Arquivo da categoría: Institucións

Blanca-Ana Roig Rechou, nova presidenta da Asociación Nacional de Investigación en Literatura Infantil y Juvenil (ANILIJ)

Publicado o por

A Asociación Nacional de Investigación en Literatura Infantil y Juvenil (ANILIJ) renovou a súa directiva no marco da celebración da I Xornada Internacional de Crítica e Investigación en Literatura Infantil e Xuvenil, que se desenvolveu en Vigo os días 18 e 19 de novembro cunha importante presenza de participantes e uns resultados moi esperanzadores de cara ao futuro. Blanca-Ana Roig Rechou, que ata o de agora viña formando parte de ANILIJ como presidenta da súa sección ELOS (Asociación Galego-Portuguesa de Investigación en Literatura Infantil e X/Juvenil), substitúe no cargo a Celia Vázquez García, da Universidade de Vigo, integrando na nova directiva a parte dos membros da dirección anterior, como son Veljka Ruzicka Kenfel, Lourdes Lorenzo e Ana Fernández Mosquera, investigadoras da universidade olívica, ás que se une tamén Isabel Mociño. Segundo a nova presidenta con esta directiva amósase un claro afán continuista, ao asumir os retos e proxectos que a Asociación ten en marcha, aos que se sumarán outras iniciativas coas que rendibilizar e visibilizar o importante papel desta Asociación, que dende a súa creación en 1999 levou a cabo numerosas iniciativas, a través das que fomentou o contacto, diálogo e colaboración entre os seus integrantes e outros especialistas tanto do ámbito estatal coma internacional.

Maside: nomeamento de Víctor Campio Pereira como fillo predilecto e de Francisco Luís Bernárdez como fillo adoptivo de Maside

Publicado o por

O sábado 20 de novembro, na Casa da Cultura de Maside, terá lugar o nomeamento de Víctor Campio Pereira como fillo predilecto e de Francisco Luís Bernárdez como fillo adoptivo de Maside. O programa do acto (que se pode descargar aquí en formato .pdf: Programa oficial Maside 20-11-2010) é o seguinte:
– 12.00 Apertura e Lectura dos Títulos de Nomeamento.
– 12.02 Semblanza de Francisco Luís Bernárdez, a cargo do Profesor Luís González Tosar.
– 12.15 Resposta de D. Xosé Ricardo Rodríguez.
– 12.17 Semblanza de D. Víctor Campio Pereira, a cargo do Profesor D. Xesús Alonso Montero.
– 12.35 Resposta de D. Víctor Campio Pereira.
– 12.45 Intervención de D. Xosé Luís Méndez Ferrín, Presidente da Real Academia Galega.
– 13.00 Lectura de dous Poemas por alumnos do CPI de Maside.
– 13.05 Intervención de D. Francisco López Rodríguez, Director Xeral de Promoción e Difusión da Cultura.
– 13.10 Intervención de D. Anxo Lourenzo Suárez, Secretario Xeral de Política Lingüística.
– 13.15 Intervención de D. Celso Fernández López, Alcalde de Maside.
– 13.20 Interpretación do Himno Galego.

Instituto Camões e Consello da Cultura Galega asinaron o primeiro protocolo-marco para realizar actividades conxuntas e intercambios culturais

Publicado o por

O Consello da Cultura Galega e o Instituto Camões asinaron en Compostela un pioneiro protocolo-marco de colaboración para fomentar a realización de actividades conxuntas e o intercambio de experiencias culturais. Os titulares das dúas institucións, Ramón Villares e Ana Paula Laborinho, respectivamente, subliñaron a importancia dunha iniciativa “que abre camiño para outros obxectivos” (Laborinho) e “que nos ofrece unha antena para a difusión da cultura galega” (Villares). Previo á sinatura tivo lugar un coloquio coa Presidenta do Instituto Camões e representantes do mundo cultural, educativo e universitario de Galicia, no que tamén estivo presente o Secretario Xeral de Política Lingüística, Anxo Lorenzo. Consello da Cultura Galega e Instituto Camões consideran que “para se promover o coñecemento e difusión da cultura galega no exterior e da cultura de expresión portuguesa en Galicia é de fundamental importancia que se establezan relacións de intercambio entre ambas as entidades”. Con esa finalidade trátase de “realizar actividades e proxectos de forma conxunta en todas as áreas que resulten de interese mútuo, especialmente o intercambio de publicacións, a organización de conferencias, seminarios e cursos, a realización de exposicións ou de outros programas que poidan interesar a ambas as partes ou a cadansúa institución”. Ramón Villares e Ana Paula Laborinho expresaron a súa satisfacción pola sinatura deste protocolo-marco e a vontade de facer camiño, logo deste primeiro paso imprescindible para acometer outras iniciativas conxuntas nos vindeiros anos. O Presidente do CCG salientou mais unha vez a especial dimensión que para Galicia supón a presenza activa na comunidade de países de lingua portuguesa. A Presidenta do Instituto Camões falou, pola súa parte, da importancia de contar con Galicia e con España como parceiros privilexiados no espazo europeo e iberoamericano.
Antes da sinatura do protocolo, a Biblioteca do Consello da Cultura Galega acolleu un coloquio de Ana Paula Laborinho con 35 representantes do mundo cultural, educativo, universitario e da empresa de Galicia. No curso do encontro a Presidenta do Instituto Camões falou sobre Presenza da lingua portuguesa no ensino en Galicia e presenza da cultura galega na rede de centros do Instituto Camões. Na sesión interviu tamén Felipe Domínguez Presa, profesor da Universidade de Vigo, co relatorio Situación actual do ensino da lingua portuguesa na educación secundaria en Galicia. No debate, moderado polo profesor Henrique Monteagudo, tiveron ocasión de participar os profesores Dante Luchesi (Brasil), Fernando Venâncio (Portugal), Margarita Ledo Andión, Xosé Luís Rodríguez, Enrique Sáez, Ângelo Cristovão Angueira (secretario da Academia Galega da Lingua Portuguesa), Camilo Nogueira e Luís González Tosar. Uns e outros puxeron de manifesto a necesidade do coñecemento e o recoñecemento, do diálogo e a cooperación Galicia-Portugal para actuar máis eficazmente no horizonte da diversidade.
Vía Consello da Cultura Galega.