Arquivo da categoría: Poesía
Lugo: presentación de Palabras para un baleiro, de Baldo Ramos
María do Cebreiro publica en inglés na Shearsman Books
«Un de Manuel Rivas, outro de Miguel Anxo Murado, dous de Chus Pato e agora outro de María do Cebreiro. Se non lle fallan as contas ao tradutor Jonathan Dunne, cinco son os libros de versos galegos importados até hoxe pola literatura inglesa. O máis recente, publicado hai só uns días, é I Am Not from Here, da poeta e profesora María do Cebreiro Rábade Villar (Santiago, 1976), a tradución inglesa de Non son de aquí (Xerais, 2008). Helena-Miguélez Carballeira, directora do Centro de Estudos Galegos da Universidade de Bangor (Gales), preparouna para o selo británico Shearsman Books.
Non é a primeira vez que a editora de Exeter, no oeste de Inglaterra, pon os ollos na poesía galega. No seu catálogo están tres dos cinco libros dos que fala Dunne. En 2007 publicou Selected poems, unha escolma de Rosalía con textos de Follas Novas (1880) e Cantares gallegos (1853) traducidos por Michael Smith, e Charenton, versión da canadense Erín Moure do poemario homónimo de Chus Pato (Ourense, 1955). Só dous anos máis tarde repetiría autora, tradutora e título orixinal con m-Talá. Ambos volumes viran a luz orixinalmente en Xerais (2004 e 2000) e chegan tamén ao mercado canadense a través de Buschek. […]» (Xornal.com)
Compostela: presentación do libro Níxer, de Francisco X. Fernández Naval, Camilo Franco, Alfonso Costa, Moustapha Bello Marka
O acto, que contará coa participación de Alfonso Costa, Camilo Franco, Francisco Fernández Naval, Isabel Iglesias Santos e Manuel Bragado, terá lugar o vindeiro mércores, 28 de abril, ás 20:15 horas no Casino de Santiago na rúa do Vilar.
A Coruña: presentación de Do corpo e a súa ausencia, de Medos Romero
A Asociación Cultural Alexandre Bóveda informa de que o vindeiro martes 27 de abril, terá lugar a presentación do libro Do corpo e a súa ausencia, de Medos Romero. A autora estará acompañada por Xulio López Valcárcel e Dores Sánchez Alegre. Será ás 20:30 h. no salón de actos da asociación. O libro está editado dentro da colección Esquío.
O Courel: homenaxe a Uxío Novoneyra
Domingo, 9 de maio de 2010. PROGRAMA:
-Concentración na Ferrería de Seoane do Courel antes das 11 h., onde se estacionarán os autos.
-11 h. Camiñada desde a Ferrería con destino a Parada (lugar natal de Uxío Novoneyra) en que se fará un percorrido de 3 quilómetros de encosta. Calculamos chegar sobre as 13 h. Durante esta camiñada faranse paradas para recitar poemas de Novoneyra que as persoas que o desexen poderán escoller os poemas preferidos de Novoneyra e recitalos, entre outras actuacións. Este itinerario farase a pé. Os autos ficarán na Ferrería, dado que Parada non ten capacidade para estacionar mais de dez coches que son os dos veciños. Por tanto pedimos que se estimen as recomendacións que faga Protección Civil do Courel que estará na Ferrería para organizar os estacionamentos.
-13 h. Comezo do acto de homenaxe, xunto a casa natal do poeta, que consistirá en evocar a Uxío Novoneyra e ao seu espazo natural que é o Courel. Os participantes que desexen falar neste acto deben manifestalo, con urxencia, a seguinte dirección: uxionovoneyraarrobagmail.com
Co fin de distribuír os tempos en función das persoas que desexen evocar a persoa e a obra de Uxío Novoneyra, exclusivamente. Neste acto intervirán músicos e cantautores entre outros aportacións que faga o público neste aspecto. Para este acto central, reiteramos, debemos contar previamente cunha nómina de solicitantes para as palestras. Para o recital itinerante, desde a Ferrería até Parada, non existirá ningunha nómina de intervintes.
-15 h. Rematará o acto de evocación e homenaxe cunha ofrenda floral diante da casa de Uxío Novoneyra que fará un grupo de escolares do Courel. A partir dese momento daremos por finalizado o acto.
MOI IMPORTANTE
-Dadas As condicións tan especiais do Courel en varias materias, unha delas son os dous acesos principais, un por Pedrafita do Cebreiro e outra por Quiroga. Moita atención polo estado das estradas e, sobre todo, para os que non coñecen o Courel. Na Ferrería deben estar atentos as indicacións que nos dea Protección Civil en cada momento, tanto no estacionamento como no lugar de concentración que, como dixemos, a hora de partida será ás 11 h.
-Dada a variación climatolóxica do Courel recomendamos que leven paraugas ou chovisqueiros, tamén pode estar un día de moita calor, como é típico nos altos cumes do Courel. Estas variacións teñen que terse moi en conta.
-Tamén recomendamos que as persoas leven na súa mochila comida e bebida, dado que en Parada non hai bares nin posibilidade algunha de adquirir alimentos. Por outra banda, a infraestrutura hostaleira no Courel son mínimas e están dispersadas por diversos núcleos de poboación. Para unha maior información entren en contacto coas páxinas web relacionadas coa hostalería e restauración de Folgoso do Courel.
-Os que decidan comer de campo en Parada, despois do acto, Poderán facelo nos soutos que rodean a casa de Novoneyra, con fermosas paisaxes. Os que tomen esta decisión non deben acender lume, por tratarse dunha zona sumamente sensíbel aos incendios. Tamén deben recoller o lixo que xere cada un.
Poetas na Festa do libro da Coruña
Foi un éxito rotundo a iniciativa da Concellaría de Cultura da Coruña en colaboración coa AELG que tivo lugar o pasado sábado no Kiosco Alfonso, e que congregou abondoso público acarón de poetas e ilustradores. Un evento inédito que deixou moi satisfeitos tanto aos poetas como á organización.
[kml_flashembed movie="http://www.youtube.com/v/QAchyfQenBY" width="425" height="350" wmode="transparent" /]
“Encontro poético” no Kiosko Alfonso da Coruña
Será o sábado 24 de 18:00 a 21:00, no Kiosko Alfonso: «Dentro do programa de actividades da Feira da poesía terá lugar un “Encontro poético” no Kiosko Alfonso. Trátase de propiciar o encontro dos lectores cos poetas para que podan conversar e se o desexan mercar poemas ou mesmo confeccionar a súa persoal antoloxía no momento. Contaremos coa presenza de Francisco Xosé Fernández Naval, Estíbaliz Espinosa, Lois Diéguez, Paloma Calvo, Eduardo Estévez, Antía Otero, Xavier Seoane, Eva Veiga, Alberte Suras, Ánxeles Penas, Olga Patiño, Chelo Suárez, Begoña Paz, Xosé Abeal, Eli Ríos, Diana Varela Puñal… Ademais, participarán ilustradores pertencentes a Asociación Galega de Profesionais da Ilustración (AGPI), o que sen dúbida aumentará o valor do evento.» (Concellaría de Cultura da Coruña)
Folgoso do Courel: presentación do Dicionario Uxío Novoneyra, de Esperanza Mariño Davila
«3C3 Editores, coa colaboración do Concello de Folgoso do Courel, comprácese en convidalo/a á presentación do libro Dicionario Uxío Novoneyra, de Esperanza Mariño Davila. No acto intervirán Dolores Castro Ochoa (alcaldesa de Folgoso do Courel), X. Amancio Liñares Giraut (director editorial de 3C3), Eugenio Pichel (editor) e a propia autora. Será no Local Cultural Municipal de Seoane do Courel (FOLGOSO DO COUREL – LUGO), o sábado 24 de abril, ás 13:00.»
Atenea solicita colaboracións de poesía galega
«O Ateneo Ferrolán, querendo acadar un mellor xeito de colaboración e apoio á difusión das letras, pon á vosa disposición a revista trimestral Atenea para que enviedes a vosa poesía en idioma galego e, de quedar seleccionada, a publicaremos en verán nun número extraordinario da nosa revista. De estar interesado/a, ponte en contacto con nós ou envíanos por correo electrónico o teu poema facendo constar o teu nome, enderezo e contacto antes do 10 de xuño de 2010.
Esta publicación sae catro veces no ano e desde 1999 con 1000 exemplares. Distribúese gratuitamente a Centros de Ensino, Culturais, Bibliotecas e Centros de especial interese de Galicia e España.»
Contacto:
E-mail: secretaria@ateneoferrolan.org
Telf.: +34 981 357 970
Fax: *981 354 098
Dirección Postal: Rúa Magdalena 202-204, 1º.
CP.15402 – FERROL (Galiza)
