(Xornal)
Arquivo da categoría: Premios ensaio: ditames
Xosé Luís Díaz Castroverde gaña o Certame de Investigación Condado de Pallares
O profesor coruñés Xosé Luís Díaz Castroverde Lodeiro gañou o Certame de Investigación Condado de Pallares, convocado pola Asociación de Amigos do Mosteiro de Ferreira de Pallares por un traballo que leva por título Morgados e xurisdicións na terra de Taboada. O galardoado, que na actualidade exerce a docencia na Coruña, abordou no estudo premiado a historia familiar, entre os séculos XV e XVIII, da Casa de Taboada, vinculada nas súas orixes ao Pazo de Bembibre. Ademais de recibir un diploma e un premio de 3.000 euros, o autor tamén verá editado o seu traballo pola área de cultura da Deputación.
Coñécense os gañadores dos XV premios de investigación Ferro Couselo
O tribunal do xurado do XV Premio Ferro Couselo, presidido por José María Bello Maneiro, Alcalde–Presidente do concello de Valga; e formado por Fernando Acuña Castroviejo, catedrático de Arqueoloxía da Universidade de Santiago de Compostela; Marcial Gondar Portasany, catedrático de Antropoloxía da Facultade de Filosofía e Ciencias da Educación da Universidade de Santiago de Compostela; Xulio Rodríguez González, facultativo do Corpo Superior de Museos; Pegerto Saavedra Fernández, catedrático de Historia Moderna da Universidade de Santiago de Compostela; Pablo Sánchez Ferro, membro do Corpo facultativo de Arquivos e neto de Xesús Ferro Couselo; e José Ramón Rial Becerra, como secretario, vén de facer público os gañadores da edición deste ano. Na primeira modalidade, para traballos de investigación de ámbito galego, recaeu na obra presentada baixo o lema O penedo Amarelo, e que corresponde á coruñesa María de los Ángeles Verea Castelo e o título do traballo Estudo das migracións estacionais dos telleiros do Baixo Miño. 1750-1900). Na segunda modalidade, consistente nunha bolsa para proxectos centrados en estudos históricos sobre Valga, foi para o proxecto presentado baixo o lema Os cabaqueiros e que corresponde ao vigués Alejandro Fernández Palicio e o título do proxecto O Patrimonio Industrial de Valga. As telleiras e as fábricas de Cerámica. O xurado, asímesmo, outorgou unha mención especial as obras presentadas á primeira modalidade baixo o título Isidro Parga Pondal: as redes de coñecemento científico e Emigrados galegos a Portugal durante a guerra civil e a posguerra, pola enorme calidade de ámbolos dous traballos.
Ourense: presentacion do Premio Ramon Piñeiro de Ensaio 2008
Premios da AELG 2010
[blogaliza.org emitiu os premios ao vivo por qik.com]
ENSAIO, LITERATURA INFANTIL E XUVENIL, POESÍA, NARRATIVA, TRADUCIÓN, TEATRO, TRAXECTORIA XORNALÍSTICA E BLOG LITERARIO
Na celebración da Cea das Letras, un dos actos máis importantes na vida da Asociación de Escritores en Lingua Galega, foron entregados os premios á mellor obra publicada no 2009 nas modalidades de ensaio, literatura infantil e xuvenil, poesía, narrativa, tradución, teatro, traxectoria xornalística e blog literario, así como á institución que salientara na defensa e difusión da nosa cultura.
Os galardóns, concedidos por escritores/as para escritores/as, levan camiño de se afianzar como uns dos de máis prestixio no noso panorama literario.
Da conxunción de votos emitidos nunha primeira quenda polos asociados/as á AELG -coa participación dos socios/as de Gálix para elixir a mellor obra de Literatura Infantil e Xuvenil e dos membros do Colexio de Xornalistas para a modalidade de Traxectoria xornalística-, elaborouse unha listaxe de obras finalistas correspondentes a cada xénero dos mencionados, sobre a que os socios e socias emitiron de novo o seu voto nunha segunda quenda para elixir as obras gañadoras dos Premios AELG.
Unha vez computados os votos, os gañadores do Premio AELG ás mellores obras publicadas no 2009 son:
Ensaio: Xesús Alonso Montero, pola súa obra Cartas de republicanos galegos condenados a morte (1936-1948) (Xerais)
Literatura Infantil e Xuvenil: Agustín Fernández Paz, pola súa obra Luz do Senegal (Xerais)
Poesía: Luz Pozo, pola súa obra Deter o día cunha flor (Baía)
Narrativa: Xosé Cid Cabido, pola súa obra Unha historia que non vou contar (Xerais)
Tradución: Bartug Aykam e María Alonso Seisdedos, pola tradución da obra O museo da inocencia, de Orham Pamuk (Galaxia)
Teatro: Rubén Ruibal, pola súa obra Delimvois (Xerais/IGAEM)
Mellor traxectoria xornalística: Manuel Rivas
Blog Literario: Manuel Bragado, polo seu blog Brétemas
Institucións: Salón do Libro Infantil e Xuvenil de Pontevedra
Escritor Galego Universal: Juan Gelman
Pilar García Negro, XV Premio Vicente Risco de Ciencias Sociais
Reunido o xurado, composto por Fernando Acuña Castroviejo (en representación do Concello de Castro Caldelas), Teresa Devesa Graña (en representación do Concello de Allariz) que enviou o seu voto por correo, Luís Martínez-Risco Daviña (en representación da Fundación Vicente Risco), Francisco Fernández Rei (en representación da Fundación Sotelo Blanco) e Xosé María Eguileta Franco (en representación da Fundación Vicente Risco e Fundación Sotelo Blanco), acordou por unanimidade:
1.-Valorar a calidade científica dos traballos presentados.
2.-Conceder o XV PREMIO “VICENTE RISCO” DE CIENCIAS SOCIAIS ó traballo
presentado co lema Firmiter in re, suaviter in modo e co título O clamor da rebeldía. O nacemento do ensaio na literatura galega contemporánea, simultáneo ao nacemento da conciencia de xénero: análise e interpretación de textos rosalianos. Aberto o sobre correspondente, a persoa gañadora resultou ser María Pilar García Negro, domiciliada na Coruña.Trátase dun excelente ensaio no que a autora con gran madurez reflexiona sobre a figura de Rosalía non só como fundadora da literatura galega contemporánea senón tamén como membro dun colectivo que nunha situación totalmente adversa e de xeral desprestixio de Galicia e dos galegos soubo reivindicar a lingua galega e tamén a dignidade das galegas e galegos como pobo.
Este premio está dotado con 6.000 euros e a obra gañadora será publicada por Sotelo Blanco Edicións.
En Santiago de Compostela, a 27 de febreiro de 2010.
Vigo e Lugo: un ensaio sobre Maruja Mallo leva o premio Ánxel Fole
O xoves 26 de novembro, ás 18 horas, no centro cultural de Caixagalicia en Vigo (Rúa Policarpo Sanz, nº 15), Carlos Nuevo Cal e Emilio Xosé Ínsua darán a conferencia Maruja Mallo: de prometedora pioneira a artista universal, que tamén é o título do ensaio polo que recibirán ao día seguinte, venres 27 de novembro, ás 21 horas, o 23º premio de ensaio Ánxel Fole no Círculo das Artes de Lugo. A entrada é libre.
Manuel Reyes Mate, Premio Nacional de Ensaio
Manuel Reyes Mate (Valladolid, 1942) foi galardonado co Premio Nacional de Literatura na modalidade de ensaio correspondente a 2009 pola súa obra La herencia del olvido, editado por Errata Naturae. O Premio concédeo o Ministerio de Cultura para distinguir unha obra de autor español, escrita en calquera das linguas oficiais do Estado e editada en España durante 2008. O galardón está dotado con 20.000 euros. [Ler nota de prensa do Ministerio de Cultura]
Xosé Ramón Quintana Garrido gaña o VIII Ramón Piñeiro de ensaio
Xusto Beramendi gaña o Premio de Ensaio do Ministerio de Cultura
(Vieiros)
