Galicia21, a primeira revista académica online de estudos galegos xa está dispoñible na rede e recibe dende o seu lanzamento no pasado mes de xullo máis de 60 visitas diarias de lectoras e lectores de todo o mundo. Os editores da revista son Craig Patterson (Cardiff University) e Helena Miguélez Carballeira (Bangor University). Grazas ao seu formato innovador e á achega multidisplinar e crítica que a revista pretende promover para a disciplina dos estudos galegos contemporáneos, o medio está sendo consultado polas comunidades investigadoras e académicas de todo o mundo, sendo os Estados Unidos, Brasil, España e o Reino Unido os países dende os que teñen partido a maioría das pescudas.

O primeiro número de Galicia21 inclúe, entre outros, artigos académicos da escritora e tradutora María Reimóndez, a poeta e académica María do Cebreiro, e Anxo Lorenzo, profesor da Universidade de Vigo e actual Secretario Xeral de Política Lingüística. Tamén inclúe a título de autor convidado un artigo do escritor Miguel Anxo Murado e unha entrevista a Domingo Villar, autor de Ollos de auga, co motivo da súa conferencia no Festival do Libro de Edimburgo no verán de 2008.

Galicia21 manterá este formato nos vindeiros números, sempre incluíndo artigos académicos, recensións de publicacións académicas recentes e un artigo convidado de cariz máis creativo ou especulativo. O obxectivo principal da primeira revista académica de estudos galegos dispoñible na rede e en formato bilingüe (galego e inglés) é o de convertirse nun punto de encontro e de referencia para o crecente número de investigadoras e investigadores que conforman a comunidade académica internacional dos estudos galegos contemporáneos.