O sábado 24 de xullo, a partir das 18:30 h., no local de Sargadelos de Santiago (na rúa Nova), o Grupo de acción poética Penúltimo Acto presenta o libro, co mesmo nome do grupo, Penúltimo Acto.
Arquivo da categoría: Poesía
Santiago: presentacións de libros no Festigal o sábado 24 de xullo
Na Galería das Letras do Festigal 2010, que se celebrará no Campus Universitario Sul, desenvolveranse as seguintes 
presentacións de libros o sábado 24 de xullo:
Ás 13:00 h., presentación de Cantares Galegos, de Rosalia de Castro, adaptado polo académico da AGLP Higinio Martins. No acto intervirán tamén Héitor Rodal, Ernesto Vázquez Souza e Concha Rousia.
Ás 16:00 h., presentación de Liquilí, portal galego de cultura infantil.
Ás 16:30 h., Ugia Pedreira presenta Noente Paradise, publicado en Através Editora, da AGAL.
Ás 17:00 h., preséntase o libro Xosé Chao Rego. Renacer galego. Actas do Simposio-Homenaxe, publicado pola Fundación Bautista Álvarez, coa presenza de Francisco Fernández Rei, Bernardo García Cendán e Marcos Maceiras Eiras.
Ás 17:45 h., Séchu Sende presenta Animais!, tamén publicado en Através Editora, da AGAL.
Ás 18:30 h., Rosa Aneiros presenta Sol de Inverno, premio Xerais 2009. Neste acto intervirán Manuel Bragado e a propia autora.
Ás 19:15 h., Carlos Callón presenta En castellano no hay problema, publicado en Xerais, acompañado de Manuel Bragado, Alba Nogueira e Caetano Díaz.
Ás 20:00 h., Goretti Sanmartín presenta o libro, coordinado por ela, Lingua e futuro, publicado en Laiovento.
Ás 20:45 h., Artur Alonso Novelhe presenta Filhos da brétema, publicado en Galiza Editora.
Ás 21:30 h., Moncho Iglesias presenta Tres cores: azul, publicado en Estaleiro, acompañado de Vítor Suárez e Samuel Solleiro.
E, por último, ás 22:00 h., Luis Villares presenta Estudos xurídicos sobre o Decreto do plurilingüismo, publicado en Laiovento.
A Coruña: Encontros en Milpedras, recital de poesía, música e pintura en directo
Este venres 23 de xullo, ás 20:30 h., desenvolverase no Taller de Litografía Milpedras, na rúa Brasil, nº 3, baixo, da Coruña, a primeira edición de Encontros en Milpedras, unha proposta para unir en diálogo libre, ao vivo e en directo, poesía, música e artes plásticas. Actuarán recitando poemas Xoán Abeleira, Pedro Casteleiro, François Davó e Ramiro Torres, co músico Dúbi Baamonde e o artista plástico sirio Ali Ali.
Elías Portela: “En Islandia é máis doado publicar e tes máis recoñecemento”
Entrevista en Xornal.
Cangas: presentación de Pan prós crocodilos, de Calros Solla
O 23 de xullo, ás 20:30 h., Calros Solla presentase o seu poemario Pan prós crocodilos, publicado por Edicións Barbantesa, no SalaSón de Cangas. No acto o autor estará acompañado por João Bieites e Rafa Quintía (Serpe Bichoca), Ana Acuña e Os Chichisos de Pontevedra.
Fisterra: recital poético dentro da “2ª Festa Nacionalista da Costa da Morte”
O domingo 18 de xullo, desde as 14:00 h., no marco da “2ª Festa Nacionalista da Costa da Morte” que se celebra en Fisterra (Paseo marítimo da praia da Langosteira), terá lugar un recital poético a cargo de Rafa Villar, María Lado, Alexandre Nerium, Mónica Góñez e Modesto Fraga. O acto enmárcase na xornada de confraternidade organizada pola asemblea local do BNG de Fisterra. Haberá, amais do recital de poesía, distintas actividades culturais e un xantar de irmandade.
Alexandre Nerium: O rumbo do océano
Entrevista a Alexandre Nerium en Galicia Hoxe:
Galicia Hoxe (GH): Fálame da Antoloxía Poética sobre as Fisterras que estás preparando? Qué título vai levar?
Alexandre Nerium (AN): Fai preto de dez anos comecei unha colectánea de poemas onde aparecese a palabra Fisterra, Finisterra, Finisterre… e foron moitos escritores os que me axudaron a conseguir eses textos. Porén é unha antoloxía compartida. Textos éditos, inéditos, traducións de autores de todo o mundo como Geoffrey Chaucer, Sylvia Plath, Eugenio Montale, Benedetti, Pablo Armando Fernández, Lêdo Ivo, Machado, Gerardo Diego, Alberti, Cabanillas, Luís Seoane, Manuel María, Valente, António Salvado, Ferrín, Bodaño, Cáccamo, César Antonio Molina, Manolo Rivas… máis de 190 autores conforman hoxe esta antoloxía que será intitulada Aradomar… ecos cara ó confín do mundo.
GH: Francisco Fernández Rei dicía no prólogo ao teu libro Vogar de couse que era “unha singradura da existencia humana”.
AN: Tres longos invernos, cando os tombos de mar gabeaban polo dique de abrigo e me impedían ir á procura do longueirón, fun armando con agullas de barbas de balea as entoradas trallas de Vogar de couse. De complexa estrutura pois pretendía compoñer unha estrofa que nunca se dera na Literatura Universal. Despois dun estudo profundo observei que só se podían construír cinco tipos de quintetos distintos (libros de quintetos hai moitos máis ningún con cinco rimas diferentes) e logo encadeei as rimas. Son unha única estrofa: Quintetos encadeados. O poemario está dividido en cinco partes e introducinas nas catro estacións do ano: a primavera referente á nenez; o estío á adolescencia; o outono-inverno a madurez (en dúas partes) e o inverno na senectude. Singraduras nas que hai que arrostrar cara á barlovento os temporais da vida.
GH: A poesía é como unha illa na que aínda hai verdade, emoción e esperanza?
AN: A poesía faite libre coma un mascato voando na inmensidade do océano, mais cando sentes a crueldade do embate cobizoso e o sórdido axirido das gaivotas faite ser rebelde e resistente. Hai moita inxustiza que combater e moita fame que saciar. A poesía pode cambiar o rumbo.
A entrevista completa pódese ver aquí.
Vigo: recital “Poesía Alimentaria”, con poesía, música e pintura
O sábado 10 de xullo, ás 21:30 h., en La Galería Jazz (Ronda de Don Bosco, 21) de Vigo, celébrase un recital poético acompañado de música e pintura en directo baixo o nome de Poesía Alimentaria, con Lucía Aldao, Ledicia Costas e María Lado, entre os participantes. Máis información aquí.
Vigo: sinatura de libros Fran Alonso e recital poético
No marco da Feira do Libro de Vigo, este domingo 4 de xullo, a partir das 20:00 horas, Fran Alonso asinará exemplares do libro A araña e máis eu, publicado en Kalandraka.
Desde as 20:30 horas levarase a cabo un recital poético do grupo Brétema, de Vigo, coa participación de Carmen Darriba, José Tizado, Rosa Mª Morales, José Á. Carvajal, Candela Fernández, José M. Oliveira, Esmeralda Muíños, Mariano M. Abalo, Gelu García, Isabel González, Anselmo Prada, Isabel Ruíz, Margarita Agulló, Sergio López, Mª Luisa López, Rafael Gómez, Mª Rosario Sabín, Miguel Correa, Rosa Mª González, Félix Loira, Teresa Cariño, Bernardo Quiñones, Mª Carmen Duro, Fernando Campos, Telvi Dasilva e Alonso Rodríguez.
Santiago: recital poético-musical Camiños de amor e lúa, no CGAC
O venres 2 de xullo, ás 22:45 h., no Centro Galego de Arte Contemporánea (CGAC), terá lugar o acto de clausura do espectáculo poético Camiños de amor e lúa, que visitou 30 concellos dos distintos camiños de Santiago en Galiza. No acto recitaran os poetas: Xosé Carlos Caneiro, María Canosa, Olalla Cociña, María Lado, e X. H. Rivadulla Corcón. Acompañados polos músicos: Bernardo Martinez, Willy Mondeja, Xosé Manuel Salgado, Miguel Seoane e Franky Valencia. Camiños de amor e lúa é unha experiencia poética patrocinada pola Sociedade de Xestión Xacobeo 2010, e encadrada dentro do programa do Ano da Lectura desenvolvido pola Dirección Xeral de Promoción e Difusión Cultural, coa que se buscou que no ano xacobeo a poesía tamén fose protagonista. Máis información aquí.
