Barcelona: conferencia de Montse Pena sobre as orixes da literatura infantil en galego

Publicado o por

Montse Pena impartirá o xoves 10 de decembro en Barcelona a conferencia As orixes da literatura infantil en galego: Xohana Torres, Galaxia e La Galera. Na década de 1960 fixouse un obxectivo editorial prioritario: a creación dunha literatura infantil en galego, catalá e vasco. É por iso que La Galera abre unha liña de coedicións con Edili e Galaxia, e, pola súa banda, esta editorial escolle unha escritora moi premiada naquel momento, Xohana Torres, como tradutora dos títulos cataláns ao galego e como autora de narracións orixinais.

Montse Pena Presas, investigadora da Universidade de Santiago de Compostela e especialista en literatura infantil e xuvenil ofrecerá nesta conferencia datos pouco coñecidos do papel fundamental da escritora neste ambicioso proxecto editorial. O acto celebrarase o xoves 10 de decembro de 2009 ás 15:00 na Aula 103a da Facultat de Filologia da Universitat de Barcelona (Gran Via de les Corts Catalanes, 585 – 08007 Barcelona). Máis información na páxina web da Facultat de Filologies Gallega i Portuguesa.

O AGADIC organiza un Foro das Industrias Culturais Galicia-Norte de Portugal

Publicado o por

Baixo o título de CREATIVA, a Axencia Galega das Industrias Culturais da Consellería de Cultura e Turismo e a Direccao Regional de Cultura do Norte do Ministerio de Cultura portugués organizan conxuntamente un FORO DAS INDUSTRIAS CULTURAIS Galicia-Norte de Portugal, un encontro multilateral e interdisciplinar entre empresas, creadores e artistas de distintos ámbitos do sector da cultura e das dúas procedencias xeográficas, que vai ter lugar na cidade de Vigo dende o 9 ao 19 de decembro.

A música, a escena, o libro como produto gráfico e a produción audiovisual son os grandes eixos que vertebran cada unha das actividades desta iniciativa. Será tamén un momento idóneo para a mostra de diversos espectáculos de teatro, danza e concertos, algúns deles producidos expresamente para a ocasión, que virán a complementar o programa coa incorporación do público xeral á parte máis lúdica do evento.

Descargar programa enPDF

Santiago: presentación da revista de pensamento Roteiros

Publicado o por

Este xoves preséntase en Santiago o número 3 da Revista–Anuario de Filosofía Roteiros. Arumes de pensamento crítico, editada pola Asociación Cultural de Pensamento Filosófico e 3C3 Editores. No acto intervirán os profesores e membros do Comité de Redacción da revista, Manuel Rivas García e Miguel Ángel Martínez Quintanar –coordinador deste número–, xunto co director editorial de 3C3, X. Amancio Liñares Giraut. A cita é na Librería Couceiro (Praza de Cervantes, 6. SANTIAGO) o xoves, 10 de decembro, ás 8 da tarde.

Participación da AELG na AchegArte (fotos)

Publicado o por

A presenza da Asociación de Escritores en Lingua Galega foi tan relevante ao menos como na pasada edición do Cultur.gal. Este ano, ademais de atender un stand propio durante os dous días de feira, foron gravadas 22 socias e socios a falaren da súa máis recente actividade e participaron na lectura literaria organizada pola Asociación por volta de 35 persoas, con importante afluencia de público.

AELGAchegArte [Mercedes Queixas no stand da AELG. A foto é de Alfredo Ferreiro]

AELGAchegArte2[Alfredo Ferreiro, Cesáreo Sánchez e Xabier P. Docampo. A foto é de Antonio Iglesias]

img_6521[Público da actividade “Lecturas compartidas”. O público foi abondoso en todas as intervencións, realizadas desde a parte oculta do sofá da foto. A foto é de Ghanito]

Culleredo: presentación de Escapado de Luís Lamela

Publicado o por

O libro Escapado de Luís Lamela preséntase en Culleredo o próximo mércores 9 de decembro de 2009, ás 20.00 h, na Biblioteca de Poesía “Uxío Novoneyra” (Pazo de Vila Melania – Vilaboa). Interveñen no acto Celestino Poza Domínguez, concelleiro de Cultura; Manuel Bragado, director de Edicións Xerais; Carlos Pereira Martínez, historiador, e o autor.

Marcos S. Calveiro gaña o Premio Lazarillo de Narrativa Xuvenil

Publicado o por

O autor anunciou a nova hoxe mesmo no seu propio blog:

“Unha novela miña que se titulará O pintor do sombreiro de malvas vén da gañar a edición 2009 na modalidade de narrativa xuvenil do Premio Lazarillo convocado pola OEPLI dende o ano 1958. O libro publicarase na primavera do ano 2010 en galego por Edicións Xerais, en castelán por Edelvives e en euskera por Ibaizabal.

A historia acontece na pequena vila francesa de Auvers, na ribeira do río Oise, durante sesenta e nove días do verán do ano de 1890 e está protagonizada polo rapaz do lenzo que acompaña ao pintor do sombreiro de malvas…”

Ver listaxe de gañadores do Premio Lazarillo (1958-2007)

A TVG elimina tres dos seus espazos culturais

Publicado o por

«A dirección da TVG decidiu prescindir de tres dos seus programas culturais, Miraxes, Libro Aberto e Onda Curta ademais de reestruturar outros como Planeta Cine. En total son catro persoas as que perden o seu posto de traballo. A última emisión de Miraxes será o día 20 de decembro. Os tres redactores fixos do espazo, Xandra Tedín, Montse Montaos e Miguel Fernández xa recibiron a carta de despedimento. Miraxes, que presentaba as novidades dos eidos artísticos e culturais do país, contaba con sección de reportaxes, axenda de actualidade, cine e música e nos últimos tempos estaba obtendo un bos resultados de audiencia. […]» (Galicia-Hoxe)

Marilar Aleixandre, “Escritora na súa Terra 2010”

Publicado o por

A homenaxe O Escritor na súa Terra, impulsada pola Asociación de Escritores en Lingua Galega, chega no 2010 a súa XVI edición recaendo, por decisión unánime da súa asemblea de socios e socias, na figura da escritora Marilar Aleixandre. Esta iniciativa anual conforma xa unha tradición na traxectoria da asociación, e tense constituído como unha celebración na que a terra de orixe ou de adopción do homenaxeado/a cobra un protagonismo fundamental nesta cita cultural.

Tratase dunha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a), a plantación dunha árbore simbólica (elixida polo propio autor), a colocación dun monolito conmemorativo ou a inauguración dun espazo público co nome do/a homenaxeado/a ou cun nome elixido polo/a homenaxeado/a. A homenaxe a Marilar Aleixandre celebrarase na primavera do 2010.

Os Bos e Xenerosos

Outro importante premio outorgado pola AELG é Os Bos e Xenerosos que, na edición do ano que ven, recoñecerá o labor desenvolvido polos vintesete concellos que organizaron o Premio Blanco Amor de Narrativa, que cumpre o vindeiro ano o seu 30º aniversario. No transcurso da Cea das Letras, que se celebrará na primeira semana de maio do 2010, entregarase o galardón ao concello de Poio, organizador do certame no 2010, en nome de todos os concellos que participaron na súa organización ao longo da súa traxectoria.

Premio ás Institucións

Tamén na Cea das Letras entregarase o premio AELG ás Institucións, que na edición 2010 será entregado ao Salón do Libro Infantil de Pontevedra.

Vigo: presentación do Premio Merlín

Publicado o por

O libro Mil cousas poden pasar de Jacobo Fernández Serrano, Premio Merlín de Literatura Infantil 2009, será presentado o vindeiro xoves, 10 de decembro, ás 20,00 horas na Libraría Librouro (rúa Eduardo Iglesias, 12) de Vigo. Participarán no acto Chus Pereiro, Helena Pérez e Jacobo Fernández Serrano.