Este xoves día 22 de abril, ás 20:00 hh., Estaleiro Editora presentará, na biblioteca pública Ánxel Casal de Compostela Movidas/Razóns de peso, primeiro libro publicado da dramaturga e actriz Clara Gayo. O acto contará coa presenza da autora, que estará acompañada polo integrante de Estaleiro Editora e tamén escritor de teatro Marcos Abalde. Con este segundo libro da súa colección de teatro, Estaleiro continúa a apostar polo xénero dramático e por dar a coñecer a autoras sen obra publicada anteriormente.
Bos Aires: proximo encontro dos obradoiros Cousas de Mulleres
A Asociación Herbas de Prata comprácese en convidala-o ao seu próximo encontro dos obradoiros Cousas de Mulleres o sábado día 8 de maio ás 16,00 na Asociación Centro Betanzos. Seguiremos traballando para abrir un espazo para a voz das mulleres, un sitio no que elas sexan escoitadas e teñan a liberdade de falar de todo canto viven, pensan e sinten. O encontro será o sábado 8 de maio ás 16,00 na rúa Venezuela 1536 da Cidade de Bos Aires. Coma sempre, coordinado pola Lic. Patricia Alonso.
Confirmar presenza no (5411) 4381-0424 ou por correo a herbasdeprataarrobagmail.com
A Coruña: ciclo “escrita(s)” da Galería Sargadelos
«Continua o ciclo escrita(s) interesado en pensar as relacións que se dan na producción de textos. Seguimos logo interesados na difereza e na repetición, nas liñas de forza que patentizan os rastros, as marcas, os restos. Así as cousas nesta quenda de paroladas faremos especial fincapé en como todos estas marcas e liñas de forza sempre heteroxéneas chegan no trato co outro.
Callar se cabe diagramas para unha vez pesado o impacto violento do outro, pensalo sen usura. Entón a partir das achegas de X. Carlos Hidalgo (Visita ao Panteón Tipográfico), José Manuel Sande (A viaxe do comediante), Leo Arremecághona (Pan! Pan!! Punk!!!), Gonzalo Hermo (Palabras que mancan:
sensibilidade masoquista e poesía-Outra), Paula Pérez (Sete horas antes), Rubén Centeno (Rostos do desejo em guerra: umha leitura política e bastarda de Jean Genet.) e David Castro (Obradoiro obxetor.) falar das múltiples permeabilidades pero tamén das múltiples oclusións que se dan na relación co outro.
A Galería Sargadelos da Coruña convócavos a todos/as a participar no ciclo de charlas que se desenvolverán entre o 23 de abril e o 17 de xuño as 20:00. Terán
lugar na sala da Rúa Real 56, ás 20:00 h.»
Lugo: presentación de Almoina, un exiliado gallego contra la dictadura trujillista, do historiador cubano-mexicano Salvador Pérez
Organizada pola Federación Galega de Asociacións de Emigrantes Retornados, o martes 27 de abril ás 20:00 será a presentación na Galería Sargadelos de Lugo do libro Almoina, un exiliado gallego contra la dictadura trujillista, do historiador cubano-mexicano Salvador Pérez; coa presencia de Xurxo Martínez Crespo, autor da outra biografía de José Almoina na que inclúe a súa muller Pilar Fidalgo.
A Coruña: presentación d’ O pouso do fume, de Dores Tembrás
Este venres 23 terá lugar a presentación ás 17:30 na sala Marylin do Forum Metropolitano do poemario O pouso do fume (Espiral Maior), de Dores Tembrás.
[kml_flashembed movie="http://www.youtube.com/v/fs63BHJ8CrM" width="425" height="350" wmode="transparent" /]
A Coruña: presentación de O grito do Ipiranga, de Luís Manuel García Mañá
Mañá venres, 23 de abril, ás 19:00 horas na sede da Fundación Barrié da Coruña (Cantón Grande nº 9) presentarase a novela de Luís Manuel García Mañá O grito do Ipiranga. No acto acompañarán ao autor, José María Barja Pérez (Reitor da Universidade da Coruña), Xosé Luís Axeitos Agrelo (secretario da Real Academia Galega) e o editor Manuel Bragado (Xerais).
Xerais na Feira do Libro de Ferrol
Coa Feira do Libro de Ferrol, que se celebrará no Cantón de Molíns entre os días 21 e 25 de abril, coincidindo coa festa do Libro, comeza o ciclo anual de Fieras do Libro organizadas pola Federación de Libreiros de Galicia. Xerais ten preparado unha importante participación en cada unha delas, consciente da importancia de visibilizar na rúa, no contacto coa cidadanía, o libro en lingua galega.
Día 21 mércores
19:30 horas: Pregón a cargo de Vicente Araguas.
20:30 horas: Presentación do libro Xuvia-Neda de Vicente Araguas. Intervirán: Xermán Castro, Nicolás Vidal, Manuel Bragado, Vicente Araguas e o cantante Roger de Flor.Día 24 sábado
19:00 horas: Charla de Rosa Aneiros e sinatura dos seus libros de Sol de Inverno (PREMIO XERAIS DE NOVELA 2009) e Ás de bolboreta (PREMIO F. CAIXA GALICIA 2009)
19:30 horas: Jorge Llorca asinará exemplares do seu libro O’ Salto do Can.
Día 25 domingo
19:00 horas: Presentación de Ao pé da Laxa da Moa de Antón Cortizas. Intervirán Manuel Bragado e Antón Cortizas.
Juan Gelman este martes en Compostela
Recordámosvos que mañá martes, 20 de abril, ás 19.30, no Salón Nobre do Pazo de Fonseca da Universidade de Santiago de Compostela, terá lugar a conferencia “Un árbol sin hojas que da sombra”, do escritor arxentino JUAN GELMAN.
No marco do acto de entrega do Premio “Escritor Galego Universal 2010”, co que AELG distingue aquelas/es autoras/es que combinan a excelencia literaria co compromiso ético que os converte en referentes para o seu pobo na defensa da dignidade nacional e humana; Gelman vén sumarse así á nomina de “Escritores/as Galegos/as Universais”, xa conformada por:
2006: Mahmoud Darwish (Palestina)
2007: Pepetela (Angola)
2008: Nancy Morejón (Cuba)
2009: Elena Poniatowska (México)
Agardamos poder contar coa túa presenza para arroupar así o noso novo Escritor Galego Universal e gozar da súa palabra.
Homenaxe a Uxío Novoneyra en Compostela
O espectáculo “Canto de Permanencia” – Homenaxe a Uxío Novoneyra, con música, audiovisuais, poesíae a actuación de Uxía Senlle sobre poemas do autor terá lugar este martes 20 de abril ás 20:30 no Teatro Principal de Compostela. Entrada de balde até completar aforo.
Juan Gelman no III Encontro Cidade da Coruña
O luns 19, no contexto das actividades do III Encontro Cidade da Coruña, este ano co tema “Literatura e viaxe”, o poeta, periodista e traductor arxentido Juan Gelman ofrecerá unha intervención titulada “Baixo chuvia allea”.
Será na Real Academia Galega (rúa Tabernas 11, A Coruña) ás 20:00. Entrada: libre até completar capacidade.
