Nos próximos días chegará ás librerías galegas o novo libro de Xelís de Toro, Riofero, editado por Xerais. O escritor compostelán vén de abrir unha páxina web na que podemos escoitar algúns fragmentos da novela e cancións vencelladas ao texto e descargar o primeiro capítulo en PDF. Xelís de Toro creou tamén un blog onde “poder publicar, falar e discutir de temas que agromen a partir dos temas do libro, ou mesmo o tema da literatura e que non se encontren noutros lugares”. Neste vídeo colgado en YouTube Xelís de Toro fala do seu libro e das razóns polas que se decidiu a crear o seu propio espazo na rede:
Arquivos da etiqueta: Edicións Xerais
Finou John Updike
O escritor estadounidense John Updike, dúas veces gañador do Premio Pulitzer e eterno candidato ao Nobel, morreu hoxe aos 76 anos vítima dun cancro de pulmón. Entre as súas obras máis célebres, a serie de novelas protagonizadas polo personaxe Harry “Coello” Angstrom (Rabbit, Run, Rabbit Redux, Rabbit Is Rich, Rabbit At Rest e Rabbit Remembered), as Memorias da Administración Ford ou As bruxas de Eastwick. A súa última novela, Terrorist, foi editada en galego en 2008 por Xerais. Máis información: a nova no xornal portugués Público e o obituario no New York Times.
Homenaxe Nacional a Xosé Luís Méndez Ferrín
O venres 6 de febreiro terá lugar en Vigo o acto de Homenaxe Nacional a Xosé Luís Méndez Ferrín co gallo do seu 70 aniversario. Será no Auditorio do Centro Social Caixanova de Vivo (rúa Policarpo Sanz, 26) ás 20 horas e con entrada libre, e durante o mesmo presentarase o libro A semente da nación soñada. Homenaxe a X.L. Méndez Ferrín, coeditado por Sotelo Blanco Edicións e Edicións Xerais de Galicia.
Tralo acto de homenaxe haberá unha cea no Pazo Os Escudos (Avda. Atlántida 106, Alcabre, Vigo) a partir das dez da noite. Os interesados en asistir á cea deberán ingresar 35€ por persoa na conta de Caixanova número 2080 / 0065 / 36 / 0000388555, antes do 30 de xaneiro de 2009. Para acceder á cea é requisito imprescindíbel a presentación na entrada do restaurante do xustificante do pagamento.
Entrevistas a Santiago Jaureguizar
Estes días están aparecendo na prensa galega diversas entrevistas con Santiago Jaureguizar con motivo da presentación da súa novela O Globo de Shakespeare, Premio Terra de Melide 2008. En Galicia Hoxe o escritor asegura que o seu libro fala “dos soños que temos todos: de poder, de amor, de éxito”, mentres que no Faro de Vigo afirma que “Shakespeare é o mellor construtor de personaxes da historia”. Poden ler as dúas entrevistas completas nestas ligazóns.
Reedición de “long-sellers” da literatura galega
Nas últimas semanas foron anunciadas as reedicións dalgúns grandes éxitos da literatura galega, obras que seguen a gozar do fervor dos lectores moitos anos despois da súa saída ao mercado. É o caso de Que me queres, amor? de Manuel Rivas, da que Galaxia vén de sacar a edición número quince e que acumula 65 mil exemplares vendidos. Quince son tamén as edicións de Crime en Compostela de Carlos Reigosa, en Xerais, que tamén puxo nas librarías a vixésimo terceira edición das Cartas de inverno de Agustín Fernández Paz, un dos fitos do sistema editorial galego con perto de setenta mil exemplares vendidos.
Vigo: presentación do libro Anti natura, de María Xosé Queizán
O venres 21 de novembro, ás 20:00 na sala de conferencias da Fundación Caixa Galicia (Policarpo Sanz, 15) terá lugar a presentación do libro Anti natura, de María Xosé Queizán. O acto, que contará coa participación de Carme Adán, Manuel Bragado e María Xosé Queizán, ofrecerá a intervención dos actores María Armesto e Xavier Picallo.
A Coruña: Presentación do libro O libro das viaxes imaxinarias, de Xabier Docampo e Xosé Cobas
O xoves 13 de novembro, ás 20:00 na Biblioteca Pública da Coruña Miguel González Garcés, terá lugar a presentación do libro O libro das viaxes imaxinarias, de Xabier Docampo e Xosé Cobas. Tamén será inaugurada unha exposición coas ilustracións de Xosé Cobas. (Biblioteca Pública Nodal Miguel González Garcés)
A Coruña: presentación do libro Renacer, de Xabier Paz
O venres 31 de outubro, ás 20,00 horas na Galería Sargadelos da Coruña (Rúa Real, 56) terá lugar a presentación do libro Renacer, de Xabier Paz. O acto, que contará coa participación de Juana Otero Gómez, Manuel Bragado e o autor.
Presentación en Vigo de Hai Cu, do Leo
O venres 28 de marzo, ás 21:00 horas no Centro Social A Revolta (Rúa Real, 32, Zona Vella, Vigo), terá lugar a presentación de Hai Cu, libro de haikus en galego do Leo. Haberá cántigas, poemas, monólogo e petiscos ao remate.
Presentación en Ferrol de Palabras contadas, de Camilo Franco
O día 11, ás 20:00 horas na Galería Sargadelos de Ferrol (Rubalcava, 30-32), presentarase o libro de Camilo Franco Palabras contadas (Edicións Xerais). Na presentación participará o autor, acompañado polo músico Magín Blanco.
