acompañado pola xornalista María Solar.
O 
Auditorio Municipal de Cabana de Bergantiños (A Carballa, s/n., Cesullas) acollerá este venres 19 de agosto, a partir das 18:00 horas, a gravación dunha Polafía. O acto, que tamén está aberto a todo o público que queira asistir como espectador, está organizado conxuntamente pola Asociación de Escritores en Lingua Galega e o Concello de Cabana de Bergantiños. O evento servirá para lembrar a figura do acordeonista José María Álvarez Canto ademais de servir para poñer en valor a ricaz literatura oral e música tradicional de Cabana. En principio, estaba programado realizar esta gravación na praza de Neaño pero decidiuse cambiar ó Auditorio por mor da inestabilidade metereolóxica.
A xornada desenvolverá 26 espectáculos distintos centrados sobre a literatura oral e a música tradicional ofrecidos por persoas individuais e colectivos de gran parte do territorio de Cabana de Bergantiños. Haberá representantes das parroquias de Nantón, Cundíns, Cesullas, Canduas, Anos, Borneiro, A Silvarredonda e Riobó.
A tarde abrirase coas intervencións de Jacinto Paredes e María Álvarez Castro, quen lembrarán a figura de José María Álvarez Canto. Jacinto recordará a figura do mestre acordeonista, dado que el fora o seu alumno. Por outra banda, María lembrará ó acordeonista José María tanto no seu Corme natal como nos salóns de baile da redonda.
A música tradicional virá da man de varias agrupacións de gaiteiros, de cantareiras e pandereteiras. As cantareiras do Fol (Neaño, Cesullas) realizarán a representación etnográfica dunha fiada que engalanarán con cantos tradicionais de Bergantiños. As cantareiras de Nantón e de Anos subirán á escena diversos cantos recollidos na Costa da Morte. A representación dos grupos de gaitas recaerá nos gaiteiros de Anos e Borneiro. Os primeiros tocarán o Valse de Cabana e a Muiñeira de Cabana, mentres que os segundos interpretarán a Rumba de Neaño e a Xota de Neaño. Os aspecto máis etnográfico-musical será a actuación das pandereteiras de Cundíns (Pura e Hermosinda), dúas pandereteiras maiores que conservan intacto un máis que interesente repertorio musical da súa parroquia natal. Elas cantarán á pandeireta o Maneo de Cundíns e o Pasodobre corrido de Cundíns, xunto cunha peza de orixe portuguesa (A Portuguesa) que lles ensinou hai décadas un reparador de potas e cacerolas.
A literatura de tradición oral virá da man de regueifas, coplas e poemas populares. Para a actuación de regueifa contarase cos catro regueifeiros naturais de Cabana de Bergantiños: Fermín Calvo, Raimundo Cousillas, José Rodríguez e Manuel Fariña, representantes desta manifestación de literatura oral nas parroquias da Silvarredonda, Cesullas e Borneiro. Como representantes de literatura popular editada en libro lerán poemas Plácido Vigueret Villar, Fina Cousillas Baña (lerá textos de súa nai María Baña Varela) e Tamara Lema (lerá textos de Hermosinda Varela Lema). Matilde Vilariño Pose e Carmen Varela García lerán poemas de carácter popular que manteñen inéditos. Pilar Rama Pose, de Riobó, e Aurora Ramos e Dolores Macías cantarán coplas populares (sen compaña de pandeireta). José Rodríguez (José de Severo) ademais de regueifar, recitará o Romance da tía Pepa.
Como representante de literatura culta estará presente o poeta de Canduas Óscar de Souto, que recitará cinco poemas dos seus libros Latexos, Díxenllo á noite, En ausencia e Laios d’alma.
A música coral estará representada polas corais de Cesullas e Canduas, as cales subrián ó escenario os temas A branca gaivota e Cabana de Bergantiños. Raimundo Cousillas cantará á guitarra dous temas compostos por el: O emigrante e Máis bonito A Coruña. Sandra Alvarellos Varela lerá un texto sobre as tradicións do San Fins do Castro. Varias persoas do Centro de Día de Cabana narrarán contos e lembrarán vellas regueifas.
Nesta Polafía colaboran todos os colectivos musicais e persoas individuais participantes, así como o Centro de Día de Neaño.
Esta é a localización do Auditorio:
O 
venres 19 de agosto, ás 21:00 horas, na Cidade da Cultura, dentro do programa Atardecer no Gaiás, terá lugar o recital Nove en pedazos coa participación poética de María Lado e a musical de Mig Seoane, baseado no libro Nove.
O 
venres 19 de agosto, ás 20:30 h., no Auditorio de Soutelo de Montes, preséntanse os libros Lume de cobiza, de Miguel Anxo Fernández, publicado en Galaxia, e O bestiario máxico do abade Eliseo e outras narracións insólitas, de Francisco Rozados, Rochi. No acto, no que o autor estará acompañado por David Raposeiras Correa e Xosé Luna Sanmartín, haberá tamén unha actuación musical a cargo do dúo de guitarra e voz Andrea e Xavi.
O Punto de Información e asesoramento afectivo-sexual da Concellería de Igualdade, Servizos Sociais e Sanidade do Concello de Soutomaior, no marco das actuacións previstas no II PIOM 2008-2011, na área de fomento da saúde, deporte e benestar, organiza o III Concurso de relatos eróticos Punto e seguido, co obxectivo de promover a educación e a saúde afectivo-sexual, e favorecer a eliminación de tabús e estereotipos sexistas.
BASES
1. Poderán participar na presente convocatoria persoas maiores de 18 anos que nacesen, residan, desenvolvan a súa actividade laboral ou académica en Galicia (será obrigatoria a xustificación documental que acredite tal circunstancia).
2. As obras presentaranse por triplicado (orixinal e dúas copias) en fonte Arial 12, a dobre espazo e por unha soa cara, en tamaño DIN A4, grampadas, cosidas ou encadernadas. Irán acompañadas dun sobre pechado contendo os datos persoais da autora ou autor (nome e apelidos, idade, enderezo, teléfono de contacto, correo electrónico, fotocopia do DNI ou pasaporte e a xustificación da residencia en Galicia no caso de que esta non coincida coa que figura no DNI). Rexeitaranse aqueles traballos nos que figure algún dato que permita identificar ao/á autor/a destes. Os traballos enviados por correo postal enviaranse do mesmo xeito sinalado anteriormente co compromiso dende a Concellería de Igualdade de destruír o sobre de correos onde obrigatoriamente debe constar o remitente. Nos tres exemplares da obra e no exterior do sobre figurará o título da obra, o pseudónimo (opcional) e a lenda III Concurso de Relatos Eróticos.
3. As obras deberán ser orixinais, inéditas e escritas en galego, cunha extensión máxima de 600 palabras, sen contar o título, quedando excluídas do concurso todas aquelas que a sobrepasen. Poderanse presentar un máximo de dous traballos por autor ou autora. Valorarase que o texto reflicta actitudes e valores igualitarios, e a ruptura de estereotipos sexistas, especialmente os relacionados co erotismo e a sexualidade.
4. O prazo para a presentación de orixinais comeza o 1 de agosto e remata o 4 de novembro de 2011 ás 14:00 horas. Os traballos entregaranse persoalmente ou por correo certificado ao: Centro de Información á Muller, no Centro Multiusos de Arcade (Rúa Peirao, nº 8, Arcade (Soutomaior), C. P. 36690).
5. O Xurado será nomeado desde a Concellería de Igualdade e estará presidido pola Concelleira de Igualdade, Servizos Sociais e Sanidade en comparecencia ou en quen delegue, e estará composto por profesionais relacionados/as coa literatura, actuando como secretaria, con voz pero sen voto, a responsable e directora do Centro de Información á Muller de Soutomaior. A composición do Xurado darase a coñecer ao emitirse o fallo, que será inapelable e farase público na primeira quincena do mes de decembro de 2011.
6. Establécese un único premio gañador dunha fin de semana para dúas persoas no Castelo de Soutomaior, que inclúe estancia e media pensión. A entrega do premio farase na segunda quincena do mes de decembro de 2011, e será anunciado e notificado oportunamente. A non presenza no acto de entrega suporá a renuncia a este. A xuízo do Xurado os premios poderán ser declarados desertos.
7. A concesión do premio implica a aceptación por parte do/a gañador/a do dereito de publicación do relato por parte da Concellería de Igualdade, Servizos Sociais e Sanidade, así como a difusión noutros medios de comunicación como, por exemplo, internet. As obras que non resulten premiadas quedarán depositadas no fondo documental do CIM e da Concellería de Igualdade, Servizos Sociais e Sanidade, e estarán a disposición dos/as usuarios/as do mesmo para a súa lectura ou consulta (salvo que no interior do sobre pechado conste o expreso desexo do/a autor/a de recuperar a obra, que neste caso deberá ser retirada do CIM nun prazo máximo dun mes a partir da data de entrega do premio).
8. A presentación a esta convocatoria supón a plena aceptación de todos os puntos das bases que regulan este concurso. Calquer dúbida sobre a interpretación das mesmas será resolta dende o CIM de Soutomaior (teléfono 986-701227, na súa páxina, e/ou nos correos electrónicos cim@soutomaior.es e info@ex-presion.com).
