Mañá xoves 25 de marzo na Biblioteca de Estudos Locais presentarase o libro Bailabén, de Gustavo Couto e Edith Cotilla (Ed. do Cumio). O acto comeza ás 20 horas e a entrada é libre até completar capacidade.
Alberte Momán e Diego Giráldez gañan os premios Aurelio Aguirre e José Saramago
Alberte Momán gañou a VII edición do Certame de Poesía Aurelio Aguirre coa obra Sermos un. O xurado valorou “a construción do poemario, a perfecta cohesión entre o poético e o real permitindo transmitir unha confesión irreverente a través do verso libre que flúe na conciencia social”.
O vencedor do IX Certame de Relato Curto José Saramago foi Diego Giráldez García coa obra Un cometa para unha despedida, sobre a cal o xurado salientou a solidez da linguaxe, a tensión do relato e o misterio que envolve o argumento. Os dous premios están organizados pola concellaría de Cultura de Santiago.
Xesús Alonso Montero: “Vexo difícil volver á RAG”
O escritor e académico galego Xesús Alonso Montero -será investido hoxe pola UNED como Doutor Honoris Causa por ser “digno representante do galego”. Máis información en Galicia Hoxe (entrevista), La Voz de Galicia, El País e La Opinión de A Coruña.
III Premio Internacional de Poesía para niños Ciudad de Orihuela
Kalandraka deu a coñecer as bases do III PREMIO INTERNACIONAL DE POESÍA INFANTIL CIUDAD DE ORIHUELA, co prazo aberto para a presentación de traballos en castelán até o 20 de setembro de 2010. Bases: PDF, 563 KB.
Ás de bolboreta, seleccionado para os White Ravens
Segundo informa a editorial Xerais, “a novela Ás de bolboreta de Rosa Aneiros foi seleccionado para formar parte da prestixiosa exposición The White Ravens 2010 que a Internationale Jugendbibliothek organiza anualmente no marco da Feira del Libro per Ragazzi de Bologna”. A exposición contén 250 libros infantís e xuvenís en máis de trinta idiomas e vai acompañada dun catálogo en inglés coas informacións bibliográficas e reseñas de todos os títulos.
O Liceo de Ourense celebra o Día da Poesía
Mañá martes día 23 de marzo, a partir das cinco da tarde na Sala de Tertulia do Liceo de Ourense a Sección de Literatura celebrará o Día Mundial da Poesía adicado nesta ocasión os poestas Miguel Herández de Uxío Novoneyra, coa presencia de case un centenar de alumnos e alumnas dos Institutos Otero Pedrayo, Celanova, Blanco Amor, Lagoas, A Carballeira, Carmelitas e E.P.A, que recitarán poemas dos autores homenaxeados neste ano 2010. O acto será introducido por Delfín Caseiro.
Presentación de Urco Editora na Coruña
A Asociación Cultural Alexandre Bóveda informa que mañá martes 23 de marzo, terá lugar a presentación na Coruña de Urco Editora. Será ás 20:30 h. no salón de actos da asociación, con entrada libre.
URCO EDITORA é unha iniciativa editorial que vén encher un oco histórico no sistema literario galego: a publicación de literatura de fantasía, ciencia ficción e terror. Até agora a escasa presenza destes xéneros na literatura traducida estaba fragmentada en distintas editoriais e coleccións, catalogada especialmente baixo os criterios de “clásicos” ou de “literatura xuvenil”. Por isto URCO é pioneira na achega sistemática destes tres xéneros ao público galego.
O CGAI estrea as producións galegas Entre linguas e Theremin azulexo
Tráiler de Entre linguas
O Centro Galego de Artes da Imaxe (Rúa Durán Loriga. 10 baixo, A Coruña) estrea hoxe luns día 22 de marzo (20.30 horas) os traballos galegos ENTRE LINGUAS (2010) de Vanessa Vila Verde Lamas, Eduardo Sanches Maragoto e João José Varela Aveledo e THEREMIN AZULEXO (2010) de David Castro Sopeña. Ambos traballos recibiron subvención na última convocatoria de Talento do AGADIC. Vanessa Vila Verde Lamas e David Castro Sopeña estarán presentes para falar delas e ter un encontro co público. A entrada é gratuíta.
Mónica Bar Cendón: “O feminismo deixou de ser un movemento invisibilizado”
Entrevista de Arturo Losada á autora do libro O feminismo en Galicia no Xornal:
Logo, como era a radiografía política do feminismo dos comezos?
Variadísima. Hai mulleres inicialmente vencelladas a partidos, e outras que eran feministas independentes. Na AGM entraron comunistas, revolucionarias, galeguistas, independentistas… de todo un pouco, incluso xente vinculada ao cristianismo de esquerdas.Con respecto á lingua…
As feministas foron máis galeguistas que moitos militantes de esquerdas. A lingua que se empregaba para case todas as comunicacións era o galego. Estabamos casadas coa lingua e a terra.Que representou a AGM?
A máis central e a máis revolucionaria das asociacións feministas. Moitas das súas consignas aínda seguen en marcha, como a sexualidade libre, a igualdade de dereitos plena, a crítica da utilización da muller como obxecto sexual, o dereito ao aborto… [Ler entrevista completa]
Acto do PEN Clube en Santiago polo Día Mundial da Poesía
Hoxe 22 de marzo ás 20 horas no Centro Social Caixanova de Santiago (na Praza de Cervantes).
