Arquivo da categoría: Institucións
A Universidade da Coruña convida a unha lectura pública
A Universidade da Coruña convida a comunidade universitaria -estudantado, persoal de administración e servizos e persoal docente e investigador, así como persoas alleas á comunidade universitaria-, a participar de modo activo nunha lectura pública que terá lugar o vindeiro 18 de maio, no Paraninfo da Reitoría, en horario de mañá (de 12:00 a 14:00 horas) e de tarde (de 17:00 a 20:00 horas), e que estará aberta a toda a cidadanía. Para participaren no acto, todas as persoas interesadas deberán enviar ao enderezo electrónico indicado abaixo propostas de textos coas seguintes condicións:
1. O texto para a lectura estará escrito en lingua galega, con independencia de que sexa traducido
doutra lingua. O Servizo de Normalización Lingüística poderá corrixilo, se for preciso.
2. Non existen para o texto outras limitacións temáticas, estilísticas ou de autoría que as obvias
para un acto deste carácter.
3. A duración da súa lectura non poderá exceder dos cinco minutos.
4. A propia persoa propoñente será quen o lea.
Con carácter excepcional, e sempre que xustifiquen o interese e a súa conexión co sentido da convocatoria, poderanse aceptar como alternativa aos textos outras intervencións, como execucións musicais, danza, mimo etc. Nestes casos rexerá a limitación de tempo de dez minutos por intervención. O enderezo para a recepción de propostas é vocesnasletras(arroba)udc.es e a data límite será o luns 10 de maio.
Servizo de Normalización Lingüística da Universidade da Coruña
A Real Academia Galega recibiu o legado póstumo de Xohán Casal
«A doazón á Academia prodúcese logo de que Manuel Rivas -que foi amigo e veciño de Xohán Casal- lembrou ao que cualificou como o “Kafka coruñés” no seu discurso de ingreso na institución, pero a familia de Raimundo Patiño “levabamos anos teimando nesta idea”.» (GaliciaHoxe.com)
O Consello da Cultura aposta polo emprego progresivo da nosa lingua nas aulas
“Non se pode tratar igual aos desiguais”, sinalou Ramón Villares, Presidente do Consello da Cultura Galega, ao inicio da comparecencia de prensa na que daba conta, canda Henrique Monteagudo, do ditame do CCG sobre as polémicas Bases para a elaboración do decreto do pluringüismo que fixo públicas en Nadal a Dirección Xeral de Política Lingüística. Os pais non poden ser quen decidan en qué lingua se educan os seus fillos, e os alumnos non poderán escoller libremente o idioma que empregan na aula. Este é un dos puntos que recolle o Ditame do Consello da Cultura Galega sobre as Bases para a elaboración do decreto do pluringüismo no ensino non universitario de Galicia que se presentou esta mañá na sede da institución. O pleno do CCG aprobou onte sen ningún voto en contra un texto que recomenda recuperar o consenso arredor do idioma. Entre outras cuestións, o Consello defende que o emprego das linguas no ensino debe seguir o principio de progresividade do galego que recolle o Plan Xeral de Normalización, e que as porcentaxes concretas deberán ter en conta o contexto de cada centro. Ao tempo recomenda a creación dunha oferta educativa en galego para alumnos de entre 0 e 3 anos e a atención ás linguas minoritarias en contextos bilingües. Do mesmo xeito, apunta que a introdución dunha lingua estranxeira no ensino debe ir de xeito voluntario e gradual, e non se facer a costa dunha das linguas oficiais e regularse nunha norma separada.
Descargar DITAME DO CONSELLO DA CULTURA GALEGA SOBRE AS “BASES PARA A ELABORACIÓN DO DECRETO DO PLURILINGÜISMO NO ENSINO NON UNIVERSITARIO DE GALICIA”: PDF, 192 KB
A prensa galega recolle o ingreso de Manuel Rivas na RAG
A Nosa Terra: “Temos unha academia de heterodoxos” (entrevista) [1] / O académico Rivas alerta da asfixia á lingua [2]
Xornal de Galicia: Rivas, o académico máis novo
El País: “La cultura gallega no puede ser un parque temático” [1] / Ausencias y presencias [2]
La Opinión de A Coruña: “Iso do sentidiño a min non me gustou nunca” (entrevista)
Galicia Hoxe: O académico da flor de toxo
El Ideal Gallego: Rivas refuerza su compromiso con Galicia
El Progreso: Manuel Rivas ingresa na RAG comprometido coa defensa do idioma e o patrimonio cultural
Vieiros: Manuel Rivas ingresa na RAG con palabras de “memoria, ecoloxía e lingua”
La Voz de Galicia: Manuel Rivas proclama o milagre da literatura no discurso do seu ingreso como membro numerario
Faro de Vigo: Manuel Rivas ingresa na Real Academia Galega
Manuel Rivas le o seu discurso de ingreso na Real Academia Galega
O próximo sábado 12 de decembro, ás 12:00 horas, no Paraninfo da Universidade da Coruña (Mestranza, s/n) terá lugar o acto de recepción como académico de número do escritor Manuel Rivas Barrós, quen dará lectura ao discurso de ingreso A boca da literatura (Memoria, ecoloxía e lingua), e a quen responderá en nome da Academia Xosé Luís Axeitos Agrelo.
Manuel Rivas lendo o seu artigo O contentamento descontente na Feira do Libro da Coruña, en agosto de 2008
Manuel Rivas entra na Real Academia Galega
O escritor e xornalista coruñés Manuel Rivas (A Coruña, 1957) foi nomeado onte membro electo da Real Academia Galega e ocupará a vacante que deixou o falecemento, en novembro de 2008, do académico numerario Camilo González Suárez-Llanos, máis coñecido na literatura galega como Camilo Gonsar. [Ler noticia completa]
Bernardino Graña ingresa na Real Academia Galega
O escritor Bernardino Graña foi elixido onte académico numerario na reunión de onte dos membros da Real Academia Galega na que se acordou ademais dedicar o Día das Letras 2010 ao poeta do Courel Uxío Nonoveyra. Nacido en Cangas do Morrazo en 1932, Bernardino Graña é recoñecido sobre todo como poeta, aínda que tamén é autor de pezas teatrais e dunha importante obra narrativa no ámbito da literatura infantil.
A Coruña: II Encontros Cidade da Coruña
Hoxe comezan os II Encontros, a se desenvolveren na Sede da Real Academia Galega (Rúa Tabernas, 11), ás 20.00, baixo o lema “Mulleres na Literatura”. Comezarán esta tarde coa presenza da escritora María Reimóndez, e continuarán con Elena Poniatowska (8 de maio), Marilar Aleixandre (15 de maio) e Teresa Moure (22 de maio). Co patrocinio e colaboración da Concellaría de Cultura do Concello da Coruña.
Roberto Varela, novo Conselleiro de Cultura e Turismo
O presidente da Xunta, Alberto Núñez Feijóo, asinou hoxe o decreto de estrutura da Xunta, o cesamento dos anteriores conselleiros e o nomeamento dos novos membros do goberno. Da Consellería de Cultura e Turismo farase cargo o diplomático Roberto Varela, que dende 2004 desempeñaba a función de Cónsul en Nova York encargado de asuntos culturais. Neste enderezo poden ver unha entrevista con Roberto Varela feita en decembro de 2007 por Isaac Cordal, Roi Fernández e Berio Molina para o documental Balor, a little Galician accent but good.
