A Concellaría de Cultura da Coruña celebra o Día Mundial da Poesía cunha homenaxe á máis grande das poetas galegas, Rosalía de Castro. Ás 13:00 do sábado 21 de marzo na Sala de Exposicións de Durán Loriga celebrarase un recital poético-musical coa participación de Tonecho Castelos Boutureira (violín), Pablo Gómez Esqueira (acordeón) e as poetas Lucía Aldao, Tati Mancebo, Diana Varela Puñal, Paloma Calvo Varela, Berta Dávila e Olga Patiño. O público asistente recibirá como agasallo unha edición do poema “A Sir John Moore” realizado coa colaboración do Padroado Rosalía de Castro. Inaugúrase tamén unha exposición con obras de Julia Ares, Soledad Penalta, Yolanda Ferrer, Carmen Chacón, Dorda, Carmen Senande, Anxeles Penas e Dolores Gálvez con escultura, fotografía, pintura e gravado feito por oito artistas coruñesas. A exposición estará aberta do 18 ao 22. Ademais, até o 6 de abril unha mostra bibliográfica percorrerá na Biblioteca de Estudos Locais a traxectoria vital e creativa da autora de Cantares gallegos e Follas novas.
Finalistas dos Premios AELG 2009
Literatura infanto-xuvenil (Aelg-Gálix):
1. A cabeza da medusa, Marilar Aleixandre
2. Caderno de animalista, Antón Fortes Torres
3. Fume, Antón Fortes Torres
4. O libro das viaxes imaxinarias, Xabier P. DoCampo
5. PAlAbrAs brAncAs, Elvira Riveiro
Poesía:
1. A melancolía dos corpos, Xulio López Valcárcel
2. Acendede as almenaras: cántigas de amor, de amigo e de escarnio, Bernardino Graña
3. Amor Amén, Iolanda Zúñiga
4. Construcións, Eduardo Estévez
5. Cultivos transxénicos, Carlos Negro
6. Hordas de escritura, Chus Pato
7. Látego de algas, Antón Reixa
8. Libro de Alicia, Olalla Cociña
9. Migracións, Rafa Villar
10. Non son de aquí, María do Cebreiro
11. O xeito de Freud, Carlos Lema
12. Reversos: días adiados, Ramiro Fonte
Teatro:
1. Fume / Insomnio, Rubén Ruibal Armesto e Carlos Losada Galiñáns
2. Historia da chuvia que cae todos os días, Roberto Salgueiro
3. Nachtmahr, Raúl Dans
4. Unha primavera para Aldara, Teresa Moure
Ensaio:
1. Anti Natura, María Xosé Queizán
2. Caderno de notas, Jenaro Marinhas del Valle
3. Fendas abertas: seis ensaios sobre a cuestión nacional, Carlos Taibo
4. Fin de século en Palestina, Miguel Anxo Murado
5. Historia de Ourense, Marcos Valcárcel
6. Miro Casabella e a nova canción galega, Xan Fraga
7. O espírito da letra. Nove achegas filosóficas a textos literarios, Luís G. Soto
8. O natural é político, Teresa Moure
9. Por unha Galiza liberada e novos ensaios, Xosé Manuel Beiras
Tradución:
1. A conxura dos necios (John Kennedy Toole), Eva María Almazán García
2. As flores do mal (Charles Baudelaire), Gonzalo Navaza
3. Cantos e fragmentos (Safo), Raúl Gómez Pato
4. O xiro postal (Sembène Ousmane), María Isabel García Fernández
5. Un home na escuridade (Paul Auster), Eva María Almazán García
Narrativa:
1. A choiva do mundo, Xosé Manuel Pacho Blanco
2. A verdade como mal menor, X. Luís Martínez Pereiro
3. Costa Norte/ZFK, Xurxo Borrazás
4. Festina lente, Marcos S. Calveiro
5. Memoria de cidades sen luz, Inma López Silva
6. O libro das viaxes imaxinarias, Xabier P. DoCampo
7. O profesor de vegliota, Manuel Veiga
8. O xardín das pedras flotantes, Manuel Lourenzo
9. Os nomes do traidor, Xurxo Sierra Veloso
10. Shakespeare destilado, Xesús Constela
Mellor traxectoria xornalística (Aelg-Colexio de Xornalistas):
1. Ana Romaní
2. Bieito Iglesias
3. Camilo Franco
4. Gustavo Luca de Tena
5. Marcos Valcárcel
6. Xosé Manuel Eyré
7. Xosé Manuel Pereiro
Mellor blog literario:
1. …mmmm…, Estíbaliz Espinosa
2. As uvas na solaina, Marcos Valcárcel
3. Das orixes de marzo, Helena González
4. Lándoa. Marxes de Texto, Arturo Casas
5. Henrique Marques-Samyn, Henrique Marques-Samyn
6. O levantador de minas, Alfredo Ferreiro
Tres libros galegos na prestixiosa lista dos White Ravens 2009
A Internationale Jugendbibliothek München, unha das institucións de referencia no que atinxe ao libro infantil e xuvenil, comunicou a relación de títulos que forman este ano a lista dos White Ravens, que se presentará na vindeira Feira do Libro Infantil de Bologna. Tres obras galegas foron elixidas pola Biblioteca de Munich: A cabeza de Medusa de Marilar Aleixandre (Xerais), Fume de Antón Fortes, ilustrado por Joanna Concejo (OQO) e O prodixio dos zapatos de cristal de Xosé A. Neira Cruz, ilustrado por Rodrigo Chao (Galaxia).
A Coruña: recital do Grupo Ouriol para celebrar o Día Mundial da Poesía
A Biblioteca Pública da Coruña Miguel González Garcés celebra o Día Mundial da Poesía o 21 de marzo co espectáculo poético-musical De amor e morte a cargo do grupo Ouriol formado por Eva Veiga, Bernardo Martínez e Fito Ares. Será o próximo venres 20 de marzo a partir das 20:30 no Salón de Actos da Biblioteca. A entrada é libre.
Quico Cadaval, Cándido Pazó e Teresa Moure, candidatos aos Premios María Casares
O próximo mércores 25 de marzo entréganse no Teatro Rosalía de Castro da Coruña os premios María Casares, que outorga a Asociación de Actores e Actrices de Galicia. Na categoría de mellor texto orixinal os candidatos aos premios son Quico Cadaval, por Obra -No Comment, Teresa Moure por Unha primavera para Aldara e Cándido Pazó, por E ti quen vés sendo?. A obra que acumula máis candidaturas é Unha primavera para Aldara, con nove, seguida de Obra con sete.
Lingua de amor, certame de cancións e declaracións de amor en galego
Xa está en marcha a 3ª edición de Lingua de Amor, o concurso de cancións e declaracións de amor en galego a través do correo electrónico promovido polo Consello da Xuventude de Galicia, a través do seu Servizo de Normalización Lingüística e en colaboración co Servizo de Normalización Lingüística do Concello de Vigo. Pódense descargar as bases neste enderezo (PDF, 1,8 MB).
Lugo: exposición e conferencia de Siro López
Hoxe luns 16 de marzo ás 20:00 horas inaugúrase na Sala de Exposicións do Pazo de San Marcos de Lugo a exposición de Siro López Valle-Inclán: Retratos, caricaturas e visións, promovida polo Clube Cultural Valle-Inclán e que poderá ser visitada até o 19 de abril.
O debuxante e ilustrador impartirá ademais unha conferencia no Salón de Actos da Deputación de lugo (R/ San Marcos s/n), baixo o título Ilustración e literatura con Valle-Inclán como modelo. Será mañá martes 17 de marzo a partir das 20 horas, con entrada libre.
A Coruña: conferencia de Henrique Harguindey
O vindeiro mércores 18 de marzo o profesor, tradutor e escritor Henrique Harguindey Banet pronunciará dentro do ciclo Língua, Literatura e Naçom unha charla co título Testemunhas francesas sobre Galiza. Henrique Harguindey Banet é un dos fundadores da Agrupaçom Cultural O Facho. Ten traducido a autores como Víctor Hugo (O reiciño de Galicia), Boris Vian (A escuma dos días) ou Ionesco (A cantante calva) entre moitos outros. A palestra comezará ás oito do serán no local da Fundación Caixa Galicia, no Cantón Grande na Coruña.
Baldo Ramos gaña o IX Premio de Poesía Fiz Vergara Vilariño
Sarria, 14 de marzo de 2009
Reunidos na casa do Concello de Sarria os membros do xurado do IX Premio de Poesía Fiz Vergara Vilariño acordamos conceder o premio ao libro presentado baixo o lema: *Palabras para un baleiro*.
Neste libro atopamos unha reflexión profunda sobre o sentido da poesía como canle para entender a vida, para interpretar vivencias inefables. Un achegamento existencialista, case filosófico, na procura dunha expresión alén da propia poesía. Unha poesía esencializada con moito sentido do ritmo.
Aberta a plica da obra seleccionada, en acto público celebrado ás 13:30 horas, resultou ser o seu autor Baldo Ramos.
Xosé Antón Neira Cruz, Lucía Aldao, Pilar Pallarés, Xermán Arias (Presidente), María Casar (secretaria).
Mañá saberemos quen gañou o IX Premio de Poesía Fiz Vergara Vilariño
A Agrupación Cultural Ergueitos e a Concellaría de Cultura do Concello de Sárria convocan aos medios de comunicación e ao público en xeral ao acto de apertura da plica da obra gañadora da novena edición do Premio de Poesía Fiz Vergara Vilariño, que se levará a cabo mañá sábado 14 de marzo, ás 13:30 horas, no Salón de Plenos do Concello de Sárria. Este acto levarase a cabo logo da derradeira reunión dos membros do xurado, composto polo Concelleiro de Cultura de Sárria, Xermán Arias, a Presidenta da Agrupación Cultural Ergueitos, María Casar (ambos con voz e sen voto) e os poetas Xosé Antón Neira Cruz, Lucía Aldao e Pilar Pallarés.
