O 
venres 4 de marzo, ás 20:00 h., na sala de exposicións do Centro Cultural da Deputación de Ourense (Rúa do Progreso, 30), preséntase o libro O lecer das augas. Historia dos balnearios en Galicia. 1700-1936, publicado en Galaxia. No acto participan Benigno Amor, Víctor F. Freixanes e Luís Alonso Álvarez.
Rianxo: a Casa Museo de Manuel Antonio abrirá esta primavera
Cuenca: participación galega nas Xornadas Internacionais Investigar en Literatura Infantil y Juvenil
Varios 
membros da Sección de Crítica Literaria da Asociación de Escritoras e Escritores en Lingua Galega asistirán ás Xornadas Internacionais Investigar en Literatura Infantil y Juvenil que se van celebrar en Cuenca, organizadas pola Universidad de Castilla La Mancha, o xoves 10 e venres 11 de marzo, co obxecto de expoñer o labor que se está a desenvolver en varios proxectos de investigación sobre Literatura Infantil e Xuvenil vinculados á Universidade de Santiago, e que dirixe Blanca-Ana Roig Rechou, quen forma parte do comité científico destas Xornadas, e tamén achegas a distintos aspectos específicos nos que estamos a investigar sobre a Literatura Infantil e Xuvenil galega. Máis en concreto, esta é a presenza galega:
Xoves 10:
– 17:15 h. Mónica Álvarez Pérez: Educación Literaria e Literatura Infantil e Xuvenil.
– 18:15 h. Geovana Gentili Santos: Cando dous clásicos se encontran: Charles Perrault (1628-1703) por Monteiro Lobato (1882-1948).
– 18:45 h. Isabel Mociño González: Estudo comparado da narrativa infantil de ciencia-ficción nas literaturas galega e portuguesa.
– 19:00 h. Xulio Pardo de Neyra: Vangardismo peninsular e revolución plástica: as literaturas infantís galega e portuguesa. Relacións e comparatismo baixo o canon literario.
Venres 11:
– 09:45 h. Blanca-Ana Roig: A rede LIJMI.
– 16:45 h. María del Carmen Ferreira Boo: O conto de transmisión oral na Literatura infantil e xuvenil galega (2000-2009): tipos de reescrita.
– 16:45 h. Eulalia Agrelo Costas: Da institución escolar ao centro do canon: Agustín Fernández Paz.
– 17:00 h. Alba Alonso Feijoo: The New Millennium boy crisis.
– 17:15 h. Marta Neira Rodríguez: A muller na narrativa infantil e xuvenil sobre Guerra Civil Española no marco ibérico.
– 17:30 h. Mar Fernández Vázquez: Carlos Casares no campo/sistema da LIX galega.
– 18:00 h. Vanessa Regina Ferreira da Silva: Por dentro da arte: un estudo comparado de ‘Amigos secretos’ (1996), de Ana Mª Machado, e ‘A casa da luz’ (2002), de Xabier P. Docampo.
Vigo: proxección de Translittera, de Rafael Xaneiro
O 
mércores 2 de marzo, ás 17:00 h., no Salón de Actos da Facultade de Filoloxía e Tradución da Universidade de Vigo (Rúa das Cantigas, s/n.), nas Lagoas-Marcosende, proxección de Translittera, de Rafael Xaneiro. Esta obra foi realizada durante as Xornadas de Novas Linguaxes Poéticas que tiveron lugar en Santiago, A Coruña, Vigo, Cecebre e Trasalba entre o 18 de novembro e o 3 de decembro de 2005, coa participación de Antón Lopo, Iván Prado, Carlos Santiago, Pepe Sendón, Yolanda Castaño, Rafael Xaneiro, Estevo Creus, David Creus, María Lado, Lucía Aldao, Manolo Cortés, Cristina F., Lomarti Adri, minus bálido, Ana Cibeira e Carlos Quiroga, entre outros.
XII Certame Literario Alfredo Suárez Ferrín de valores cívicos e morais
BASES
PRIMEIRA. O Instituto de Estudios Políticos y Sociales convoca a XII edición do Certame Literario Alfredo Suárez Ferrín de valores cívicos e morais. O tema a desenvolver na presente convocatoria é Memoria Histórica: Valor Moral dun pobo.
SEGUNDA. Poderá participar calquera persoa que o desexe.
TERCEIRA. Establécese o seguinte premio: Dotación económica de 1000 euros, doados polo Concello de A Coruña, e Diploma de honra.
CUARTA. Os traballos terán unha extensión mínima de 8 folios e máxima de 15. Os orixinais presentaranse mecanografados a dous espazos e por unha soa cara. Os traballos poderán estar escritos en galego ou castelán.
QUINTA. Enviaranse cinco copias dos orixinais, sen asinar e cun lema que figurará tamén nun sobre aparte, e no que se incluirán nome e apelidos, enderezo e teléfono da persoa concursante, así como fotocopia do carné de identidade.
SEXTA. Os traballos remitiranse ao seguinte enderezo:
“Instituto de Estudios Políticos y Sociales
(XII Certame Literario Alfredo Suárez Ferrín)
Rúa Juan Flórez, 109-113, local 7 (entrada por R/ José Cornide)
15005 A Coruña”
Tamén se poden entregar persoalmente no devandito enderezo, en horario de 9:30 a 14:00 e de 16:30 a 20:00 h, de luns a venres.
SÉTIMA. O prazo de presentación de orixinais remata o 25 de marzo de 2011.
OITAVA. O xurado estará composto por persoas representativas do mundo das letras. O seu fallo será inapelábel.
NOVENA. A entrega dos premios terá lugar na cidade da Coruña a mediados de abril de 2011, co gallo da conmemoración das datas da proclamación da II República española, en data e lugar que oportunamente se comunicará. A ausencia do premiado/a no acto entenderase como expresión de que declina o seu dereito ao galardón concedido, renunciando por tanto a calquera reclamación ulterior deste.
DÉCIMA. A persoa gañadora autoriza ao Instituto de Estudios Políticos y Sociales a poder publicar, no medio que estime conveniente, o traballo que resulte galardoado.
O xurado está composto por:
– Presidente: D. Xabier Puente Docampo.
– Vocal: Dª Ánxeles Penas García.
– Vocal: Dª Pilar García Negro.
– Secretaria da Fundación con voz e sen voto: Dª. Constanza Sánchez Santos.
Vigo: sinatura de libros de Manuel Rivas, e tradución ao inglés e francés de Todo é silencio
O 
xoves 3 de marzo, a partir das 18:00 h., na Casa do Libro (Rúa Velázquez Moreno, 27) de Vigo, o escritor Manuel Rivas asinará exemplares de Todo é silencio e de todos os seus libros. Por outra banda, anúnciase a tradución da súa última obra ao inglés e francés.
Convocado o I Premio MOME de Teatro Varela Buxán
A Coruña: representación de A illa das mulleres loucas, de Alfonso Pexegueiro
O 
xoves 3 de marzo, ás 20:30 h., no Teatro Colón da Coruña, representarase a peza que a Compañía Inversa Teatro preparou a partir do libro A illa das mulleres loucas de Alfonso Pexegueiro. A obra é unha peza poética de gran plasticidade na que as fronteiras entre o pasado, o presente e o futuro se esvaen para desvelar un tempo suspendido onde unha muller libra a súa propia batalla por definir os límites entre cordura e loucura. Vanesa Sotelo dirixe esta montaxe, con escenografía de Inversa Teatro, deseño de son de Berrogüetto e música de Anxo Pintos (zanfona) e Quico Comesaña (harpa) e coreografía de Vanesa Sotelo e María Caparrini.
Miguel Pardo Pereira gaña o IX Certame Xornalístico Dora Vázquez
Miguel Pardo Pereira gañou o IX Certame Xornalístico Dora Vázquez, convocado polo Concello de Arteixo, baixo a temática Muller e Educación, grazas ao seu artigo Non é broma. O galardón, dotado con 600 euros, será entregado o venres 4 de marzo ás 19:00 h. no Centro Cívico de Arteixo.
